UPyD pide no Congreso que topónimos deturpados como Vivero e Rianjo sexan legais

PROPOSICIÓN DE LEI ORGÁNICA

 

A iniciativa presentada por UPyD quer recuperar “o nome español dos topónimos”, así como que se poida acceder a un emprego público en Galiza sen saber galego, que a administración autonómica use o español na súa documentación e comunicación; ou que a CRTVG emita en castelán.

Unha batería de medidas concretas para acabar “coa discriminación do español” en territorios como Galiza, Catalunya ou Euskadi. Así presentou Andrés Herzog, portavoz de UpyD no Congreso, a proposición de lei orgánica que o partido maxenta quer que a Cámara baixa tramite “por vía de urxencia” para que fique aprobada antes do fin da actual lexislatura. Unha proposta na que “a recuperación do nome español dos topónimos erradicados” vai da man de peticións como que o coñecemento do galego non sexa un requisito para ser empregado público en Galiza ou que a Xunta use o castelán. Non falla tampouco, o clásico de impulsar o español no ensino fronte “á súa discriminación”.
Para Herzog, no Estado español está moi extendida, di, a “concepción errónea” de que “as linguas teñen dereitos”. Unha afirmación que fai para, a seguir, contrapoñer o que di que é unha imposición do galego, catalán ou vasco ao dereito da 'cidadanía' a falar español. Seis son as actuacións e propostas concretas recollidas na proposición de Lei Orgánica presentada por UPyD.
“Recuperar os topónimos erradicados”
De se aprobar esta LO impulsada polo partido de Rosa Díez os “topónimos en castelán” terían que figurar nas rotulacións de todas as vías “urbanas e inter-urbanas”, ademáis de que se procedería a “recuperar o nome tradicional español dos diferentes topónimos, que foi erradicado”. O que suporía a volta de La Coruña, Orense, Villagarcía, Rianjo, Vivero, La Isla... fórmulas erradicadas por mor “da agresiva política lingüística” da comunidade.
Non é o dos topónimos o único campo onde esta LO procura unha regresión na lexislación cara a unha 'españolización' absoluta. No punto de 3 da proposta especifícase que “as disposicións normativas e non normativas de calquera administración (….) e dos organismos públicos, sexan do ámbito que sexan, deberán redactarse e publicarse cando menos en castelán”.
“Igualdade entre españois”
En Galiza faise un uso “excluínte” do galego que impide que “os españois concorran en igualdade de condicións” a un posto de traballo. UpyD fai desta a súa afirmación o argumento en base ao cal solicitar que no acceso a un emprego público en Galiza non teña como requisito coñecer unha das linguas oficiais e a lingua propia do país, o galego. O mesmo pide este partido para Euskadi e Catalunya, que para ecxercer un emprego público neses territorios non se teña porque coñecer os seus idiomas.
A petición de que os medios de comunicación públicos (no caso galego, a CTVG) use o español é outra das reclamacións expresadas na proposición de Lei Orgánica que UpyD quer que se tramite por vía de urxencia.

Obradoiro de aproveitamento das redes sociais para a normalización lingüística

O curso está dirixido a persoas que manexen redes sociais de servizos de normalización lingüística (SNLs), equipos de dinamización lingüística (EDLs) ou outras entidades relacionadas coa promoción do galego.
Organizaranse dúas edicións do obradoiro, unha en Pontevedra (20 de outubro) e outra en Santiago de Compostela (22 de outubro). O prazo de solicitude remata o 8 de outubro de 2015 ás 12:00 h.
Para ampliar información, preme aquí.
Información tirada do Centro de Documentación Sociolingüística de Galicia.

Nace en Lalín a asociación Medrar 2.0

Detrás do colectivo está un grupo de pais involucrados na educación dos seus fillos que busca organizar actividades diferentes.

En Lalín presentouse onte unha nova asociación, Medrar 2.0. Detrás do colectivo está un grupo de pais involucrados na educación dos seus fillos que busca organizar actividades diferentes, co obxectivo de favorecer un clima de diálogo e convivencia doméstica. En especial en etapas máis conflitivas como a preadolescencia e adolescencia. Teñen previsto manter reunións por zonas, invitando a AMPAs, asociacións de índole educativa ou familias directamente interesadas. Pero xa desde este próximo luns activaranse cursos de técnicas de estudo, con grupos dun mínimo de dez estudantes. Os interesados en informarse sobre esta iniciativa poden chamar ao teléfono 651 974 089 ou a través do correo electrónico medrarlalin@gmail.com. Por outra banda, o día 24 haberá un taller de escoita activa e un taller de autoestima e relación entre rapaces, con inscrición igual que para os grupos de estudos. Tamén ese é o método para apuntarse e participar o día 25 no pavillón municipal, desde as 15.30 horas, na iniciativa Bocadillos de toxos. Consistirá en xogos en equipo de pais e fillos, compartindo tamén unha merenda. Desde Medrar 2.0 agradeceron a colaboración do Concello de Lalín, que achega a axuda da educadora familiar e cede o pavillón un domingo ao mes. Os interesados en coñecer máis detalles sobre a asociación poden acceder tamén á súa páxina en Facebook.

Literatura, pintura, cinema e teatro centran este mes o lecer cultural

O Salón Teatro acollerá tres obras de teatro de fantasía, drama e comedia -'Tesouro de Corcoesto' proxectarase o xoves 15.

