martes, 23 de xuño de 2015

A Uned Pontevedra estrea clases en streaming nos catro cursos que oferta este verán

Desenvolveranse entre o 1 e o 3 de xullo, cunha carga de 20 horas lectivas cada un, no centro asociado situado en Monteporreiro. Só no caso dun seminario cambiará a localización: impartirase no cárcere da Lama.

O Centro Asociado á Uned en Pontevedra acollerá do 1 ao 3 de xullo catro cursos de verán, enmarcados dentro da XXVI Edición dos Cursos de Verán da Uned que se desenvolverán en 40 sedes de todo o país. Iso si, por primeira vez este ano, todos os cursos da universidade de verán poderán ser seguidos en streaming a través da rede.

Os catro cursos que acolle o centro pontevedrés converteranse durante esas primeiras xornadas de xullo nun espazo de encontro entre profesores, estudantes e profesionais e expertos do dereito, a educación e a psicoloxía. Dous deles centraranse, especificamente, no campo da educación alternativa e a intervención educacional.

Por exemplo, a primeira proposta está dirixida a psicólogos e profesores. O curso Inestabilidade emocional e agresividade na infancia e adolescencia: intervencións positivas, abordará as problemáticas máis frecuentes atopadas na etapa infantil e xuvenil que están relacionadas coas emocións, os hábitos e os comportamentos dos nenos.

CURSO NA LAMA. Aínda que como norma os cursos -de 20 horas de cargas lectivas e equivalentes a 2 créditos ECTS- contrarán co centro de Monteporreiro como sede, o centro penal da Lama acollerá sesións dun deles. En concreto, na prisión desenvolverase o seminario de Utilización da arteterapia para a concienciación sobre roles de xénero,  ao que asistirán recluídos deste Centro que traballarán mediante a realización de talleres centrados en técnicas de arteterapia os roles de xénero. Poderá participar no curso calquera persoa interesada na arteterapia como medio de expresión artístico-creativa.

PREZO. Todo o que queira apuntarse pode facelo a través do site da Uned -Pontevedra ou dirixíndose ás instalacións do Centro Asociado -Rúa Portugal 1.  Todas as actividades terán un custo de matrícula de 108 euros. Para estudantes universitarios, membros da comunidade universitaria Uned e persoas en situación de desemprego, as actividades terán un prezo de inscrición de 63 euros. Os alumnos con discapacidade e vítimas do terrorismo verán reducida a súa matrícula ata os 22 euros, e para os membros de familia numerosa especial será gratuíta.
PROGRAMA COMPLETO dos cursos na Uned Pontevedra.

PROGRAMA COMPLETO dos cursos de verán en toda España.

Ningún comentario:

Publicar un comentario