venres, 15 de novembro de 2013

"Wert meteuse nunha quella sen saída"

O filósofo José Antonio Marina pediu a dimisión do ministro de Educación e Cultura, José Ignacio Wert, ao entender que está "nunha quella sen saída" e que deixou ao sistema educativo "na peor situación, que é unha situación de provisionalidade".
Marina explicou en declaracións a Europa Press que non cre que Wert "poida cambiar de rumbo". "Houbo unha improvisación tremenda na actuación do ministro e, cando isto se fai, hai que dar marcha atrás porque non se comprende a complexidade do problema", sinalou.
O director do Centro de Estudos en Innovación e Dinámicas Educativas (CEIDE-FSM) inaugurou a xornada 'O futuro da educación é hoxe', organizada pola Fundación SM no CaixaFórum de Madrid.
Marina analizou a actuación do ministro de Educación, recordando que "caeu no mesmo erro que todos os políticos". "Pensa que o sistema educativo se soluciona cunha lei e iso só llelo cren os que non coñezan o propio sistema", apuntou.
"O meu diagnostico é malo e paralizamos nunha lexislatura todo o sistema educativo, e iso son moitos anos e é o que me custa perdoar.
Ogallá Wert rectificase realmente e tomase boas decisións", sinalou, antes de matizar que o labor do ministro de Educación é "dificilísima".
Non obstante, durante o seu relatorio, Marina defendeu o actual sistema educativo español, destacando que é "unha mentira moi grande" aseverar que pasa por unha situación "moi mala". "É a mellor que tivemos nunca, pero pode ser moito mellor", afirmou.
Para o filósofo, algunhas das lagoas que aínda ten o sistema non se deben á LOGSE, tal e como algunhas críticas sinalan, senón que teñen relación coa "tradición escolar" de España, que ao seu entender é "pobre". Así mesmo, sinalou á mercadotecnia educativa como unha das posibles solucións para promover o labor dos docentes.

OS PROFESORES, TAMÉN RESPONSABLES

En calquera caso, si sinalou que parte da culpa tamén corresponde ao profesorado, posto que conta con "un 20% de mestres excelentes e un 20% que hai que facer o posible para que se vaian, porque non traballan nin deixan traballar,". O resto, para Marina, son indecisos aos que hai que dirixir ao primeiro grupo.
Antes da intervención de Marina fíxose entrega do premio aos dez proxectos gañadores do concurso Buenas prácticas educativas de loita contra o abandono escolar temperán e o fracaso escolar, convocado pola Fundación SM dentro do programa anual 'Educar éo todo'.

Ningún comentario:

Publicar un comentario