Outubro asoma polo calendario e desde o Concello de Lalín propoñen media ducia de actividades de lecer durante o mesmo-. Unha oferta que se fai eco das últimas novidades literarias e teatrais, aposta polo talento local coa exposición pictórica de Xulio García e comprométese na difusión do documental Tesouro de Corcoesto, de Cora Pena, sobre o negocio da minería neste lugar do municipio de Cabanas, en Bergantiños. O conxunto de opcións foi presentado na mañá de onte pola concelleira de Facenda e Cultura, Teresa Varela, o técnico municipal Damián Paio Paío e Ismael Antonio López, presidente da asociación Petón do Lobo.
A programación cultural arrincará a próxima semana, o venres 9 coa inauguración da mostra A cor dás emocións do agoladense Xulio García Rivas no Museo Ramón Mª Aller. A exhibición permanecerá aberta ata o día 29 deste mes. Nesta liña, o xoves 15 no Salón Teatro proxectarase o documental Tesouro de Corcoesto no que participa o colectivo Petón do Lobo. "Consideramos que é unha excelente ferramenta para a difusión dunha problemática crecente: as políticas públicas que emponderan ás grandes empresas en contra dos intereses das comunidades locais", argüiu López. Así mesmo anunciou que tras o visionado do filme, de entrada gratuíta, e o seu coloquio, Petón do Lobo entregará os premios Lobo e Territorio 2015 a Cora Pena, directora da película pola difusión do conflito ambiental, a Luis Manuel Galego, enxeñeiro técnico agrícola da lalinense Abertal Sociedade Cooperativa de Galicia e á plataforma Salvemos Catasós.
O pase teatral empezará dous días despois, o sábado 17 no Salón Teatro, con Ou último dragón de Sarabela Teatro, escrita e dirixida por Fina Quella. Princesas, cabaleiros e dragóns que reivindicarán o pacifismo e a tenrura como formas de relacionarse. A entrada será a 5 euros, 3 para estudantes. O venres contiguo, día 23, o Salón Teatro volverá ser o escenario, nesta ocasión, de Noiteboa , dirixida polo lalinense Álex Sampayo da compañía Redrum Teatro. Unha historia ambientada en Compostela durante o Nadal e onde a soidade cobra protagonismo. Ernesto Chao, Mela Casal e Guillermo Carbajo son os seus intérpretes. De novo os prezos de despacho de billetes mantéñense igual para esta e a seguinte función. Xa achegándose a finais de mes o xoves 29, no museo Ramón Mª Aller, Montse Fajardo presentará Un cesto de mazás, Memoria dás vítimas do 36 e do tempo que ven, 16 relatos de persoas próximas á representación. Pechará outubro Tacóns na Corda, o venres 30 no Salón de Teatro, unha comedia de Verdeveras Expresións Artísticas nas que as mulleres, lonxe dos estereotipos, contarán como é o seu mundo.

Dos problemas de conduta na escola ao futuro abuso das drogas

Investigadores de Psicoloxía da Universidade de Santiago seguen a 207 nenos galegos durante 13 anos nun estudo pioneiro.

É un estudo pioneiro non tanto pola mostra (207 nenos) como pola duración no tempo: 13 anos. Investigadores de Psicoloxía da Universidade de Santiago analizaron os problemas de conducta en escolares e a súa relación cun futuro consumo de alcohol ou outras drogas. E revelan que, aínda que moitos nenos reconducen a súa mala conducta co pasos dos anos, hai casos persistentes, que desembocan en problemas na etapa adulta. Revistas internacionais de alto impacto recolleron o traballo, mentres os investigadores desenvolvían tamén outra acción: o programa EmPeCemos, aplicado en 26 colexios galegos para reducir os problemas de conducta infantís.

Os problemas de conduta en nenos (incluíndo agresividade, condutas desafiantes, dificultades para acatar as normas ou explosións de ira) son un dos retos máis importantes aos que se enfrontan familias, educadores e profesionais dos sistemas de saúde de maneira que constitúen unha demanda moi frecuente de asistencia nos ámbitos escolar e sanitario. Por iso é prioritario coñecer os seus determinantes, as repercusións a curto, medio e longo prazo e, finalmente, de qué maneira debe abordarse a intervención.
A Unidade de Investigación en Prevención e Tratamento de Problemas de Conduta da USC (UDIPRE) conclúe nas próximas semanas a execución do proxecto “ Predictores temperáns do abuso de alcohol e outras drogas: Estudo lonxitudinal e seguemento dun programa de prevención indicada” financiado pola Delegación do Goberno do Plan Nacional sobre Drogas. O proxecto que dirixe Estrella Romero, do Departamento de Psicoloxía Clínica e Psicobioloxía da USC, forma parte dunha investigación iniciada hai máis de dez anos e que permitiu desenvolver en España o primeiro estudo lonxitudinal a longo prazo en torno aos problemas de conduta.

