xoves, 5 de setembro de 2013

IU volve lanzar a súa campaña contra a LOMCE e anuncia mobilizacións

Esquerda Unida, a través da súa Área Federal de Educación, que coordina Enrique Díez, vai relanzar co inicio do novo curso político e escolar a campaña federal posta en marcha por IU en contra da Lei Orgánica para a Mellora da Calidade Educativa (LOMCE), que se encontra en fase de tramitación parlamentaria de emendas parciais no Congreso, para esixir a súa retirada así como o cesamento do ministro do ramo, José Ignacio Wert.
Esquerda Unida sostén que a LOMCE "expulsará do sistema ao alumnado con máis dificultades socio-económicas" e promoverá "un modelo educativo clasista, que aposta pola segregación temperá, estigmatiza a diversidade educativa e ataca a educación inclusiva e a coeducación, mantendo a relixión na escola e negando a participación da comunidade educativa,".
Díez considera que a LOMCE "pretende enmascarar os recortes e a decidida vontade do Goberno de Mariano Rajoy de desmantelar a Educación Pública, na súa intención de impoñer un modelo educativo regresivo".
Por iso, IU dará este novo curso un impulso á súa actividade de difusión e debate en todo os ámbitos públicos das alternativas que formula, xunto a organizacións e colectivos cos que comparte formulacións. Ademais, coordinarase coas Plataformas pola Escola Pública e Laica para organizar mobilizacións unitarias nas distintas comunidades autónomas.
"Queremos xuntar vontades e impulsar amplas mobilizacións que forcen ao Goberno do PP a promover un debate público, con participación de todos os sectores do ámbito escolar, sobre as necesidades reais do noso sistema educativo", sinala o coordinador da Área de Educación.

Ningún comentario:

Publicar un comentario