xoves, 15 de setembro de 2016

Un adolescente de 14 anos planta cara ás reválidas de Wert

O estudante Isidoro Martínez conseguiu 240.000 firmas contra as polémicas avaliacións externas da LOMCE

Isidoro Martínez, de 14 anos, sae con aspecto orgulloso do Ministerio de Educación. Aínda non conseguiu o seu obxectivo, pero deu un paso importante: “O ministro recibiunos. Vai seguir na traxectoria da súa ideoloxía e non vai eliminar as reválidas”, lamenta. Minutos antes de entrar no edificio camiñaba pola rúa de Alcalá de Madrid coa enteireza de quen presentase a diario reformas lexislativas na alta administración do Estado: “Sorpréndeme, pero estou tranquilísimo. Parece que me botaron algo no almorzo”, confesa. Entre unha nube de cámaras de televisión, carga tranquilamente a caixa que simboliza as 240.000 firmas que conseguiu contra as reválidas da LOMCE, as cuestionadas avaliacións externas que entran en vigor este ano e que afectarán a 335.991 alumnos de ESO e a 229.332 de Bacharelato.
Este mozo da localidade gaditana de San Fernando puxo en marcha a recollida de firmas o 30 de xullo, día de publicación do decreto no BOE. Ía camiñando por un centro comercial esculcando co móbil entre as tendencias en Twitter, cando descubriu que a aprobación das reválidas era un dos temas máis candentes. Informouse sobre o tema, indignouse e canalizou o enfado da única maneira útil que se lle ocorreu: abriu unha petición en Change.org, a maior plataforma de recollida de firmas do mundo. Logo publicouna en Twitter, sen pensar que un cuarto de millón de persoas acabarían apoiándolle.

 

Ningún comentario:

Publicar un comentario