É o primeiro estudo a longo prazo en España sobre problemas de conduta en escolares

O estudo iniciouse en 2003 coa avaliación de 207 nenos galegos con diferentes niveis de problemas de conduta, que volveron ser seguidos en 2006, 2009, 2013 e 2015, ano este último no que do total participaron finalmente 124 nenos. Tratábase de coñecer cómo evolucionan desde a nenez (os participantes tiñan unha media de 8.04 anos ao comezo do estudo) ata a adultez temperá (19.18 anos no último seguimento) e qué factores permiten predir un desenvolvemento máis desfavorable. Ademais, o estudo permitiu coñecer tamén qué consecuencias presentan na vida dos mozos ao longo dos anos.
Tras todos eses anos de investigación constátase que os problemas de conduta infantís poden mostrar diferentes perfís de evolución, decrecendo co tempo ou, pola contra, manténdose elevados durante a nenez e na adolescencia. Este segundo perfil (denominado problemas de conduta persistentes) acompáñase de maiores niveis de agresividade, hiperactividade, dificultades para regular as emocións e dificultades nas habilidades de interacción social. Estes mozos ao longo dos anos van mostrando ademais un maior desaxuste escolar, un estilo persoal máis impulsivo e desinhibido e unha maior frecuencia e intensidade no consumo de alcohol, tabaco e cannabis. Xa na adultez, os persistentes relaciónanse cun menor autocontrol, maiores dificultades emocionais, niveis máis altos de agresividade nas interaccións cotiás e un patrón de personalidade menos responsable e menos empático.

Os problemas de conducta na infancia poden derivar en trastornos na idade adulta.

Paralelamente a este estudo lonxitudinal, o grupo UDIPRE foi desenvolvendo o programa de intervención EmPeCemos (Emocións, Pensamentos e Condutas para un desenvolvemento saudable) destinado a reducir os problemas de conduta infantís e que, aplicado en 26 colexios galegos entre 2005 e 2007, xa mostrara a súa eficacia a curto prazo.
EmPeCemos consta de tres compoñentes, que se aplican de maneira coordinada e integrada para xerar cambios coherentes nos nenos e a súa contorna familiar e escolar: un dirixido aos nenos con problemas de conduta temperás (desenvolvendo neles habilidades emocionais, sociais e de autocontrol); outro dirixido aos seus pais/nais (dotándoos de habilidades para mellorar as relacións cos nenos, promover os comportamentos positivos e reducir os comportamentos problemáticos); e outro para os profesores (proporcionándolles recursos para mellorar as interaccións cos nenos con dificultades de comportamento e para fomentar a colaboración coas familias).

O programa EmPeCemos, en 26 colexios, mellorou os problemas de conduta dos escolares

O proxecto que agora finaliza permitiu comprobar os efectos do programa –coa máxima cualificación de calidade por parte do European Monitoring Center for Drug and Drug Abuse na súa revisión de “boas prácticas” para a prevención en Europa– a longo prazo. Seis anos despois da súa aplicación os nenos non só mostran un comportamento menos problemático, menos dificultades emocionais e mellores habilidades sociais, senón que tamén presentan un menor consumo de tabaco e alcohol. “EmPeCemos emerxe así como unha alternativa de intervención, probada e validada no noso contexto que permite previr non só o desenvolvemento dos problemas de conduta senón que serve tamén como recurso de prevención, a longo prazo, do consumo de drogas na adolescencia”, explica Estrella Romero. Desenvolvido e avaliado en Galicia, convértese así en programa de referencia, pioneiro no contexto europeo, para a prevención dos problemas de conduta e o consumo de drogas desde a nenez.
En definitiva, a investigación conclúe que os problemas de conduta temperáns poden ser persistentes ao longo da adolescencia e poden ter implicacións negativas sobre múltiples aspectos do desenvolvemento. Non obstante, comprobouse tamén que con intervencións amplas e dirixidas a diferentes contextos é posible reducir os desaxustes condutuais e o consumo de drogas e mellorar substancialmente o prognóstico.
Os resultados do proxecto publicáronse ata o momento en múltiples publicacións destacadas, entre elas Child Psychiatry and Human Development, Journal of Youth and Adolescence eJournal of Psychopathology and Behavioral Assessment.

A universidade pública perde máis de 77.000 alumnos desde 2012

A subida de taxas, a diminución das bolsas e as axudas e o aumento dos requisitos para beneficiarse delas, entre as principais causas.

As universidades públicas perderon máis de 77.000 alumnos desde o curso 2011-2012 como consecuencia da subida das taxas, a diminución das bolsas e axudas e o aumento dos requisitos para beneficiarse delas mentres que as privadas gañaron terreo nas matriculacións de másteres. Son as conclusións dun informe da Federación do Ensino de CCOO -con datos do Ministerio de Educación do pasado xuño- e que destaca que moitos mozos "renunciaron" a iniciar estudos ou abandonáronos por non ter capacidade económica para os prezos das matriculacións.

Pasouse de 1.371.355 alumnos matriculados en grao e másteres oficiais no curso 2011-12 aos 1.294.191 en 2014-2015 (-77.164). Para CCOO é "letal" a política universitaria realizada polo PP e a súa consecuencia é unha "perda de capital humano" e do "principio de igualdade" que non ten que ver coa baixada da poboación de 18 a 24 anos como argumenta Educación, destacou este sindicato.

De forma paralela, as universidades privadas e da igrexa subiron a súa cota de mercado ata alcanzar o 30,19 % das matriculacións de másteres, dixo Francisco García, secretario xeral de FE-CCOO, que pediu ao Goberno que baixe os prezos dos graos e dos másteres nos centros públicos, xa que estes últimos asimiláronse aos dos privados. A diferenza de prezos nos cursos de posgrao entre as universidades públicas e privadas "recortouse moito", insistiu García, que comentou que nas segundas hai máis "flexibilidade", en xeral.

Se o Goberno igualase os prezos dos másteres aos de grao "seguramente as matriculacións públicas crecerían moito máis", afirmou polo seu lado Julio Serrano, secretario de acción sindical, universidades e investigación e saúde laboral de FE-CCOO.

