mércores, 15 de abril de 2015

EscolaTIC achega a partir do venres as novas tecnoloxías ao profesorado galego

Os vindeiros 17 e 18 de abril, dará comezo a segunda entrega de EscolaTIC, unha xuntanza arredor das novas tecnoloxías aplicadas ao eido docente. O encontro terá lugar no Pazo de Congresos e Exposicións de Santiago de Compostela (San Lázaro). Desta volta, EscolaTIC2015, centrarase na achega de recursos ao profesorado galego, isto é: como promover e reforzar a actividade formativa empregando estas novas ferramentas. As Xornadas EscolaTIC2015, segundo os organizadores, abranguerán “conferencias de figuras nacionais de grande relevancia no eido educativo”, relatorios sobre experiencias de integración da tecnoloxía nas aulas, obradoiros prácticos e unha Sala Aberta para debates.
O evento vén da man da Consellería de Cultura e Educación e das Estruturas de Formación Permanente do Profesorado.
En canto a programa e relatores, contarase coa presenza de Linda Castañeda, Andrea Giráldez e César Poyatos, que serán os conferenciantes plenarios e as súas charlas versarán sobre o desenvolvemento das competencias docentes no mundo tecnolóxico, a creatividade e o emprego de dispositivos de maneira efectiva e creativa.
Asemade, achegarase un escenario-oportunidade para que docentes de toda Galicia amosen as súas experiencias coas TIC nas aulas e en ámbitos como a creación audiovisual, a robótica, o uso de portafolios dixitais, o proceso de mesturar xogos e aprendizaxe, a lectoescritura con tabletas, a introdución do alumnado na programación informática ou a creación de material multimedia.
Alén destes temas, nestas xornadas tamén se tirará proveito dos códigos QR para que os participantes amosen e compartan as súas vivencias coas TIC.
Por outra banda, o evento acubillará obradoiros e actividades de índole práctica sobre a introdución das novas tecnoloxías nas aulas galegas, coa opción de manexar robots, programar aplicacións ou dar feitura a novos produtos audiovisuais.
Outra das faces deste encontro será a Sala Aberta, un foro de debate no que se abranguerán temas como: os dereitos de autor e licenzas de uso, as redes sociais na educación, os desafíos dixitais para un cambio educativo, a formación docente en novas tecnoloxías, as TIC e as NEAE.

Ningún comentario:

Publicar un comentario