A Mesa enviaralle o seu informe aos grupos parlamentares para que exixan que o Goberno aplique dunha vez o Plan Xeral de Normalización

A asociación dirixirase ao presidente da Xunta para lle facer chegar o seu informe sobre o PXNLG e instalo a que retorne ao consenso. Do mesmo xeito dirixirase ás principais institucións culturais e lingüísticas do país.

A iniciativa da Mesa coincide co décimo aniversario da aprobación unánime do Plan Xeral de Normalización no Parlamento Galego.

Santiago de Compostela, 22 de setembro de 2014. – O día no que se cumpren dez anos da aprobación unánime do Plan Xeral de Normalización da Lingua Galega, A Mesa pola Normalización Lingüísitica anunciou que contactará cos diferentes grupos políticos presentes no Parlamento, a Xunta, e as principais institucións e entidades culturais e lingüísticas do país para lles facer chegar o seu informe e impulsar dunha vez o cumprimento do PXNLG.

O informe da Mesa, presentado a semana pasada (e ao que se pode acceder nesta ligazón), analiza a situación actual da lingua galega en relación ao nivel de cumprimento dos obxectivos e medidas contemplados no PXNLG e na actitude que mantén a actual Xunta de Galiza aos respecto. Nesta avaliación e grazas ao que a entidade tivo oportunidade de constatar nestes anos polas denuncias e queixas que lle chegan cada día, a asociación en defensa da lingua galega concluía que “o nivel de incumpriento dos obxectivos e medidas do Plan Xeral é escandaloso”.

Neste sentido, A Mesa pola Normalización Lingüística destacaba a necesidade de “retornar ao consenso de 2004 por parte de quen o rompeu, o Partido Popular e o Presidente da Xunta, que ten a obriga de aplicar o PXNL”, así como dun “compromiso explícito e efectivo co PXNLG por parte do goberno e actuacións lexislativas que desenvolvan o contemplado nas medidas acordadas neste” e reclamaba a derrogación de “todas as disposicións legais contrarias ao PXNLG, nomeadamente as relacionadas co ensino e coa admisnitración”. 

Con este obxectivo, A Mesa fará chegar a súa análise tanto ao presidente da Xunta e ao Secretario Xeral de Política Lingüística como ao resto de grupos políticos representados no Parlamento de Galiza, ás principais institucións culturais e lingüísticas do país, como a RAG e o Consello da Cultura Galega, e as principais asociacións, sindicatos e entidades involucradas na promoción do galego.

“O goberno de Feixó dedicouse nestes cinco anos a desmantelar un por un os acordos en torno á lingua”, sinalou Maceira, “incumprindo a súa palabra de deputado, ignorando a lei e facendo ouvidos xordos aos mandatos parlamentares”.  

Marcos Maceira: “O informe  que presentamos a pasada semana evidencia que a política lingüística levada a termo polo Goberno de Feixó nestes últimos cinco anos non só non aplicou as medidas acordadas no Plan Xeral, senón que en moitos casos lexislou en sentido contrario, e para imposibilitar na práctica a consecución dos obxectivos marcados, como demostra de xeito paradigmáticos o caso do ensino e o decretazo contra o galego, que supuxo unha involución sen precedentes”. “As consecuencias do incumprimento e da renuncia á palabra dada en forma de acordo unánime no Parlamento están á vista: retroceso sen precedentes no número de falantes, desaparición da lingua galega da Educación Infantil das cidades, vulneración de dereitos lingüísticos e cidadáns en inferioridade de condicións das persoas galegofalantes no seu propio territorio, por non falar da imposibilidade de ver un filme en galego nunha sala comercial ou de ter a opción ao galego en productos audiovisuais...”

Para A Mesa, o Partido Popular e o actual presidente teñen que “demostrar que o acontecido o 22 de setembro de 2004 non foi unha fraude”, e que teñen capacidade de rectificar, xa que “ao non aplicar o PXNL ou actuar en sentido contrario das medidas que estabelece está a causar graves prexuízos á lingua e á cidadanía galega, que fale ou non galego quere que o noso principal sinal de identidade continúe vivo” afirman desde a entidade cidadá.

Desde asociación en defensa da lingua defenderon a necesidade de retomar o consenso en torno á promoción da lingua, e lembráronlle a Feixó as palabras coas que Manuel Fraga introducía o Plan Xeral:

“O galego, lingua propia de Galicia como establecen a Constitución e mailo Estatuto, non pode ser utilizado como un instrumento político nin como arma partidaria. A nosa fala constitúe o cerne central da nosa identidade, o alento e alma do pobo galego, e como tal, debemos traballar todos moi unidos e na mesma dirección. A defensa do galego é algo moi serio e debe levarse a cabo sen falsidades nin demagoxias baratas.”. 

As webs en galego e as marcas xa poden pedir o seu .gal

Os dominios .gal pódense solicitar dende este martes dentro dunha nova fase de lanzamento deseñada para grupos con dereitos preferentes, coma por exemplo as entidades que promoven o galego, administracións públicas, propietarios de marcas, etc. A Asociación puntoGAL presentou onte ao mediodía as súas características e prezos base na sede da Real Academia Galega (RAG) na Coruña.
Cinco categorías de prioridades no Abrente
A fase de lanzamento está formada pola posta en marcha dos programas Abrente e Carreira. Dentro do Abrente pódense solicitar dominios en cinco categorías:
1.- Marcas validadas na Trademark Clearing House (TMCH), unha base de datos de marcas internacionais establecida por ICANN, o organismo que goberna as direccións da Internet.
2.- Marcas do TMCH que non cumpren cos requisitos para usar un .gal, pero queren asegurarse de que a súa marca non sexa rexistrada, aínda que non activen inicialmente a súa páxina baixo os requirimentos de dominio .gal.
3.- Administracións públicas de calquera ámbito con competencia en Galicia e entidades de promoción da cultura e da lingua galegas. Institucións e entidades (consorcios, axencias, comisións, fundacións, asociacións, etc.) poderán solicitar, entre outros, nomes xeográficos con relevancia, os propios nomes das entidades, o dos seus servizos en liña e as súas marcas rexistradas.
4.- Marcas rexistradas a calquera nivel con validez en Galicia. Tamén as denominacións de orixe rexistradas.
5.- Calquera que  tivese ata agora unha web, un portal web, etc., e veña promovendo a cultura galega e utilizando a lingua galega nas súas comunicacións en liña baixo outro dominio pode solicitar o seu propio nome ou o nome dos dominios rexistrados e usados.

O prazo de todas as categorías do Abrente remata o 18 de novembro, salvo a categoría 3, que remata o 25 de novembro. No caso de se presentaren varias peticións para o mesmo dominio, terá preferencia o solicitante pertencente a unha categoría superior, tal e como obrigan as normas da ICANN.
Máis barato para os que xa apoian o galego
Os prezos base varían segundo a categoría. A Asociación puntoGAL salienta que fixo un esforzo para que poidan gozar dun prezo menor aqueles que promocionan a cultura galega e xa apoian o idioma empregando o galego na rede, e as institucións e entidades que teñen un papel na súa promoción.
Por iso as categorías 3 e 5 partirán dun prezo base aproximado de 50 euros por dominio por ano. Seguindo a mesma lóxica, no Abrente o prezo base máis alto, 170 euros, é para a categoría 2, as marcas que queren defender o seu dominio pero que non van contribuír á promoción do galego na Rede usando o .gal . As categorías 1 e 4 teñen un prezo intermedio, 65 euros.
Con todo, o prezo final para o consumidor non o fixa puntoGAL, senón os rexistradores acreditados por ICANN que apostaron por traballar co .gal. Os prezos citados aquí son polo tanto prezos base e aproximados, e cada rexistrador pode realizar libremente ofertas diferentes.
Máis información en Galicia Confidencial e en Praza Pública.

Os Erasmus sofren un 23% menos de paro que o resto de mozos europeos en primeiros anos tras os estudos

O 40% dos antigos Erasmus mudáronse a un país distinto ao seu tras graduarse.

