xoves, 14 de maio de 2015

Microsoft detalla as distintas versións de Windows 10 que lanzará este ano

Nun momento no que parecía que Windows ía deixar de ter grandes complicacións cos seus nomes de produto tras a chegada de Windows 10, dende Microsoft sorprenden anunciando que o sistema operativo que este verán chegará a 190 países en 111 linguas vai contar cun amplo abano de edicións que poden resultar bastante confusas para os consumidores, pero que serven para definir claramente os distintos ámbitos de aplicación da nova plataforma de software.
As edicións de Windows 10 confirmadas serían:
- Windows 10 Home: a edición doméstica orientada ao escritorio, que ofrecerían unha experiencia de uso completa en ordenadores, tabletas e ordenadores convertibles, integrando tamén o asistente Cortana, o novo navegador Microsoft Edge e o sistema de identificación Windows Hello, entre outros moitas novidades fronte a Windows 8.1.
- Windows 10 Mobile: o sistema operativo móbil deixaría de chamarse Windows Phone 8.1 e pasaría a definirse como Mobile, o que indicaría que estamos ante dispositivos móbiles baseados en interfaces táctiles, ou sexa, que aparte de teléfonos tamén funcionaría en pequenas tabletas, polo que podemos velo como a fusión entre Windows Phone e Windows RT.
- Windows 10 Pro: sería a versión do Windows de escritorio que engadiría funcionalidades pensadas para profesionais e pequenos negocios, como protección para datos sensibles, soporte remoto e escenarios de produtividade móbil e de tecnoloxías na nube.
- Windows 10 Enterprise: estaría baseada en Windows 10 Pro, pero dirixida a medianas e grandes empresas, polo que incluiría numerosas prestacións dirixidas a un uso seguro de dispositivos, identidades, aplicacións e información sensible no contorno corporativo.
- Windows 10 Education: sería algo semellante ás versións Home e Pro, pero dirixido a contornos educativos nos que as licenzas se mercase por volume.
- Windows 10 Mobile Enterprise: aquí temos unha curiosa versión do sistema operativo móbil que busca facilitar a súa administración dende a empresa, engadindo xeitos seguros e flexibles para que os negocios poidan xestionar as actualizacións e moitos outros elementos fundamentais para as súas xestións de flotas de dispositivos móbiles.
Tamén estarán dispoñibles versión de Windows 10 Enterprise e Windows 10 Mobile Enterprise para dispositivos industriais como os caixeiros automáticos ou os TPV, así como un Windows 10 IoT Core (para pequenos trebellos da Internet das cousas).
Dende Microsoft lembran que durante un ano permitirán que os usuarios con dispositivos con Windows 7, Windows 8.1 e Windows Phone 8.1 poderán actualizar a Windows 10 Home, Windows 10 Mobile e Windows 10 Pro segundo corresponda, totalmente de balde, mentres que as versións profesionais e educativas continuarán a ser de pagamento.

Ningún comentario:

Publicar un comentario