luns, 14 de outubro de 2013

O sindicato maioritario dos centros concertados súmase á folga do 24 de outubro

A Federación de Sindicatos Independentes de Ensino (FSIE), maioritaria na educación privada concertada, convocou folga para o 24 de outubro, en coincidencia coa anunciada polas principais organizacións laborais do ensino público para ese mesmo día.
Segundo FSIE, a reforma educativa, que onte aprobou o Congreso, ''empeorou" cuestións importantes para a actividade de docentes e outros traballadores dos centros concertados, á parte da conxelación salarial de 2014 e a consolidación dos "duros recortes" que veñen padecendo o sector.
A Lei Orgánica para a Mellora da Calidade Educativa (Lomce) ten un futuro "incerto" e foi tramitada e elaborada "de costas á educación concertada", segundo di o secretario xeral de FSIE, Jesús Pueyo, nun comunicado.
Sen consenso, a súa aplicación e duración estará condicionada á permanencia no goberno do partido que a promove (PP), argumenta, e novamente os alumnos, os profesionais e os centros serán os "grandes prexudicados", xa que o sistema educativo ''seguirá sen ter estabilidade".

Ningún comentario:

Publicar un comentario