Os europeos que gozaron dunha bolsa Erasmus durante a súa formación académica sofren unha taxa de desemprego un 23% menor que o resto de mozos europeos nos cinco anos seguintes á súa graduación e, mesmo, o risco de desemprego de longa duración se reduce á metade se se cursou parte dos estudos noutro Estado membro grazas a esta axuda europea, segundo un informe dado a coñecer este luns pola Comisión Europea.

O feito de que, ademais, un 40% dos europeos que foron subvencionados co programa Erasmus dende que se creou en 1987 se instalaron nun país distinto ao seu nos anos que seguiron á súa graduación, de acordo aos datos do informe que trata de subliñar como este modelo europeo potencia a mobilidade profesional dos mozos na UE.
A comisaria de Educación, Cultura, Multilingüismo e Xuventude, Androulla Vassiliou, celebrou a publicación do informe porque "por primeira vez hai probas" das bondades do programa Erasmus e das mellores perspectivas de futuro que ofrece aos europeos que se acollen a el.
"A mensaxe é clara: Se estudas ou te formas no estranxeiro, tes máis probabilidades de mellorar as túas opcións de encontrar un emprego", asegurou a comisaria, tras recordar as cifras "Inaceptables" de paro xuvenil na Unión Europea.
O estudo sobre o impacto do programa Erasmus, no que participaron case 80.000 persoas entre subvencionados e empresarios, indica tamén que un terzo dos estudantes que se acolleron a esta bolsa para realizar bolsas no estranxeiro recibiron despois unha oferta de emprego da empresa na que traballaron.
Ademais, crece o espírito emprendedor dos que participan no programa Erasmus, xa que, segundo o informe, un de cada dez dos que regresan ao seu país o fan para crear o seu propio negocio.
Do lado do empresario, a percepción dos candidatos aos que empregar tamén mellora se no seu currículo indican que gozaron unha bolsa Erasmus. O 64% dos empresarios consultados para este estudo aseguran que a experiencia internacional é "moi importante" e que asignan unha maior responsabilidade na empresa a quen conta coa devandita experiencia.
Na presentación do informe, a comisaria tamén prometeu que o novo marco Erasmus para o período 2014-2020 dará apoio a catro millóns de persoas, con disposicións especiais para asegurar "máis recursos" aos colectivos que máis o necesitas, como estudantes sen recursos ou discapacitados, se ben afeou aos Estados membros os límites presupostarios que impoñen a esta iniciativa.
O estudo tivo en conta outros factores da experiencia vital dos antigos alumnos Erasmus e apunta que un 33% ten unha parella estable de nacionalidade diferente á propia, máis do dobre da media dos que non cursan parte dos seus estudos no estranxeiro (13%). Un 27%, ademais, coñeceu a súa parella durante o seu ano Erasmus, co que Bruxelas estima que dende 1987 naceron preto dun millón de nenos froito de relacións Erasmus.

Estudantes de todo o mundo poderán gozar de Office 365 de balde

Microsoft continúa a achegar o seu software ofimático a estudantes de todo o mundo, e tras lanzar para numerosas institucións educativas un programa para que alumnos e profesores poidan gozar de Office 365 ProPlus ou Office Professional Plus sen custo, agora anuncia unha evolución deste programa Student Advantage, de xeito que ofrecerán Office 365 de balde para estudantes de a partires de 13 anos que gocen cun enderezo de correo electrónico da súa institución educativa.
Os alumnos que opten por esta promoción que chega hoxe a EE.UU. e que ao longo do ano espallarase polo resto do mundo poderán gozar das últimas versión das aplicacións Word, Excel, PowerPoint, OneNote, Outlook, Access e Publisher, que poderán instalar en até 5 equipos informático, podendo gozar tamén destas ferramentas en dispositivos móbiles (incluíndo tablets con Windows e o iPad), contarán con 1 Tb de almacenamento en liña en OneDrive e tamén poderán facer uso de Office Online.
Esta oferta estará dispoñible para todas as institucións educativas que adquirisen a versión corporativa de Office para os seus traballadores a través do programa de licenzas por volume de Microsoft.

FP Básica: Unha solución que é un problema

Co novo curso e ao abeiro da LOMCE nace a Formación Profesional Básica, unha oferta formativa presentada como unha alternativa para completar a formación obrigatoria. Está dirixida a alumnos e alumnas de entre 15 e 17 anos que cursaran 3º de ESO ou, excepcionalmente, o 2º curso, e componse de dous cursos obrigatorios. Aqueles e aquelas que superen a FP Básica acadarán un título que dará acceso directo aos ciclos formativos de grao medio. A FP Básica vén substituír na práctica os Programas de Cualificación Profesional Inicial (PCPI), compostos tamén de dous cursos (pero só un obrigatorio) e que non daba dereito a unha certificación acreditativa.
O pasado ano ao redor de 46 mil persoas cursaron estudos de formación profesional en Galicia (22 mil nos ciclos medios e 24 mil nos ciclos superiores), unha cifra superior á dos que se matricularon en Bacharelato (39 mil). Pola súa banda, case cinco mil ingresaron nos Programas de cualificación profesional inicial. Nas tres universidades galegas, pola súa banda, matriculáronse ao redor de 60 mil alumnos e alumnas.
Os sindicatos amósanse moi críticos coa medida, tanto pola forma en que foi aprobada, a escaseza dos recursos existentes para a súa implantación, pola limitación da oferta e, de forma xeral, polo carácter da reforma, que -denuncian- busca sobre todo maquillar as cifras de abandono escolar, e a elevada porcentaxe de alumnos e alumnas que non completa a formación obrigatoria. Aínda que a taxa de abandono educativo temperán se foi reducindo nos últimos anos en Galicia (pasou do 29,3% no ano 2000 até o 19% este ano), aínda presenta porcentaxes que case duplican o obxectivo do 10% fixado pola UE como límite máximo que se debería acadar no 2020.

José Manuel Cabezudo (STEG): "Este aspecto da LOMCE, como tantos outros céntrase sobre todo en maquillar as estatísticas"

Iso si, dende o STEG, José Manuel Cabezudo salienta que esta evolución positiva nos últimos anos se debeu, sobre todo, ao regreso aos estudos -forzado pola crise- dun gran número de rapaces e rapazas que antes estaban ocupados na construción ou no sector turístico. "Este aspecto da LOMCE, como tantos outros céntrase sobre todo en maquillar as estatísticas: os datos de abandono temperán van mellorar, dende logo, estes alumnos van ter un título, pero non van ter mellor formación", conclúe. Anxo Louzao, de CIG-Ensino, incide na mesma idea: "o obxectivo é que estes alumnos e alumnas consigan un título para maquillar as estatísticas oficiais".
Ademais, a limitada implantación da FP Básica, unida á supresión de unidades de PCPI vai facer, segundo STEG, que desapareza a única oferta coa que se contaba para que o alumnado en risco de exclusión -máis de 2.000 alumnas/os afectados - non ficase abandonado". "A LOMCE comeza así a realizar o labor para o que foi deseñada: lexitimar as desigualdades sociais", engade o sindicato. De igual xeito, a CIG salienta que "a Formación Profesional Básica só se implanta en 87 concellos e case unha cuarta parte non terán nin FP Básica nin PCPI". A este respecto, CC.OO. denuncia que "a Consellaría de Educación presume de promover a FP, pero o certo é que a oferta para este curso diminuíu en 520 prazas".

En total, o número de centros que ofrecen esta formación (antes PCPIs, agora FB Básica), fica reducido á metade en Galicia, pasando de 301 a 147

En total, o número de centros que ofrecen esta formación (antes PCPIs, agora FB Básica), fica reducido á metade en Galicia, pasando de 301 a 147. José Manuel Cabezudo (STEG) salienta que é a zona rural a máis afectada por este recorte: "se vives no rural e polo motivo que sexa non es quen de seguir o ritmo do ensino obrigatorio, pode que nin sequera teñas a opción de ingresar nestas alternativas, ficas excluído". "Nas cidades, se non tes oferta do ciclo que queres nun centro, case sempre a tes nun centro próximo, pero no rural non é así”, destaca tamén Luz López (CC.OO.), que engade que “por moito que nos queiran vender que melloran a oferta e a calidade, non hai máis que ler polo miúdo os datos”.

