Coalición por Europa reivindica uso do galego, euskera e catalán en Europa

A alianza na que estivo CxG quere que estes idiomas sexa cooficiais tamén no Parlamento Europeo. É a primeira coalición e reclamar isto no novo pleno.

Os eurodeputados Izaskun Bilbao (PNV), Ramón Tremosa i Balcells (Converxencia Democrática de Cataluña) e Francisco Gambús (Unión Democrática de Cataluña) pediron este martes ao reelixido presidente do Parlamento Europeo (PE), Martín Schulz, que permita o uso do vasco, catalán e galego nos plenos.

 

Segundo un comunicado do PNV, con esta proposta os europarlamentarios pretenden aplicar e mellorar o acordo sobre uso de linguas cooficiais que existe no Estado español. Bilbao, Tremosa e Gambús avogaron por permitir á cidadanía relacionarse nestas linguas coa Comisión Europea (CE) e o Consello na primeira iniciativa lingüística neste senso presentada no PE.

 

Igualmente propuxeron mecanismos "a custo cero" para traducir de forma simultánea as intervencións que se produzan nos plenos de Estrasburgo.

 

O tres eurodeputados, elexidos na Coalición por Europa na que estaba CxG, lembraron que a Eurocámara aprobou en setembro de 2013 por 645 votos a favor, 26 en contra e 29 abstencións, o denominado informe Alfonsí, dedicado a propor medidas que melloren a protección das linguas minorizadas e en perigo de desaparición en Europa.

 

Mediante este informe, o Parlamento Europeo instaba á Comisión Europea a defender con medidas lexislativas e actuacións executivas as linguas minorizadas e en perigo de desaparición. A Eurocámara alertaba do risco que corren estas linguas ante os recortes do gasto que, a xuízo dos europarlamentarios, están a levarse a cabo nas partidas de promoción da diversidade.

 

O tres eurodeputados consideraron que sería "coherente" que o Parlamento Europeo "se implicara na posta en marcha desta iniciativa". Este compromiso "outorgaría á Eurocámara unha posición de liderado no desenvolvemento das súas previsións" e "permitiría que se aliñase cos principios recolleitos na carta sobre linguas minorizadas", afirmaron os europarlamentarios.

 

Ao seu xuízo, "propiciaría o achegamento da Cámara a preto de 50 millóns de persoas que utilizan este tipo de linguas en toda Europa cada día".

 

Bilbao, Tremosa e Gambús lembraron que teñen unha especial lexitimidade" para levar a cabo esta reivindicación porque teñen "como lingua materna un destes idiomas (euskera nun caso e catalán noutros dous)". En todo caso, lembraron que representan a máis nacionalidades: "Presentámonos ás eleccións baixo as siglas 'Coalición por Europa' que agrupan a partidos de Cataluña, Euskadi, Galicia e Canarias", subliñaron os europarlamentarios.