Así mesmo, a oferta de cursos nas universidades privadas está a incrementarse a maior ritmo nas privadas que nas públicas (tamén porque se pasou de 13 a 33 centros privados) e nalgunhas comunidades como Aragón e Estremadura están a producirse "conflitos" por ofrecer ambas as mesmas titulacións, comentou Serrano. "A carreira natural dun universitario é facer o grao e logo o máster pero coa política de incremento de prezos ese camiño trúncase", resaltou Serrano.

Por outra banda, os datos dos orzamentos das universidades públicas para 2015 son similares aos de 2013 e demostran, segundo CCOO, que "estamos moi lonxe de recuperar o esborralle de investimento dos últimos catro anos". Entre 2010 e 2015, os orzamentos dos centros públicos descendeu máis de 1.384 millóns de euros, un 13,7%. E aínda que os orzamentos de 2015 incrementáronse un 1,5% sobre os de 2014 (139 millóns de euros máis), "os capítulos de ingresos e gastos correntes mantéñense practicamente conxelados", sostivo este sindicato docente.

En canto ao persoal das universidades, entre 2012 e 2015 perdéronse 7.766 postos de traballo, o que supón un 5,1% do profesorado PDI (persoal docente e de investigación) e do 4,9% de PAS (persoal de administración e servizos). CCOO criticou que se estea substituíndo emprego fixo e de calidade por "precario", posto que se substitúe a profesorado funcionario por docentes con contratos que na maioría son temporais e a tempo parcial.

Así, García chamou a atención sobre o contraste entre persoais moi consolidados, como as da Universidade Complutense de Madrid e a Universidade de Barcelona, nas que se chega a destruír un 9,9% do profesorado funcionario e noutras de recente creación non se perden efectivos ou crecen como a Pompeu Fabra de Barcelona ou o Rei Juan Carlos de Madrid. CCOO instou a que os estudos universitarios nos centros públicos se volvan ver como "un dereito" e que non se relacionen só co mercado laboral posto que se educa "para máis cousas".

O Partido Popular impede a toma en consideración a ILP sobre o dereito ao coñecemento e á contempalción da obra de Castelao polo pobo galego no Parlamento.

O partido Popular negou a posibilidade de que dignificar a obra de Castelao a través da difusión e posta en valor da obra e figura de Castelao por parte dos poderes públicos de Galiza.
Pilar García Negro: “Toda esta riqueza, toda esta entrega patriótica, unha obra proteica e densa de máis de trinta anos da súa vida, merecen ser coñecidas, xulgadas e interpretadas polos seus descendentes, por nós, as galegas e galegos de hoxe”

Tras unha intensa campaña de recollida de máis de 11.000 sinaturas acompañada de actividades de difusión e debate da obra e figura de Castelao ao largo e longo de Galiza, a ILP sobre o dereito ao coñecemento e á contemplación da obra de Castelao polo pobo galego foi debatida hoxe no Parlamento galego que debía decidir sobre a súa toma en consideración.
O obxecto da ILP era “impulsar as actividades a desenvolver pola Xunta de Galiza para difundir e pór en valor a obra e figura de Castelao”, incluíndo accións polos poderes públicos como a catalogación de toda a súa obra, a procura de acordos ou convenios de cesión da súa obra cos diferentes proprietarios; a definición dun espazo museístico apropriado para a exposición da súa obra; a introdución de forma transversal  da súa obra no sistema educativo; o espallamento a través do audiovisual; ou a dixitalización e posta en coñecemento a través de internet. Ademais propuña o traslado a Galiza desde Buenos Aires do cuadro “A derradeira lección do mestre”actualmente en condicións de inaccesibilidade, para ser contemplado coas debidas grantías de protección e seguridade.
A proposición de Lei foi defendida na cámara pola presidenta da federación de asociación culturais Galiza Cultura, Pilar García Negro que foi  acompañada desde a tribuna de convidados por representantes da Comisión Promotora, da CIG-Ensino, AS-PG, Fundación Castelao, A Mesa pola Normalización Lingüística, xunto con asociacións culturais como Vagalumes da Estrada ou O Galo de Santiago.
Pilar García Negro lembrou na súa intervención que Castelao” foi un dos primeiros socios das Irmandades da Fala, cuxo centenario celebraremos o ano próximo”. Ademais do artista polifacético no debuxo, na ilustración, na pintura de grande formato, nas estampas e viñetas, como escritor profisional, lembrou tamén o pensador “que compón ese libro de libros que é Sempre en Galiza, onde se concentran as razóns do noso devir histórico, da restauración da nosa conciencia como galegos e do dereito a un futuro como povo”.
Lembrou tamén García Negro que Castelao “se preocupou de resgatar o Estatuto plebiscitado no 28 de Xuño de 1936 e que conseguiu que tomase estado parlamentar na sesión de Cortes celebrada en Montserrat o 1º de Febreiro de 1938”.  “Grazas a aquela xestión, señorías, existen este Parlamento ou a propria Xunta na actualidade” afirmou a presidenta de Galiza Cultura.
Para García Negro “Toda esta riqueza, toda esta entrega patriótica, unha obra proteica e densa de máis de trinta anos da súa vida, merecen ser coñecidas, xulgadas e interpretadas polos seus descendentes, por nós, as galegas e galegos de hoxe, pois é unha obra cargada de futuro, que nos interpela a cada paso nos grandes conflitos do noso tempo”.
Por tiodo iso pediu “que a Xunta de Galiza se implique na catalogación e difusión de toda a súa produción artística, que acada miles de pezas; que ela, esta obra, dispoña dun espazo de dimensións e natureza adecuadas á súa contemplación integral; que poda vir á Galiza o seu lenzo “A derradeira lección do mestre”, recluído en Buenos Aires; que no ensino, e de forma transversal, se estude e difunda a súa figura en toda a súa riqueza e fecundidade; que os meios de comunicación de titularidade pública, así como todas as vías posíbeis de difusión nas redes sociais, atendan á divulgación da súa obra; que se proceda a concertar todas as partes  -persoas e institucións-  para restaurar e sinalizar os espazos relacionados coa vida de Castelao”, para sinalar a continuación que a dedicación apra 2016 de Castqalao como figura homanxeada no Día da Arte Galega a instancias da Real Academia de Belas Artes, sería una moi boa oportunidade para celebrar Castelao con feitos e “non só con reverencias caducábeis”.
A portavoz da Comisión Promotora insistíu en que se Castelao “non debe ser “patrimonializado” por ninguén, como adoito se repetiu, dése a coñecer, difúndase masivamente sen censuras, permítase valoralo e xulgalo libremente, como fan decote as culturas que se estiman a si mesmas e interactúan constantemente cos seus vultos principais”.
A ILP contou co voto favorábel do Grupo Mixto, BNG, AGE, e PSdG-PSOE mais finalmente non puido continuar ante a negativa do Partido Popular a que a Xunta tome responsabilidade na obra de Castelao para difundila e pola a disposición do pobo galego xa que, segundo o seu portavoz Agustín Baamonde, “non se pode difundir por lei o pensamento de ninguén”