	Centros con PCPIs 2013-14	Centros que ofrecen FP Básica 2014-15
A Coruña	115	53
Lugo	47	20
Ourense	34	20
Pontevedra	104	45
Galicia	301	147

Para Anxo Louzao, de CIG-Ensino, "buscase desviar a estes estudos alumnado desmotivado ou alumnado con necesidades específicas" e, en consecuencia, polo que "a FP Básica pon en tea de xuízo a igualdade de oportunidades. "Está pensada para expulsar do sistema educativo unha parte do alumnado, que moitas veces é precisamente o alumnado que menos recursos e medios ten", engade.

Un prexuízo para o conxunto da formación profesional

Anxo Louzao (CIG): "Está pensada para expulsar do sistema educativo unha parte do alumnado, que moitas veces é precisamente o alumnado que menos recursos e medios ten"

Para os tres sindicatos, ademais, a FP Básica pode prexudicar o conxunto das ensinanzas profesionais, tanto no que respecta ao funcionamento dos centros coma no que atinxe á súa consideración social, despois dun periodo no que a FP gañara prestixio e calidade, e volvendo á situación existente décadas atrás. “Hai anos a FP era un saco onde cabía todo. Todos os que non valían para o bacharelato, para COU, eran desviados para a formación profesional. Era unha FP bastante devaluada, era coma a irmá pobre do ensino. Iso cambiou por completo, chegamos a ter unha FP de calidade, onde os rapaces e rapazas saían ben preparados", destaca Luz López (CC.OO.). "A FP foi deostada no seu momento, pero conseguiuse revalorizala", destaca José Manuel Cabezudo (STEG), que alerta que, de novo, a formación profesional volve a esa función de "recoller aquel alumnado que non vale para outro tipo de formación".

Luz López (CCOO): "Esta medida vai volver desprestixiar a FP, parece que queren que volva ser a irmá pobre do ensino"

Luz López explica que "en España hai máis alumnado e traballadores universitarios, a pesar de que o mercado de traballo demanda persoas con outro tipo de formación. Mentres, en Alemaña, o groso da poboación son graduados superiores ou graduados medios". Explica que "estase cometendo o erro de, en vez de revalorizar tanto social como economicamente a formación profesional, enviar á FP un conxunto de alumnos e alumnas que non teñen unha motivación real para cursar estas ensinanzas". A representante de CCOO-Ensino conclúe que "a FP Básica vai ser un problema para a formación profesional. Antes chegaba alumnado que xa non tiña que ter materias comúns, agora os centros si que teñen que ofertar contidos de matemáticas, lingua, etcétera. Esta medida vai volver desprestixiar a FP, parece que queren que volva ser a irmá pobre do ensino".

Para Louzao, "escóitase ao Goberno dicir, de forma propagandística, que hai que dirixir o alumnado cara á FP. Pero a realidade é que máis de 4000 rapaces e rapazas que por falta de prazas non poden cursar o ciclo formativo que escolleran"

Para Anxo Louzao, "escóitase ao Goberno dicir, de forma propagandística, que hai que dirixir o alumnado cara á formación profesional. Pero hai que dicir que a realidade é que máis de 4.000 rapaces e rapazas que por falta de prazas non poden cursar o ciclo formativo que escolleran. Ten que haber recursos suficientes, facilitando o acceso a bolsas de estudo que lle permitan ao alumnado acceder a ciclos que están lonxe da súa residencia". Louzao lembra tamén que a Xunta "desvía máis de 12 millóns de euros para financiar o ensino privado e concertado na formación profesional", unha privatización na que tamén se incide a través "do fomento da FP Dual". Para Louzao, "é necesario un novo deseño do mapa da FP en Galiza, que partindo do desenvolvemento estratéxico do país e das características no noso sistema industrial e produtivo, se ordene a formación profesional". 

Aprobación acelerada e sen consenso

Para o STEG, neste caso seguiuse o mesmo patrón que con outros aspectos da LOMCE: medidas aprobadas sen diálogo coa comunidade educativa, sen consenso e de xeito acelerado

Outro aspecto moi criticado é o proceso seguido para a aprobación e posta en marcha da FP Básica en Galicia. CCOO-Ensino denuncia "o desprezo co que a Consellaría segue a tratar aos axentes sociais" por publicar a oferta de ensinanzas de Formación Profesional Básica "sen ter pasado polos órganos correspondentes, nin polo Consello Galego de Formación Profesional nin pola Mesa Sectorial". O sindicato critica que a publicación desta oferta se fixo "practicamente iniciado o mes de agosto cando os centros afectados están sen actividade e parécenos inadmisible que non se abrira a negociación da implantación dunhas ensinanzas que suporán unha modificación notable da rede de centros". Anxo Louzao enmarca este proceso na aplicación "insólita e trapalleira" da LOMCE en Galicia, ao aprobar a Consellaría en agosto, vía DOG, unha orde que fixaba os currículos de Primaria cando estaba sen aprobar o decreto, norma de rango superior, que tiñan que regulalos.  Para o STEG, neste caso seguiuse o mesmo patrón que con outros aspectos da LOMCE: medidas aprobadas sen diálogo coa comunidade educativa, sen consenso e de xeito acelerado.

O BNG responsabiliza a Feijóo de non cumprir ningunha das 445 medidas do Plan de Normalización Lingüística

Os nacionalistas emprazan o presidente galego a que cumpra co PXNL, ‘’unha lei aprobada por unanimidade neste Parlamento’’ e que o goberno galego “desprecia”.

O BNG emprazou o goberno galego nesta segunda feira a cumprir co Plan Xeral de Normalización Lingüística, un plano aprobado hai hoxe dez anos por unanimidade no Parlamento. “Aquilo foi froito a capacidade de consenso de todas as forzas políticas en torno a un plan de mínimos para o noso idioma”, lembrou o portavoz nacionalista Xavier Vence. Un consenso, proseguiu, que foi “dinamitado” coa chegada o poder de Núñez Feijóo e o seu goberno. Desde entón, mantén, “asistimos a un cumprimento xeralizado do PXNL, non se cumpriu ningunha das 445 medidas”.
A deputada nacionalista Ana Pontón lamentou que esta década de PXNL non fose o de aplicación das súas propostas, senón que o goberno de Feijóo impulsou neste tempo o que cualificou de “demolición de calquera política de promoción do galego”. A realidade actual é que, aponta a parlamentar, “en Galiza é imposíbel vivir no idioma propio do país”. Unha situación que se percebe no día a día do ensino, xustiza, mundo económico, inmensa maioría dos medios de comunicación... “E temos un presidente e un goberno empeñados en impulsar a substitución lingüística do galego”.
445 preguntas
O BNG vai presentar no Pleno unha moción para pedir o cumprimento do Plan Xeral e para instar o goberno galego a que responda polo seu incumprimento. “Imos presentar unha pregunta por cada unha das 445 medidas que contemplaba o PXNL, para así obrigarlles a responder”.
Xavier Vence mostrou a súa sorpresa polo feito de que un presidente (Feijóo) que exixe respectar á legalidade a outros mandatarios de autonomías, “mentres, incumpre unha lei do seu propio Parlamento, aprobada por unanimidade”. Para o portavoz do BNG, ese comportamento amosa que para Feijóo “só hai que cumprir as leis do goberno central, non as do Parlamento galego”.
Tesoirada do 70% nos orzamentos para idioma propio
O “desprezo” que o actual executivo galego mostra para o galego atópase en diferentes eidos, sostén o BNG. Un exemplo é a tesoirada que Núñez Feijóo fai nos orzamentos adicados ao idioma propio: “Era de 23,6 millóns de euros en 2007 e para este ano só 7 millóns” expón o portavoz nacional. Un recorte que ataca o galego e “asfixia a sectores económicos chave no país” e relacionados coa cultura, entre outros.
“Conversamos coa cidadanía rebelde que quere reconstruír este país”
A preguntas dos xornalistas sobre as declaracións de Yolanda Díaz (vice-portavoz AGE, pronunciándose nunha entrevista pola unidade de AGE, BNG e Podemos cara ás municipais) Vence afirmou que o Bloque está nun “proceso de diálogo coa cidadanía, non con siglas”. Xavier Vence sostén que as asembleas abertas que o BNG impulsa “por todo o país” son conversas coa cidadanía “rebelde que quere reconstruír o país”. É un proceso de socialización do nacionalismo “coa base social contestataria”. “De aí sairán candidaturas con visión de país, máis alá de cantonalismos e localismos”.

