Os cartos para libros de texto volven escasear en Educación

Como cada ano dende a fin do programa de préstamo universal de libros de texto, os cartos escasean na Consellería de Educación. O departamento que dirixe Jesús Vázquez vén defendendo a súa polémica medida, presentada baixo o alcume de Gratuidade Solidaria, como unha acción "en consonancia co apolítica de austeridade do Goberno da Xunta" e que, ademais, forma parte das "actuacións para a igualdade no exercicio do dereito á educación". A segunda premisa vén sendo desmentida pola vía dos feitos, toda vez que o 35% do alumnado non recibe axudas, segundo datos oficiais, mentres que as comunidades educativas se organizan para manter o préstamo que antes proporcionaba o Goberno. A primeira, a económica, tampouco semella ser moi firme.
O Diario Oficial de Galicia deste venres publica unha orde da Consellería destinada a "incrementar o importe para financiar as axudas para a adquisición de libros de texto, materiais curriculares e material didáctico e complementarios". A razón non é unha aposta por inxectar máis cartos no sistema educativo, senón porque o diñeiro asignado previamente non chega. Como informou Praza Pública, o pasado xuño Educación convocou os subsidios para o curso 2013-2014 cunha rebaixa do 8% a respecto dos anteriores e agora decátase de que "o importe asignado non é suficiente para atender os compromisos adquiridos ao abeiro da convocatoria". Así, aos 16,2 millóns de euros previstos inicialmente súmanse agora 2,6 millóns máis, chegando aos 18,8.

Os cartos consignados son un 30% que nos últimos Orzamentos do bipartito, que financiaban o programa de préstamo universal

Non é, nin moito menos, a primeira vez que isto sucede. No curso anterior, o 2012-2013, a Consellería convocara as axudas cunha dotación total de 17,6 millóns de euros e a finais de 2012 tivo que anunciar tamén que o orzamento non abondaba. Daquela incrementou o crédito das axudas en 1,8 millóns de euros, quedando o montante total en 19,4. Do mesmo xeito, no curso 2011-2012, cando a "gratuidade solidaria" aínda non estaba implantada por completo, o crédito  inicial ascendía a 9,21 millóns e houbo que amplialo en 2,9 millóns máis por idéntico motivo.
Estas sucesivas ampliacións de créditos por ser insuficiente a consignación inicial non só amosan o que xa semella ser unha práctica contable habitual da Consellería, senón que pon en cuestión o suposto aforro do novo sistema de axudas parciais. Segundo os derradeiros Orzamentos do bipartito, os de 2009, a partida de "fondos bibliográficos-gratuidade de libros de texto" ascendía a 14,4 millóns de euros e permitía sufragar os manuais para todo o alumnado dos centros sostidos con fondos públicos. Este ano a cantidade é un 30% superior e implica que moitas familias teñan que poñer cartos do seu peto. Malia todo, o propio presidente da Xunta referiuse a este sistema de axudas durante o debate de política xeral como un exemplo de que "os galegos sabemos que se todos os que podemos achegamos algo, acadaremos a suma necesaria para axudar aos que non poden".