Onte 1454: Triste Día Europeo das Linguas en Galicia

Coincidiu a celebración onte do Día Europeo das linguas coa notificación recibida na Real Academia Galega na que o Tribunal Constitucional comunica que inadmite o seu recurso de amparo sobre o recurso de casación relativo á sentenza do Tribuna Superior de Xustiza de Galicia sobre o Decreto 79/2010 para o plurilingüismo no ensino non universitario. Un texto de apenas un par de liñas que  sen expresar motivación xurídica ningunha liquida o recurso da Academia e deixa sen dereitos lingüísticos aos picariños galegofalantes escolarizados en castelán.
Unha decisión do Constitucional, na que non é moi difícil identificar intencionalidade política, que como sinalou o secretario da RAG deixa en papel mollado a Carta Europea das Linguas Rexionais e MInoritarias, que obriga ao estado español a garantir unha oferta educativa suficiente en cada unha das linguas cooficiais nos niveis educativos non universitarios. Non hai dúbida de que a Academia Galega debe continuar a súa batalla xurídica e recorrer ás instancias xudiciais europeas o Decreto para o plurilingüismo sexa por vulnerar o texto da Carta Europea como por excluír o uso do galego en materias científicas como as Matemáticas ou a Física e Química, como por fomentar os prexuízos sobre o noso idioma.
Neste contexto magooume que nunhas declaracións radiofónicas recentes de Alberto Nuñez Feijoo a Jiménez Losantos, primeiro responsable político do Decreto 79/2010, recoñecese sen arroibarse que a Xunta considera vinculante a polémica consulta ás familias, a pesar de que fose anulada por unha sentenza do TSXG. Para o presidente da Xunta «se a maioría dos pais queren que os seus nenos empecen a ler e a escribir en castelán, empezan a escribir e a ler en castelán a totalidade da aula». U-los dereitos, entón, dos picariños galegofalantes recoñecidos pola Carta Europea das Linguas? U-lo cumprimento do establecido sobre a consulta ás familias na sentenza do TSXG sobre o Decreto para o plurilingüismo? Xaora, con este criterio da Administración educativa galega, do que fachendea Feijoo, estáse erradicando o galego destas aulas de Educación Infantil e do primeiro curso de Primaria, mais tamén o seu seu emprego como lingua de instalación coloquial destes picariños.
Triste celebración do Día Europeo das Linguas en Galicia, cando o retroceso do uso do galego no sistema educativo está sendo promovido polo goberno do propio país. Triste e indignante.

Casa-Museu de Manuel Maria abre portas para professorado de todos os níveis

A iniciativa ten por obxecto axudar a deseñar as visitas escolares que se están a programar para este curso escolar á casa natal do escritor de Outeiro de Rei. A xornada incluirá un“diálogo” coa obra de Manuel María nalgúns dos espazos da contorna de Outeiro máis amados polo poeta.