O PSOE critica o PP por "o retroceso educativo" e por "xogar cos dereitos das mulleres como moeda de cambio"

Heredia lamenta que as bolsas se convertesen en "un instrumento para o clasismo".

O PSOE criticou este venres as políticas de educación e de saúde sexual e reprodutiva impulsadas polo Goberno de Mariano Rajoy, que contribúen ao "aumento da desigualdade económica e de dereitos en España". Así, denunciou "o importante retroceso educativo" en materia de bolsas e do persoal das universidades e advertiulle tamén de que "cos dereitos e liberdades das mulleres non se xoga como moeda de cambio electoral".

Así expresouno este venres o secretario xeral do Grupo Socialista no Congreso dos Deputados e líder do PSOE en Málaga, Miguel Ángel Heredia, quen compareceu en rolda de prensa xunto coa vicesecretaria provincial da formación e senadora, Pilar Montañés.
En materia educativa, Heredia incidiu no "retroceso" levado a cabo polo PP a través de "a conversión das bolsas nun sistema de disuasión académica; agora son un instrumento para o clasismo e para manter o control de acceso a determinadas profesións".
"Laminaron todas as axudas, cargáronse todas as bolsas que non son xerais ou reducíronas á mínima expresión", alertou o dirixente socialista, quen riscou de "incomprensible" esta política do PP.
Tamén advertiu do feito de que "se pretenda converter as bolsas en préstamos". "A educación é un luxo e un privilexio que perpetúa o modelo social, segundo a formulación do PP, que incrementa a desigualdade e afonda na brecha social", indicou.
Durante a súa intervención, recordou que no primeiro curso co Goberno de Rajoy se recortou en 2.000 o número de bolseiros na provincia de Málaga, o que representa un 10 por cento do total a nivel nacional, e en Andalucía, en 10.000. "Unha mostra máis do descarado sectarismo do PP cara á nosa terra", lamentou.
Máis aínda, Heredia dixo que o diñeiro que o Ministerio de Educación, Cultura e Deporte destina ás axudas ao estudo en todos os niveis --dende Infantil á Universidade-- caeu nun 16 por cento nos dous últimos cursos.

Pasouse de 1.748 millóns de euros no curso 2011-2012 aos 1.472 millóns no correspondente a 2013-2014, apuntou Heredia, quen criticou que en só tres anos "o PP dilapidase a equidade no sistema educativo".
Fixo especial referencia ao cambio dos criterios para solicitar bolsas nos departamentos universitarios, o que "impediu aos alumnos andaluces optar a elas", e insistiu na súa petición ao Ministerio de Educación de que dea explicacións ao respecto. "A Comunidade máis prexudicada volve ser Andalucía; o PP non fai as cousas por ocorrencia, senón deseñándoo moi ben", sentenciou.
Respecto ao persoal, o socialista sinalou que entre xaneiro de 2012 e o mesmo mes de 2014 houbo unha redución de 30.338 efectivos. No caso da Universidade de Málaga (UMA), o número de docentes baixou en dous anos en 62 persoas e en 120 tendo en conta a toda o equipo que traballa nesta entidade académica.

ABORTO

Pola súa banda, a senadora polo PSOE de Málaga denunciou que "dende que chegou ao Goberno o Partido Popular atacase e ameazou o dereito das mulleres a decidir coa reforma da lei do aborto".
En referencia expresa á reforma impulsada polo ministro de Xustiza, Alberto Ruiz-Gallardón, preguntouse "onde están os dereitos das mulleres neste anteproxecto", polo que esixiu de novo que "se retire inmediatamente". "É un ataque puro e duro aos dereitos e liberdades das mulleres e, polo tanto, á democracia", apostilou.
Neste punto, a vicesecretaria xeral do PSOE malagueño riscou de "indigna" a actitude do ministro, "vinculando o seu futuro político á vida das mulleres, ao seu dereito a decidir e ás súas liberdades".
Para os socialistas, "os dereitos das mulleres son a nosa prioridade e seguiremos loitando para non quedar fóra de Europa e non nos equiparar a países de América Latina, xerando inseguridade xurídica para as mulleres e para os profesionais,". Algo que, non obstante, si asegura a actual lei, segundo Serrano, así como a educación sexual e reprodutiva.
Como datos, Serrano apuntou que neste último ano se produciron 120.000 interrupcións voluntarias do embarazo, das que 4.000 foron de menores de idade, polo que "se se aplicase a reforma de Ruiz-Gallardón, só sería legal un oito por cento". En consecuencia, "o 92 por cento restante das mulleres veríanse abocadas a interrompelo de xeito inseguro e clandestino".

Catro centros educativos galegos reciben Premios Nacionais de Educación

Desenvolvemento de competencias audiovisuais, uso de tecnoloxía, personalización da aprendizaxe ou impulso da creatividade son algunhas das modalidades nas que se impuxeron os centros escolares galegos a outros centros de todo o Estado.

A educación pública está no seu peor momento con recortes en materiais, comedores e profesores e, aínda así, os centros educativos galegos seguen estando a vangarda do Estado en moitas competencias. Unha situación na que ten que ver, e moito, a implicación de profesores, pais e alumnos.

 

Por iso, non estraña que ente a máis de ducia de galardóns entregados nos Premios Nacionais de Educación no ensino non universitario para o ano 2013, que entrega o Goberno español, haxa catro centros do país en modalidades tan diferentes como o Desenvolvemento de competencias audiovisuais, uso de tecnoloxía, personalización da aprendizaxe ou impulso da creatividade.

 

A finalidade destes premios é o recoñecemento ao labor e traxectoria educativa así como aos proxectos educativos que contribúen á mellora da calidade da educación distinguindo as seguintes categorías, diferenciadas en función dos destinatarios destes premios: centros docentes, carreira académica de investigación e innovación educativa, entidades para a promoción educativa e equipos docentes.

 

Así, nos Premios Nacionales al Desarrollo de Competencias de Lectoescritura y Audiovisuales foi premiado na Modalidad A o CEIP Frian-Teis, de Vigo, co proxecto “A lingua sabe a pan”. Nos de Uso de Tecnologías Aplicadas a la Educación, na Modalidad B o galardón foi para o I.E.S. de Ames co proxecto “Os petroglifos de Ames”.

 

Tamén os equipos de docentes foron evaluados e dous galegos obtiveron premio. Foron o do I.E.S. Sánchez Cantón, de Pontevedra, que foi Premio para el uso de las TIC como apoyo a la personalización del aprendizaje en educación secundaria co proxecto “m-TIC. Programando aplicaciones con APP INVENTOR”.

 

Finalmente, o Premio para el uso de las TIC como apoyo al desarrollo de la creatividad y el emprendimiento de los alumnos en educación secundaria recaeu no proxecto “Productores de cine”, presentado por un equipo docente do colexio Internacional SEK Atlántico de Poio.

Dez anos de agonía lingüística

Cúmprese o 10º aniversario da aprobación no parlamento galego do Plan Xeral de Normalización da Lingua Galega. Este documento constituíu un fito importante, pois era a primeira vez que se puña en marcha un plan integral de normalización do galego ante a perda xeral de falantes e o alarmante descenso do seu uso na mocidade urbana. Con tal motivo, ProLingua, plataforma a prol da defensa e promoción da lingua galega, fai un chamamento para conmemorar esta efeméride con sentido crítico e reivindicativo. Este o artigo que, con tal fin, remite Marcelino Fernández Mallo.

