venres, 13 de marzo de 2015

“Temos un colexio rural que medrou de 11 nenos a 23”

Manzaneda é un pequeno concello de alta montaña de Ourense que inclúe parte da Cabeza Grande, onde se atopa a única estación de esquí de Galicia, a estación de montaña de Manzaneda. Neste concello terá lugar o sábado 14 un encontro cos xogos populares do país e a música tradicional. Entrevista con Davide García -alcalde, músico e bombeiro-, un dos promotores deste encontro. 

Galiza perde poboación e o rural desángrase. Como vive esta realidade o Concello de Manzaneda?
A realidade do Concello de Manzaneda estamos a mudala pouco a pouco. Fomos dos poucos concellos da Galiza do rural que este ano volvemos a crecer en poboación. Temos un colexio que nos últimos seis anos pasou de 11 nenos a 23. No que atinxe a emprego fomos o oitavo concello da provincia en creación de novas empresas e cooperativas e reducimos o paro no 2014 nun 15%. Todo isto non é froito da casualidade. Levamos apostando fortemente polos proxectos produtivos no agro durante anos con cursos, charlas e fomento do cooperativismo e somos o concello da provincia de Ourense que máis destina a servizos sociais e cultura. Non obstante, somos conscientes de que de non mudar as políticas da Xunta en defender os servizos públicos do rural e dar valor o noso agro non aguantaremos nin creceremos todo o que temos que crecer.
 
Ademais do turismo, que outros recursos económicos lle dan vida o Concello?
O principal recurso económico que posúe actualmente o municipio é o agrogandeiro e as empresas de transformación (castañas, carne, viño, etc…), aínda que si que e verdade que o turismo representa unha importante fonte de ingresos. Isto vese reflectido na ampliación de establecementos que nos últimos tres anos abriron as súas portas (casas de turismo rural, albergue municipal, etc..)
 
Vivir en plena montaña terá as súas avantaxes e os seus inconvintes ...
Tan só os que nos mandan dende San Caetano os actuais dirixentes da Xunta coa supresión de servizos especiais como o comedor escolar, mobilidade, recortes en axuda no fogar e dependencia, etc…  O resto para a xente que vivimos aquí creo que todo son avantaxes.
 
Daquela considerádesvos privilexiados polo voso patrimonio natural, etnográfico e cultural? 
É unha gran sorte pertencer a un concello con tanta diversidade no seu conxunto. Podemos pasar dos 400 metros do val do Bibei onde atopamos os viñedos e as paisaxes de ribeira ata os 1.800 da Cabeza Grande coa súa serra e o seu gando en extensivo. Na media ladeira os asentamentos poboacionais, zonas de labradío, soutos… Acompañando a todo isto patrimonio natural (monumentos naturais, árbores senlleiras, fervenzas, glaciares), etnográfico, cultural e inmaterial como o entroido.
 
Ademais de polo entroido, Manzaneda é referencia no pais por organizar outras festas que manteñen vivas as nosas tradicións.  Precisamente este sábado terá lugar unha. Pola tarde, a partir das 15.30 haberá bolos, billarda, chave e obradoiro de baile, e pola noite a partir das 23.00 serán amenizado polos grupos A Requinta de Laxeira e Carapau.  Como xurdiu a idea de montar estas xornadas?
Levamos varios anos recuperando o xogo dos bolos que se xogaban en distintas aldeas. Ao mesmo tempo levamos catro anos con clases de música tradicional, solfa e canto. Cremos importante dende o grupo de goberno rescatar estes seráns que fai anos facían os nosos veciños de forma espontánea case tódolos días do ano e dotalos de contido xuntando as aldeas dun día de xogos tradicionais, música tradicional, obradoiros de baile, etc…
 
Como colaboran co concello asociacións como A Rebusca e o Centro de Cultura Popular Xaquín Lorenzo?
A verdade é que sen a axuda do asociacionismo o concello non tería capacidade para organizar estes eventos. O concello outorga subvencións as diferentes asociacións existentes por medio dun procedemento de actividades que realizan e son elas as que co beneplácito do concello, organizan e dotan de contido as actividades a desenvolver.

Ningún comentario:

Publicar un comentario