“Axudar a deseñar unha boa visita escolar á Casa-Museo Manuel María e á súa contorna, tirándolle o mellor rendemento posíbel”. Eis o obxectivo da xornada informativa de “portas abertas” que a Casa-Museo do escritor de Terra Chá ou Os soños na gaiola programa para este sábado 3 de outubro a partir das 10.30 da mañá. A iniciativa está especificamente dirixida ao profesorado de todas as etapas do ensino, en especial ao de departamentos de Lingua Galega, equipos de dinamización lingüística, aos responsábeis das saídas escolares ou ao dos clubes de lectura das bibliotecas.
A xornada, que se desenvolverá en horario de mañá e de tarde, incluirá visitas guiadas á Casa-Museo, coa fin de coñecer como se desenvolven habitualmente e como se poden adaptar a cada etapa escolar, e un achegamento aos diferentes recursos didácticos que o espazo ofrece como complemento, desde a música, o audiovisual ou as TIC até as posibilidades que a palleira, a aira
ou a horta da Casa de Hortas ofrecen como espazo de xogos ou actividades que os mesmos centros poidan preparar previamente na aula. A actividade incluirá tamén a visita a algúns dos espazos da contorna da casa natal que foron escenario esencial na vida ou na intimidade poética de Manuel María e conforman parte do seu universo literario máis persoal, o que el definía como a “tribo” de Outeiro de Rei: a Carballeira da Santa Isabel, a fonte comunal ou as Penas de Rodas. Xa de tarde, visitarase a olaría de Bonxe, derradeiro exemplo da cerámica artesá da Terra Chá, ou a Lagoa de Cospeito, a quen Manuel María dedicou un poemario completo: Poemas para dicirlle a dúas lagoas (Espiral Maior, 1994).
Trátase de toda unha proposta de roteiro a través da que coñecer a rica biodiversidade chairega en diálogo directo coa obra do escritor ao que se dedican as Letras Galegas de 2016.

Campaña de CEAPA sobre a devolución do importe de libros de texto

A escolarización é gratuíta nas etapas obrigatorias e, con todo, a redución orzamentaria destinada a axudas e bolsas foi importante, chegando mesmo a suprimirse nalgunhas CCAA, o que derivou en que moitas familias non dispoñan de recursos económicos suficientes para comprar os libros e materiais que recolle a listaxe que se facilita por parte dos centros para ser adquiridos polas familias do alumnado.
En bo número de centros educativos e por parte dun importante número de docentes está recollida a obrigatoriedade de asistir a clase con todo o material necesario, libros de texto incluídos, informando que este incumprimento carrexa sancións, castigos, aplicación nos criterios de avaliación que supón a diminución nas notas, etc. chegando ao caso mesmo da expulsión por este motivo.
Ante a presión que o alumnado recibe tanto por parte do docente como por parte do grupo de iguais, xa que se converte en foco de atención por este motivo, a súa familia realiza a compra destes materiais e libros destinando os ingresos que en moitas ocasións tiñan a finalidade de cubrir necesidades básicas como a alimentación ou o pago da vivenda, etc.
Ante as múltiples chamadas e consultas recibidas por parte de nais e pais, AMPAs e FAPAs, CEAPA realizou unha consulta ao Ministerio de Educación Cultura e deporte (se adxunta) na que se pregunta pola base legal sobre a que se sustenta a obrigatoriedade de adquisición por parte das familias dos materiais elixidos polos docentes para impartir a súa materia, en etapas obrigatorias e, por tanto, gratuítas.
A resposta enviada por parte do MECD (se adxunta) non achega ningunha base legal que obrigue á compra dese material e recoñece a responsabilidade do MECD e das administracións autonómicas que teñen transferidas as competencias en educación.
Por elo, para que as familias poidan solicitar o reintegro do importe dos libros e material que ven obrigadas a comprar, CEAPA elaborou un documento basee para cumprimentar e entregar no Rexistro do seu Centro Educativo solicitando a este o seu envío á Consellería de Educación correspondente como máxima responsable de garantir a gratuidade da Educación en etapas obrigatorias.
Achegamos tres documentos relacionados coa iniciativa presentada e difundida por CEAPA de devolución do importe dos libros de texto e material curricular para garantir a gratuidade do ensino.

• Escrito presentado no Rexistro Xeral do MECD, pedindo información sobre a base legal sobre a que se sustenta a obrigación de compra do material escolar e os libros de texto que cada docente elixe para impartir a súa materia.
• Resposta enviada por parte do MECD na que non fai alusión algunha á obrigatoriedade de compra por parte das familias, e recoñece o seu parte de responsabilidade xa que, aínda que as competencias en educación están transferidas excepto en Ceuta e Melilla, tamén o MECD debe destinar financiamento para conseguir a gratuidade real.
• Documento base para esixir á Dirección do centro, como representante da Administración a devolución do importe achegando documento comprobante de compra.

Se queremos conseguir a gratuidade total e real do ensino, esta actuación non se limita a este curso, é unha carreira de fondo na que debemos incidir de forma sistemática, para o que é fundamental a colaboración e proactividad de todo o movemento asociativo.

Documento base reclamacion devolucion de gastos libros de texto e material curricular.pdf

MEC SOLICITUDE INFORMACIÓN LIBROS TEXTO E MATERIAL CURRICULAR.pdf

MEC RESPOSTA LIBROS TEXTO E MATERIAL CURRICULAR.pdf

Documento base reclamacion devolucion de gastos libros de texto e material curricular.doc

Nova edición do obradoiro en liña sobre xestión de tendas virtuais da Aula TIC PEME

A Aula TIC PEME da Universidade de Santiago, Campus de Lugo, vai pór en marcha a sétima edición do seu Taller Virtual sobre Xestión de Tendas Virtuais con Prestashop. Segundo informan os responsábeis da Aula, con independencia de que o obradoiro se dirixa sobre todo a pequenas e medianas empresas e autónomos, poderá levalo a cabo calquera persoa interesada na materia: o comercio electrónico, a mercadotecnia e, en xeral, as actividades despregadas por unha empresa na Rede botando man de Prestashop, o xestor de contidos libre cuxa principal aplicación é a posta en marcha de establecementos de venda dixitais.
Unha vez máis, a nova edición do taller da Aula TIC PEME será un taller cen por cen virtual, con contido baseado en vídeo-titorías e actividades prácticas sobre a materia. Celebrarase entre o 23 de outubro e o 27 de novembro de 2015. O prezo é de cincuenta euros, e os alumnos e ex alumnos da Universidade de Santiago disporán dun desconto do 50% sobre o devandito importante. Tamén se achegarán descontos de tipo grupal acompañados do sorteo dunha plaza en Facebook.