Acaba de ocorrerme hai uns minutos, hoxe mércores, 18 de setembro de 2014 na cidade da Coruña. A tres días do décimo aniversario do Plan de Normalización Lingüística. 

 

Subo no ascensor cunha moza, estudante supoño, duns vinte anos. Pregúntolle se alugaron elas o apartamento fronte ó noso. Responde: como? Repítollo en castelán. Pregúntolle entón polo curso que está a facer. Volve responder: como? Repítollo en castelán e consulto a súa procedencia. Contesta que é galega pero que, ao ninguén falarlle nunca en galego e non ver ela a TVG, pois que ten problemas para entendelo. 

 

Alguén podería afirmar que o anterior resulta un exemplo atípico, que a mocidade de Galicia en xeral coñece a lingua do País. Quizais. Máis alá das individualidades, o caso reflite dúas realidades: ninguén lles fala en galego ós mozos e menos aínda utilizan a lingua autóctona entre eles. 

 

Se entre a xente nova o idioma de Galicia amosa unha presenza testemuñal, no mundo adulto o seu retroceso, ou falla de recuperación, confírmase na maioría das esferas ou manifestacións sociais: nos medios de comunicación (xornais, emisoras de radio, canles de TV), nas actividades de lecer, nas relacións veciñais, nos ámbitos empresarial e profesional (malia os bravos intentos dalgúns), nas finanzas, nos servizos, na xustiza, na sanidade, no eido universitario, no ensino infantil e incluso na educación obrigatoria e no bacharelato. Un exemplo paradigmático: a situación de marxinalidade e emerxencia da literatura galega. 

 

Houbo un momento en que a cousa ofrecía unha fasquía ben distinta, un tempo no cal o conxunto da cidadanía puxaba a prol da reanimación do elemento principal da nosa idiosincrasia. Recoñecíase a necesidade esencial de protexer e abrazar unha lingua que nos identificaba ante o mundo, nin máis nin menos, un feito diferencial básico que catapulta os nosos valores como colectivo. 

 

O Parlamento daquela fíxose eco deste sentir e tomou como propia a misión de inserir o idioma propio nos mecanismos de comunicación dunha sociedade afeita, ás veces mesmo resignada, ao desprezo institucional cara ao seu código autóctono de expresión. Os galegos non eramos menos ca ninguén e así pois a nosa lingua tampouco non era menos ca ningunha outra. 

 

O 21 de setembro de 2004 estaba destinada a converterse nunha data histórica para a lingua galega. Tras séculos de persecución, penalización ou simple desleixo, as forzas políticas elixidas democraticamente sinalaban o abrente dun tempo novo. Dalgún xeito, o Parlamento propuña elevar a legal aquel lema “Entre nós, en galego” difundido anos atrás polo goberno galego (do Partido Popular, por certo). Aquel 21 de setembro de hai agora dez anos, as tres forzas con representación en San Caetano votaron conxuntamente o Plan de Normalización da Lingua Galega. 

 

O PXNLG foi elaborado con visión estratéxica, sentido de País, intelixencia e pragmatismo. Este documento exemplar recolle catrocentas corenta e cinco medidas dirixidas a favorecer o uso do idioma nos distintos ámbitos da sociedade. Concibido coa participación de máis dun cento de profesionais representativos de distintos eidos sociais, perseguía entre outros os obxectivos seguintes. 

 

Garantir a posibilidade de vivir en galego a quen así o desexase. 

 

Conseguir para a lingua galega máis funcións sociais e novos espazos de uso, priorizando a súa presenza en sectores estratéxicos. 

Introducir na sociedade a oferta positiva de atender o cidadán ou cliente en galego como norma de cortesía dun novo espírito de convivencia lingüística. 

Promover unha visión afable, moderna e útil da lingua galega.

 

Ademais do carácter executivo e específico do plan, apreciábase unha vocación de harmonía e entendemento así como unha vontade de actuar en positivo que non tardou tristemente en chimpar polos aires. E aquela data que nacía como sinal de esperanza foise esluíndo a medida que o documento perdía vixencia e se abandonaba no recanto máis afastado dos andeis administrativos. 

 

Os gobernos posteriores encargados de execución do Plan, ou ben amosaron escaso entusiasmo dadas as instrucións chegadas da meseta, ou ben careceron da sutileza necesaria para o seu impulso coa conveniente complicidade social. 

 

A Xunta actual vai aínda máis aló. Non so renega, mesmo en público, do Plan de Normalización senón que lexisla descaradamente na dirección contraria. O goberno Feijoo demostrou unha carraxe inaudita contra a lingua propia do País ata tal punto que as súas primeiras iniciativas, incumprindo ademais o propio Estatuto de Autonomía, se dirixiron a reducir a relevancia e presenza do galego na administración e a restrinxir dun xeito brutal o seu papel no ensino, ao tempo que dificultaba dende o principio os proxectos artellados en galego e as accións a prol da lingua. Esta postura, que parece máis propia dun goberno invasor que dun executivo autónomo, non ten parangón na historia contemporánea europea e foi criticado sen reservas por diversas institucións internacionais. 

 

Malia o lamentable que se revele a actuación do goberno galego actual, sería demasiado sinxelo culpalo ao 100% da situación da lingua. Deste devalo que semella imparable do idioma propio, somos todos responsables. Ou ben admitimos este feito ou ben nunca estaremos en condicións de dar a volta á dinámica nefasta dos últimos anos. 

 

Lembremos que o Partido Popular leva gañando cada elección que se celebra no País dende a democracia, un feito innegable que é preciso integrar na ecuación da lingua. A sociedade galega quere que o PP interveña no futuro do idioma propio, guste máis ou guste menos. Así pois, revélase unha condición sine qua non seducir ós dirixentes populares na positividade do apoio á lingua. Pode doer pero disto trata a democracia, de aceptar a posición cidadá e actuar nos marcos por ela definidos. 

 

Resulta imprescindible abandonar de vez a confrontación, mesmo habendo razóns para ela. A dialéctica bando a prol / bando en contra so provoca máis desafección e máis frialdade. O galego é a lingua de todos e a súa difusión na sociedade so pode traer beneficios ao país sen prexudicar a ninguén. Ese ha ser o espírito, o mesmo que inspirou o Plan de Normalización Lingüística de 2004.

“Faite Dixit@l” inicia a sua andaina nas aulas da Rede Cemit

‘Programación para dispositivos móbiles’, cunha duración de 30 horas en horario de mañá, e ‘Innovación Social’, polas tardes e durante 25 horas, son as dúas actividades coas que arrinca mañá, luns 22 de setembro, a iniciativa ‘Faite Dixit@l!’. Este itinerario de capacitación tecnolóxica, impulsado pola Axencia para a Modernización Tecnolóxica de Galicia (Amtega), en colaboración con Academia Postal e Fundetec, ofrece aos participantes ferramentas para favorecer a súa empregabilidade, potenciar o emprendemento en materia tecnolóxica e a adquisición de novas competencias dixitais.
Nestas dúas primeiras actividades inscribíronse 18 aulas da rede CeMIT, que ofertaron 125 prazas para a súa realización. As actividades serán seguidas polos usuarios a través de multivideoconferencia.
Nas dúas primeiras actuacións de ‘Faite Dixit@l!’, os usuarios inscritos poderán coñecer aspectos básicos e avanzados da programación e uso de dispositivos móbiles -smartphones, tabletas,…- na actividade de mañá, e os fundamentos para o deseño e execución de programas de innovación social no caso da de tarde. O bloque sobre Innovación Social é una das principais novidades do proxecto ‘Faite Dixit@l!’, co que se bisca facilitar a dinamización da actividade profesional dos axentes TIC e os colaboradores da rede CeMIT con formación adaptada ás súas necesidades.

ACTUVIDADES ATA DECEMBRO

O proxecto ‘Faite Dixit@l!’ contempla un calendario de actividades ata o mes de decembro, que abrangue bloques temáticos sobre ferramentas web 2.0, estratexias de márketing online e comercio electrónico, uso da identidade dixital e servizos electrónicos das administracións públicas. Ademais, está prevista a realización de dous seminarios de expertos, e dúas xornadas de exposición de casos de éxito e boas prácticas.
Para falar de Innovación Social coas TIC como base deseñouse un ‘PechaKucha’, un modelo de exposición con presentacións creativas de curta duración que propicien o diálogo e o intercambio de ideas. O seu desenvolvemento está previsto para mediados do próximo mes de outubro.

INSCRICIÓN GRATUITA

A participación é gratuíta, e a inscrición pode realizarse en calquera das aulas da rede CeMIT, onde tamén é posible solicitar máis información. ‘Faite Dixit@l!’ conta ademais con dúas canles en redes sociais para poder seguir o seu desenvolvemento: www.facebook.com/faitedixital e www.twitter.com/faitedixital (@faitedixital) Para estender as actividades de ‘Faite Dixit@l!’ alí onde non chega a rede CeMIT están a pecharse acordos de colaboración con entidades e colectivos tractores que permitirán o seu desenvolvemento de maneira presencial.
As seguintes actividades de ‘Faite Dixit@l!’ programadas serán a segunda quenda do módulo de capacitación sobre ‘Innovación Social’, con inicio previsto o día 1 de outubro, e a de ‘Configuración de dispositivos móbiles’, que dará comezo o 6 de outubro. Este día, ademais, iníciase o prazo para a presentación de traballos ao “Concurso ‘Faite Dixit@l!’ de aplicacións para dispositivos móbiles’”, que contempla un premio tecnolóxico para o gañador.

Os incumprimentos "máis alarmantes" do Plan Xeral de Normalización

O Plan Xeral de Normalización da Lingua Galega (PXNL) cumpre dez anos desde a súa aprobación por unanimidade no Parlamento galego. Fará unha década o vindeiro domingo cuns resultados tan pésimos como pouco esperanzadores. As máis de catrocentas medidas para favoreder e normalizar o idioma propio do país pretendía ser un pulo fundamental para espallar e prestixiar o uso do galego. Pouco se avanzou. A volta do PP, da man de Núñez Feijóo, á Xunta en 2009 rachou de vez co escaso camiño avanzado. O que para a maioría era a base sobre a que asentar a recuperación do galego para o propio Goberno é só "unha referencia".
A Mesa pola Normalización Linguística vén de presentar un amplo informe no que avalía o nivel de cumprimento dos obxectivos e medidas do PXNL. O seu incumprimento "é escandaloso" segundo un colectivo que solicita á Xunta "retornar ao consenso de 2004, un compromiso explícito e efetivo do PXNL por parte do Goberno, a posta en marcha inmediata das medidas contempladas no Plan, así como a derrogación de todas as disposicións legais contrarias a el". Ademais, lémbranlle que o Executivo "ten a obriga" de aplicar as medidas ás que se comprometeu xunto ao propio PP hai dez anos.

O informe detalla os numerosos incumprimentos e os "máis alarmantes" das medidas acordadas no PXNL

No seu extenso informe, A Mesa avalía os principais obxectivos marcados no PXNL e repara nos "incumprimentos máis alarmantes das medidas acordadas", así como os retrocesos e mesmo algunhas das "evidentes actuacións contra o Plan" levadas a cabo polo Goberno de Nuñez Feijóo. As consecuencias desta inacción son evidentes, tal e como destaca o documento: retroceso sen precedentes no número de falantes, desaparición da lingua galega da educación Infantil das cidades, exclusión do galego en ámbitos claves da sociedade, vulneración de dereitos lingüísticos e cidadáns e inferioridade de condicións das persoas galegofalantes no seu propio territorio. Ademais, multiplícanse os usuarios de servizos aos que lle negan atención por se expresaren na súa lingua, hai falta de programas informáticos que garantan o dereito a recibir documentación en galego, imposibilidade de ver un filme en galego nunha sala comercial ou de ter a opción ao galego en productos audiovisuais... Son só exemplos.

Administracións

Facendo un repaso polos incumprimentos das medidas acordadas en diversos ámbitos, o resultado é claro -por nulo- e moi indicativo. Nas administracións, por exemplo, a Xunta de Feijóo eliminou en 2009 a exixencia de que nas probas para o acceso á función pública, "cando menos unha fose escrita en galego, garantindo así o coñecemento da nosa lingua". Do mesmo xeito, non se estableceron mecanismos que garantisen un aumento efectivo da presenza do galego nas entidades receptoras de axudas públicas e constatáronse numerosos incumprimentos na utilización da forma galega dos topónimos como única válida e oficial.

Feijóo eliminou a exixencia de galego nas probas para o acceso á función pública

Na administración local,  a privatización de servizos e/ou a súa subcontratación provocou que moitos se deixasen de prestar en galego, ademais de constatarse a non aplicación do PXNL no relativo ás exixencias de garantías ás empresas concesionarias en materia lingüística á cidadanía. Ademais, moitos servizos de normalización lingüística foron precarizados ou desmantelados.
Na Administración de Xustiza, os programas informáticos de xestión e os formularios de uso cotián non existen en lingua galega malia estaren proporcionados pola Xunta. Nos tribunais, antes do inicio de calquera procedemento, "non se pregunta de oficio cal é a lingua habitual do cidadán para que esa sexa a lingua de toda a actuación, tanto oral coma documental", ao que se une a "evidente negativa" de gran parte dos membors do poder xudicial e da fiscalía a utilizar o galego que, ademais, "segue a non ser un requisito para exercer como xuíz, fiscal ou secretario xudicial".
Na Administración periférica do Estado, segundo denuncia A Mesa, "ignoráronse medidas como a de establecer como norma que todas as comunicacións da Administración central se fagan na lingua declarada como habitual". Ademais, seguen a existir "graves problemas" para dirixirse en galego a estas administracións estatais, ao igual que ocorre nas notaríans, onde as garantías para obter documentación na lingua propia "son mínimas".

Educación, familia e mocidade

No caso da educación, a familia e a mocidade, o Goberno do PP "non se limitou a incumprir o Plan, senón que mesmo lexislou para que sexa imposíbel cumprir os obxectivos que fixa, como 'alcanzar un uso maioritario do galego na docencia' ou 'fomentar o uso progresivo do galego desde a etapa preescolar".

No ensino, a Xunta derrogou o decreto que introducía algunhas das medidas do PXNL e impuxo outro que relega o galego ao mínimo

Así, no ensino derrogouse o decreto 124/2007 que introducía algunhas das medidas contempladas no PXNL sobre o galego no ensino como a oferta de preescolar en galego , e como mínimo de 50% de ensino en galego para todos os ciclos educativos obrigatorios, así como ciclos formativos e Bacharelato. Co novo decreto do plurilingüismo, limitouse a un máximo o número de materias a impartir en galego, prohibindo expresamente a impartición en galego de matemáticas en Primaria e de Matemáticas, Tecnoloxía, e Física e química en Secundaria.
Ademais, aspectos centrais deste decreto, como consultar os pais a lingua ou a posibilidade de que a lingua na aula fose diferente á da materia, foron declaradas ilegais polo TSXG, que tamén confirmara a "plena legalidade" do decreto 124/2007 derrogado. Por suposto, tampouco se levou a cabo ningunha campaña de sensibilización ante o uso do galego entre a comunidade educativa, senón que se "afortalaron os prexuízos". Do mesmo xeito, reduciuse o apoio institucional e o financiamento ás equipas de normalización e dinamización lingüística, "ás que se lle retirou mesmo a referencia á 'normalización' do nome".

As medidas da Xunta na educación "afortalaron os prexuízos" sobre o galego

Por outra banda, a avaliación da situación do galego no ensino é "inexistente, mais alá das proclamas propagandísticas da Consellería", mentres que as Galescolas, escolas de Infantil, cun proxecto educativo que contemplaba uns contidos mínimos en lingua galega, foron substituídas polas Galiñas azuis, ao tempo que se eliminaron os programas piloto de inmersión. "Como resultado o galego está excluído de gran parte das escolas infantís das cidades galegas", denuncia A Mesa.
En canto á formación de adultos, o conflito provocado polo despediemento do profesorado Celga, contratado en condicións precarias, "é unha mostra do desinterese da Xunta", ao igual que "a falta de medios básicos por parte do profesorado contratado". De atender á transmisión familiar, as campañas oreintados a potenciala débense a entidades sociais "sen que a Administración fixese nada". Ademais, desapareceu Preescolar na casa, hai unha ausencia absoluta de produtos audiovisuais dobrados ou subtitulados, apenas programas ou xogos informáticos en galego e cada vez menos oferta en lingua propia para os cativos nas televisións públicas.