A paixón de traducir ao galego

Prazos curtos, altas esixencias e estándares de calidade moi elevados fan do mundo da tradución unha profesión complexa pero que apaixona aos que a elixen. Unha delas é María Alonso Seisdedos, que obtivo o Premio Nacional á Mellor Tradución 2013 polo Ulises de Joyce en galego e responsábel de moitísimas traducións audiovisuais, a de Sinchan por exemplo. 

A tradutora participou este mércores na Facultade de Filoloxía e Tradución nos actos de celebración do Día Internacional da Tradución para explicar aos estudantes como se desenvolve o traballo de tradución e dobraxe. Foron precisamente os alumnos e alumnas do centro os que propuxeron o seu nome para este evento, xa que é coñecida pola dobraxe ao galego da serie de animación xaponesa Shin Chan, entre outros moitos traballos no eido audiovisual. Esta faceta compaxínaa coa tradución literaria de textos principalmente do inglés como Nocturnos, de Kazuo Ishiguro ou Chámome vermello de Orhan Pamuk.

 

A modo de entrevista e respondendo ás preguntas da profesora Liliana Valado e dos propios alumnos e alumnas, a tradutora foi aclarando todas as dúbidas sobre o proceso tradutivo dunha obra tan extensa como o Ulises e explicando as curiosidades da dobraxe das series infantís. En xeral, considera que o mundo da tradución é complexo pero tamén recoñece que o labor dos tradutores e tradutoras é tratado con “pouco respecto e consideración”. A esixencia dos tempos, o reparto dun mesmo traballo entre varios profesionais para acurtar o proceso, a falta de consideración das suxestións que fan os profesionais, etc. son algúns dos atrancos cos que se atopan os tradutores e tradutoras. Con todo, Alonso Seisdedos trasladoulles o seu amor pola profesión e recoñeceu que despois do reto de traducir a Joyce aceptaría calquera outro destas dimensións. Explicoulles que decidiu dedicarse a este mundo “porque algunhas traducións non as podía nin ler” e, despois de moitos anos na profesión, segue mantendo o costume de non ler nin ver os seus traballos “porque seguro que lle volvería cambiar cousas”. Neste sentido recoñece que contar cun prazo de entrega curto ten a súa parte positiva “porque senón seguiríamos dándolle voltas aos textos indefinidamente”.

 

O reto do Ulises

8 anos de traballo, un equipo de catro persoas e un libro de 1000 páxinas como resultado. Son só cifras, pero axudan a entender o nivel de esixencia e o volume de traballo para traducir ao galego o Ulises de Joyce. Otero Pedrayo foi pioneiro cunha tradución parcial “o que demostra que era un persoa que vivía moi ao tanto do que sucedía na literatura de fóra de Galicia”, explica Alonso. O relevo tomárono, por iniciativa de Víctor Freixanes, María Alonso Seisdedos, Eva Almazán, Xavier Queipo e Antón Vialle. Lembra Alonso Seisdedos que durante máis de sete meses traballou na tradución dez horas ao día, sete días á semana, “un traballo de tolos e para tolos” e que tratándose dun equipo de tradutores “foi un constante ir e vir de suxestións, de tomas de decisións e de establecer criterios”. E é que o texto é tan complexo que nel se poden atopar dende cantigas medievais a textos xornalísticos, dende teatro a neoloxismos e dende xogos de palabras a xergas. A tradución debe ter unha uniformidade que obriga a acordos, a pautas como determinar se se traducen ou non os nomes das rúas, ou se se empregan as unidades de medida británicas. Ese esforzo de estandarización, explicou Alonso, é xunto co traballo tipográfico, unha das partes máis delicadas do proceso. 

 

Máis de 600 capítulos de Shin Chan

Alonso Seisdedos ten traballado tamén na dobraxe de multitude de series, películas, documentais e programas infantís para a TVG dende 1986, entre eles a famosa Shin Chan. Precisamente este último traballo é o que espertou máis interese entre o alumnado, que se preguntaba como se podería manter a coherencia terminolóxica durante máis de 600 capítulos; se dobraba capítulo a capítulo ou unha temporada enteira; se traducía do xaponés directamente, etc. A autora tamén quixo facer fincapé na importancia deste tipo de dobraxes ou traducións para público infantil, “porque todos aprendemos a falar escoitando e lendo, e se os textos ou os debuxos conteñen, por exemplo, demasiados calcos do inglés, o impacto negativo nos rapaces é alto”.

A extinción de licenciaturas consúmase sen unha solución para o estudantado afectado

Este mércores 30 de setembro completarase a extinción das licenciaturas universitarias, ao abeiro do Real Decreto 861/2010. Na Universidade de Santiago, ao redor de medio milleiro de alumnos e alumnas víronse afectados por esta finalización dos vellos plans, que poñía en perigo a finalización dos seus estudos. Para unha parte deles, o Consello de Goberno da USC aprobou o pasado 29 de xullo a convocatoria dunha proba extraordinaria en setembro, pero unha das condicións que pedía para poder presentarse era ter suspensas as dúas oportunidades ordinarias nestas materias, algo que unha parte deles e delas non cumpría. Este grupo de estudantes, sen acceso a esta proba extraordinaria, verase obrigado a matricularse nos novos graos, o que pode implicar en moitos casos ter que cursar un ano enteiro de materias, ademais do obrigado proxecto final.