Para a mocidade, non hai campañas de sensibilización, nin fomento da lingua nin acordos con televisións e radios locais para facer programas para rapaces en galegos, tal e como se prevía. O mesmo ocorre os xogos ou programas informáticos ou produtos audiovisuais, así como a dobraxe nos filmes.

Medios de comunicación e industrias culturais

Nada mellor, nin moito menos. A chegada do PP ao Goberno coincidiu co feche das principais cabeceiras impresas en galego, mentres "non se coñecen" xestións para recuperar Radio 4, nin negociacións con televisións locais e privadas para a emisión de filmes en galego, nin acordos para ir aumentando a presenza do galego nos diarios, nin para lograr o obxectivo marcado no PXNL de chegar en dez anos a un mínimo dun 30% ou para que se respecten as declaracións feitas na lingua propia. Nada do que se prometeu se cumpriu, mentres importantes medios seguen a cobrar subvencións polo teórico uso do idioma do país.

Nada do que se prometeu para os medios de comunicación se cumpriu, nin tan sequera un mínimo de galego nos xornais

Ademais, son "contadas" as empresas de telefonía móbil que ofrecen servizos en galego e desmantelouse o proxecto Mancomún para a tradución de software libre ao galego. As iniciativas en todos estes ámbitos nacen da sociedade civil.

Economía

Non só non houbo ningunha campaña para “fomentar nos consumidores o hábito de usaren e reclamaren a atención comercial en galego”, senón que desde a propia administración se chegaron a facer campañas mediáticas contra A Mesa precisamente por defender os consumidores e consumidoras que vían negado ese dereito.
Tampouco houbo campaña publicitaria ningunha para vincular produtos estrela co patrimonio lingüístico, nin se conto o respecto ou uso do galego como criterio na concesións de axudas públicas. No comercio, tampouco houbo bonificacións fiscais polo mesmo motivo, nin avance nos dereitos lingüísticos dos consumidores nin accións que favorecen a etiquetaxe na lingua propia. Na banca, por outra banda, séguense a constatar dificultades para obter formularios ou documentación en galego.

Sanidade

Na sanidade pública hai unha lexislación clara que defende os dereitos lingüísticos dos pacientes. Aínda así, "son moitas as trabas para que un paciente reciba atención sanitaria na súa lingua". A imposibilidade de recibir a documentación do consentimento do paciente para
as probas na lingua propia é un exemplo, pero tamén a falta de garantías para que che atendan no teu idioma, a ausencia de campañas de información sobre os dereitos lingüísticos ou programas informáticos do Sergas que dificultan o traballo en galego.

Na sanidade, segue sen haber garantías de que o paciente será atendido na súa lingua materna

Sociedade e proxección exterior da lingua

No ámbito social, os avances son tamén nulos: Non se percibe aumento real do uso do galego na liturxia malia existir unha política de
subvencións e exclúese o galego dos templos e celebracións. Tampouco se garante a competencia en galego dos traballadores dos servizos sociais nin hai políticas de integración de inmigrantes que teñan en conta o idioma propio. No deporte, o galego está ausente na maioría das federacións malia cobraren subvencións públicas, mentres que os produtos de lecer en galego non teñen unha oferta ampla. Ademais, a lingua galega é "excluída" das campañas turísticas.

En canto á proxección exterior da lingua, destaca o "incumprimento" da medida estrela neste apartado: a creación do Instituto de Lingua e de Cultura Galega Rosalía de Castro. Nada se sabe del, como de tantas outras cousas.

Implantación improvisada da LOMCE, reducións xeralizadas de profesorado, renovación dos concertos segregadores co OPUS...

Implantación improvisada da LOMCE, reducións xeralizadas de profesorado, renovación dos concertos segregadores co OPUS.

O comezo do curso 2014-2015 evidencia, máis que ningún outro, a magnitude dos recortes realizados nos últimos anos en educación. O efecto acumulado da constante redución de profesorado e de recursos económicos aos centros públicos deixa un balance durísimo de desaparición de unidades, agrupamentos, desdobres, PDCs… así como o seu corolario: o inexorable incremento da ratio de alumnado por aula. A inestabilidade dos cadros docentes fai cada vez máis difícil levar adiante un proxecto educativo de centro cunha mínima garantía de continuidade.

Ao deterioro da calidade da atención recibida polo alumnado, hai que engadirlle a precarización das condicións laborais: aumento de profesorado desprazado, suprimido, itinerante… Así, en especialidades como Pedagoxía Terapéutica e Audición e Linguaxe, nas que as itinerancias van camiño de ser a norma, é cada vez maior o número de especialistas que optan por concursar por Educación Primaria para evitar esta situación. Pero o exemplo paradigmático da precariedade laboral pola que opta a Consellaría é o aumento, novamente, das bolsas de interinidades. En só dous cursos, o profesorado interino ao que se lle adxudicou praza no CADP aumentou nun 121% no corpo de mestres (pasou de 547 a 1211) e nun 74% nos corpos de secundaria (pasouse de 1020 a 1781). Cómpre salientar que difícilmente pode o actual profesorado interino aspirar á estabilidade laboral ante as míseras ofertas de emprego público que realiza a Consellaría.

Porén, non todo son recortes en educación! Para o que sempre ten cartos este goberno - cuxas tesouras cebáronse xa nos libros de texto, nos comedores, nas escolas rurais, nos salarios do profesorado…- é para financiar os colexios que segregan ao alumnado por sexo, mesmo se fai falla, como fixo ver a sentenza do TSXG, saltándose a lei. O cinismo de Jesús Vázquez púxose novamente a proba: é quen de salientar a legalidade de renovar os concertos aos centros do OPUS agora que están amparados pola LOMCE, ao tempo que non asume ningunha responsabilidade política por mantelos ilegalmente a pesar das sentezas contrarias baseadas na LOE.

A Consellería de Educación, especialista en levar reveses nos tribunais, desouviu a fundada petición de STEG de suspender cautelarmente a resolución definitiva do Concurso Xeral de Traslados mentres a Xustiza non ditase a derradeira palabra nese preito e “tirou para adiante”, colocando o problema nunha situación de práctica irresolubilidade sen que se causen graves prexuízos. A crispación e o deterioro convivencial que, en moitos casos, xerou a polémica do CXT entre os traballadores e traballadoras do ensino semella servir moi ben os intereses dos que, nos altos despachos da Consellería, procuran un último amparo defensivo diante da súa nefasta xestión na socorrida táctica do “divide e vencerás”...

Entrementres, a última Orde de axudas para a adquisición de libros de texto elimina os materiais curriculares e o material didáctico e complementario, que tamén eran obxecto de axuda, nos anos anteriores. Xusto cando máis apreta a crise a algunhas familias, a Consellaría elimina dereitos ao alumnado economicamente máis desfavorecido. Desde o STEG preguntámonos que van facer as familias con nenas/os que presentan n.e.e. (parálise cerebral, síndrome de Down, etc.) coas axudas para “libros de texto”, se o que necesitan son axudas para material didáctico e complementario que agora desaparecen. Aos recortes realizados desde a Consellaría de educación, cómpre engadir os realizados polo ministerio: o propio ministro Wert recoñece unha diminución de 75 millóns de euros nas bolsas de estudo a respecto do curso anterior…

Coa implantación da LOMCE, nace a FP Básica, cunha regulamentación que chega tarde (a Orde de implantación é do 13 de Agosto e o Decreto é do 15 de setembro!!!), sen tempo para coñecela minimamente para comezar o curso. A eliminación dos PCPIs dos centros educativos de localidades afastadas das cidades ou das vilas máis grandes, vai facer que desapareza a única oferta coa que se contaba para que o alumnado en risco de exclusión - máis de 2.000 alumnas/os afectados - non ficase abandonado. A LOMCE comeza así a realizar o labor para o que foi deseñada: lexitimar as desigualdades sociais.

A improvisación na implantación da nova lei é evidente en todas as etapas educativas: nos cursos 1º, 3º e 5º da Educación Primaria, o decreto de currículo publicouse no DOG o día anterior ao comezo das clases (!!!). Isto dá a medida das présas coas que se quere implantar esta contrarreforma educativa (non fose que lles pasase o mesmo que coa LOCE...) obviando, como en toda a negociación da lei, aos colectivos directamente implicados na súa implantación (profesorado, equipos directivos, alumnado, nais/pais..). O caos neste comezo de curso está garantido: mantéñense, por exemplo, as persoas coordinadoras de ciclo a pesar de estaren os ciclos extinguidos e sen función ningunha, mentres se crean perfís para coordinar os cursos 1º, 3º e 5º sen puntuación polo traballo desenvolvido, coas súas funcións pouco definidas e sen unha circular xeral que regule a situación. Desde o STEG preguntámonos se este é o xeito que ten a Consellaría de educación de “propiciar unha renovación na práctica docente”, como sinala no preámbulo do decreto.

Neste comezo de curso, desde o STEG convidamos a todo o profesorado a traballar con todos os instrumentos democráticos á nosa man para subverter pacificamente a que, con razón, xa podemos considerar a peor lei educativa da historia recente: coidamos que é o noso dereito e o noso deber como docentes. Recoñecemos todo o esforzo mobilizador previo e o conseguinte desgaste xerado, mais entendemos que mentres non se derrogue o monstro pedagóxico da LOMCE temos que continuar as protestas, para que a mobilización realizada e todo o reivindicado até o de agora en defensa do ensino non caia en saco roto. Trátase de atoparmos espazos de incumprimento que diminúan todo o posible o impacto destrutivo da aplicación efectiva da LOMCE antes da súa desexada derrogación.

 

Educación rectifica e repoñerá as axudas a nenos con síndrome de Down

O conselleiro promete aos pais novas fórmulas para subvencionar o material escolar.

Marcha atrás na Xunta. Os nenos de Galicia con síndrome de Down que se quedaron fóra do programa de axudas escolares Gratuidade solidaria, co que se subvenciona a compra de libros para alumnos matriculados en centros de educación primaria, secundaria ou especial, poderán beneficiarse novamente de axudas públicas, tras o compromiso que Down Galicia conseguiu da Consellería de Educación.
Delmiro Prieto, o presidente Federación Galega de Institucións para esta síndrome, reuniuse o pasado mércores co conselleiro, Jesús Vázquez, tras denunciar que os rapaces con Down foron excluídos do cheque escolar ao limitar a súa finalidade exclusivamente a libros de texto. E é que boa parte do colectivo de estudantes con necesidades educativas especiais, por norma xeral, non emprega libros e si outros materiais estipulados polas súas adaptacións curriculares persoais. Ata agora, os pais que solicitaban a subvención podían empregar o diñeiro noutras ferramentas educativas.
O responsable de Down Galicia explica que o Goberno galego se comprometeu a eliminar un matiz que limitaba a entrega de 250 euros soamente a alumnos matriculados en centros de educación especial, que son menos dunha vintena en toda a comunidade. "Ante a imposibilidade de modificar a orde vixente polos prazos, acordamos que o curso que vén se entreguen os 250 euros tamén aos alumnos con Down ou necesidades educativas especiais que cursen estudos en aulas de colexios de Primaria ou Secundaria", explica. "Ese matiz é claramente discriminatorio", denuncian dende a federación.
Tamén pactaron estudar caso por caso para intentar cubrir as necesidades didácticas que xurdan durante este curso. Prieto asegura que "tras o balbordo que se organizou a semana pasada, agora hai vontade de arranxo". A orde que regula estas subvencións inclúe outra excepción para nenos que, cursando estudos en colexios ordinarios, teñan recoñecida unha minusvalidez igual ou superior ao 65%, da que tampouco se poderán beneficiar estudantes con Down porque, segundo a federación, á práctica totalidade dos pequenos con esta síndrome se lles concede unha porcentaxe do 33%.
Un voceiro da consellería matiza que a súa posición non cambiou xa que "coincide" co manifestado a este diario a semana pasada polo director xeral de Centros e Recursos Humanos, José Manuel Pinal, aínda que afirma que as dúas partes ao sentarse a falar entendéronse". Educación non confirma o que sucederá na convocatoria do próximo curso, pero insiste en que o que pidan este curso se lles dará. "Imos apoiar aos centros para que os nenos e nenas con necesidades educativas especiais teñan todo o que necesiten en función da súa adaptación curricular e ao que reclamen os profesores", engade Educación.
As queixas das asociacións de nais e pais de nenos con necesidades educativas especiais chegaron esta semana ata a raíña dona Letizia, á que entregaron unha carta durante o acto inaugural do curso escolar en Pereiro de Aguiar (Ourense). "Pedimos que interceda nesta situación inxusta que estamos a vivir xa que, a día de hoxe, co curso escolar xa iniciado, non recibimos ningunha resposta de Educación", concluía o escrito, no que recordaban que a escolarización do alumnado con dificultades da aprendizaxe debe rexerse polos principios de normalización e inclusión.
A pesar do acordo alcanzado, Down Galicia non cesará na súa loita contra o "camiño segregador" que marca a Lei Orgánica de Mellora da Calidade Educativa (Lomce) do Goberno de Mariano Rajoy. A consellería nega tallantemente que sexa un problema de exclusión derivado da nova lei, pero Prieto advirte: "Non" vou calar "na miña crítica á Lomce porque vulnera claramente a Carta dos Dereitos Fundamentais da Unión Europea que o noso país asinou. Chegarei a onde faga falta".

A educación da Xunta é para crecer "na nación española e no mundo”

Feijóo destaca que a súa prioridade na educación pública é que os nenos dispoñan de tecnoloxía e aprendan inglés. Tamén salienta que hai "mellores datos" que hai anos e aposta por "motivar máis aos profesores”.

Impulsar a tecnoloxía e a aprendizaxe de inglés. Ese é un dos obxectivos prioritarios da Xunta en materia educativa, uns obxectivos que, segundo o presidente do Goberno galego, comparte co rei español, Felipe VI, que estivo nun colexio de Ourense esta semana para abrir o curso escolar.

 

Nesa visita, o monarca español insistiu na necesidade de afondar na calidade educativa. Precisamente, nese centro do Pereiro de Aguiar, Felipe VI escoitou a algúns pais insistir nesta cuestión ante a degradación do ensino público e o abandono das escolas rurais.

 

“Participamos da opinión de Felipe VI e por iso coidamos,e moito, a calidade educativa”, respostou Feijóo na rolda de prensa posterior ao Consello da Xunta ao ser preguntado por esta cuestión. “En Galicia estamos con mellores datos que hai anos e, aínda así, temos que mellorar a situación”, engadiu.

 

Por iso, lembrou que o rei español tamén destacou a necesidade de impulsar a tecnoloxía e as linguas. “Participo desde discurso desde hai tempo e ese é o noso compromiso para que os rapaces poidan desenvolverse na nación española e abrirse ao mundo”, apuntou o defender o seu modelo trilingüe nos centros educativos.  “Tecnoloxía, plurilingüísmo ou motivar máis aos profesores”, son, segundo Feijóo, prioridades do seu Executivo.

 

Ademais, o xefe do Executivo galego destacou que foi o seu goberno quen lle propuxo aos monarcas que foran a un centro rural para amosar, deste xeito, o “interese” que ten a Xunta nesta cuestión. “Interésanos que as escolas rurais sigan tendo as mesmas posibilidades que outras urbanas; que teñan tecnoloxía e que aprendan idiomas”, engadiu ao tempo que salientou a normalidade coa se iniciou o curso escolar.