Denuncian a "falta de vontade de solucionar este problema" amosada pola Universidade de Santiago

O estudantado afectado por esta situación, apoiado polas organizacións Comités, Liga e Agir, solicitaron reiteradamente unha xuntanza co reitor da USC e a convocatoria cun Consello de Goberno extraordinario que puidese aprobar a modificación dos requisitos esixidos para a convocatoria desta proba. A xuntanza tivo lugar finalmente este luns, pero os representantes do alumnado que participaron nela denuncian a ausencia de resultados e a "falta de vontade de solucionar este problema" amosada pola Universidade de Santiago.
Os alumnos e alumnas foron recibidas pola pola secretaria xeral da USC, Consuelo Ferreiro Regueiro, que lles advertiu de que para poder convocar o Consello de Goberno (imprescindible para levar a cabo a modificación solicitada) se necesita a sinatura dun terzo dos seus membros. O Consello de Goberno tamén pode ser convocado de inmediato, coa simple autorización do reitor da Universidade, algo que non se vai producir.
As persoas afectadas e as organizacións AGIR, Comités Abertos e Liga Estudantil Galega denuncian "a falta de vontade" amosada pola USC, polo seu reitor Juan Viaño e pola súa secretaria xeral Consuelo Ferreiro, "tendo os mecanismos suficientes para facelo, e dificultando chegar a unha solución, xa que evidentemente é moito máis fácil que o Reitor convoque o Consello de Goberno a que nós teñamos que conseguir as sinaturas dun terzo dos membros". 

"Todo isto é outra proba de que a USC só quere que a burocracia nos faga perder o tempo e non consigamos solucionar o problema"

Lembran que o Real Decreto 861/2010 esixe que "as universidades, sen prexuízo das normas de permanencia que sexan de aplicación, garantirán a organización de polo menos catro convocatorias de exame nos dous cursos académicos seguintes á citada data de extinción". E explican que "a interpretación da secretaria xeral invalida tal modificación para o caso das extincións das licenciaturas da USC por afirmar que os afectados renunciaron no seu momento a rematar polo plan antigo ó cursar polo Grao ata tres materias ou 18 créditos que lle restaran para rematar a carreira". Subliñan, no entanto que "ás estudantes só se lles ofreceu esta alternativa como opción, e en ningún momento renunciaron a súa licenciatura xa que de superar as materias cursadas polo Grao se lle imputarían na licenciatura obtendo este título e non o de graduado".
Afirman que "todo isto é outra proba de que a USC só quere que a burocracia nos faga perder o tempo e non consigamos solucionar o problema" e conclúen que "non conseguirán que deixemos de protestar por este problema e tomaremos as accións sociais que fagan falta ata ver problema solucionado".

A tradución de Sarrionandia ao galego, I Premio Etxepare

O poemario “Tempo de exilio”, de Joseba Sarrionandia, traducido ao galego por Isaac Xubín e publicado na colección Tambo do selo Faktoría K, gañou a primeira edición do Premio de Tradución Etxepare-Laboral Kutxa, convocado polo Instituto Vasco Etxepare. 

Este galardón, que vén de entregarse en Donostia coincidindo co Día Internacional da Tradución, recoñece a calidade do traballo realizado por Xubín. “Tempo de exilio” -en edición bilingüe eúscaro/galego- é a primeira antoloxía poética de Sarrionandia, un dos principais expoñentes da moderna literatura vasca. O propio autor participou na selección das composicións, que abranguen tres décadas de traxectoria literaria.
Filólogo, escritor e tradutor, na actualidade Isaac Xubín é profesor en Sheffield. É autor de varios libros de poesía, narrativa curta e colaborou en publicacións colectivas. Como docente e investigador, elaborou un dicionario galego-éuscaro e foi lector de lingua e literatura galegas no Colexio Universitario de Cork. Na súa faceta como tradutor sobresae por ter recibido o Premio Lois Tobío 2012 da Asociación Galega de Editores (AGE) ao mellor libro traducido por “Alén da fronteira: sete poetas vascos”, publicado igualmente na colección Tambo.
Joseba Sarrionandia (Iurreta, 1958) é un dos máis destacados escritores en euskara, aínda que é máis famoso polos devires da súa vida. En 1985 fuxiu do cárcere de Martutene agochado dentro duns bafles no concerto de Imanol, feito que inspirou a coñecidísima canción de Kortatu Sarri Sarri. Desde entón está en paradoiro descoñecido, o que non lle impediu seguir publicando desde o exilio.
O Instituto Vasco Etxepare é unha institución cuxo obxectivo é difundir a lingua e a cultura vascas por todo o mundo, promovendo a difusión internacional do éuscaro e dos creadores vascos en todas as disciplinas, dende a literatura ás artes escénicas, pasando polo cinema, a escultura, a pintura ou a música.
Bernart Etxepare escribiu en 1545 o primeiro libro en lingua vasca, titulado ‘Linguae Vasconum Primitae’, que formulaba un desexo para esta lingua: “Euskara móstrate na rúa / Euskara móstrate na praza / Euskara móstrate ao mundo”.