A Comisión de Cultura e Educación do Parlamento Europeo aprobou por
unanimidade, este 18 de xuño de 2013, o Informe sobre as linguas europeas ameazadas de desaparición e a
diversidade lingüística na Unión Europea. Trátase dunha proposta de
resolución, que será votada polo Pleno do Parlamento o vindeiro mes de setembro,
na que se insta a todos os gobernos membros da UE a que implementen políticas de
preservación da diversidade lingüística da Unión e de revitalización dos idiomas
ameazados en todos os ámbitos sociais (nomeadamente nos medios de comunicación,
a cultura e o ensino). Así mesmo, ínstase tamén á Comisión Europea e ao Consello
a aprobar programas de apoio financeiro para proxectos de promoción das linguas
minorizadas
Os eurodeputados recordan que a diversidade lingüística e cultural é un dos
principios fundamentais da Unión Europea e consideran que "numerosas" linguas
europeas deben ser consideradas como linguas "ameazadas de desaparición", polo
que instan a tomar medidas.
Tamén piden aos Estados membros e ás institucións europeas que "sexan máis
conscientes da grave ameaza que pende sobre o futuro de numerosas linguas en
Europa" e reclaman esforzos para salvagardar e fomentar a diversidade do
patrimonio lingüístico e cultural da UE, por exemplo apoiando "ambiciosas
políticas de salvagarda no seo das comunidades afectadas".
Neste sentido, apostan por empregar os fondos que permita a UE no período
2014-2020 para apoiar estas linguas a través de programas para educación e
formación ou para xuventude e deporte, dos fondos estruturais e de cohesión ou
doutros instrumentos relacionados coas novas tecnoloxías e as plataformas
multimedia.
Ademais, postulan que a UE avale os programas que permitan "a adquisición de
dúas linguas maternas dende a infancia" porque axudará á persoa na aprendizaxe
ulterior doutros idiomas e porque ofrecería un respaldo concreto para
"revitalizar a transmisión interxeracional alí onde estea ameazada".
A resolución da Comisión de Cultura europarlamentaria sinala que os programas
de multilingüismo da Comisión poderían tamén beneficiar as linguas minoritarias
e pide que non se discrimine os plans con pouco financiamento, porque "as
comunidades lingüísticas que loitan por salvagardar unha lingua ameazada de
desaparición son a miúdo grupos de poboación débiles numericamente".
Revitalización lingüística
"Unha política de revitalización lingüística é unha obra de longo alento, que
debe apoiarse nunha programación de medidas diversificadas e coordinadas en
varios ámbitos, coma os medios de comunicación, a creación cultural ou a
educación (incluída a preescolar), e en todas as formas da vida pública", engade
o texto.
A posición, avalada por unanimidade na comisión de cultura do Parlamento
Europeo, será sometida ao voto do Pleno previsiblemente tras o parón estival, e
inclúe varias emendas da eurodeputada do PNV, Izaskun Bilbao, e do eurodeputado
de CiU Ramon Tremosa.
Entre as emendas figura que se inclúa na definición de linguas en perigo de
desaparición aquelas que o están en parte do territorio en que son propias,
aínda que dispoñan de protección noutras zonas do continente e teñan ou non
recoñecemento oficial, para recoller a situación que se dá "en varias zonas
transfronteirizas europeas", segundo informaron os autores da emenda nun
comunicado.
Para a eurodeputada do BNG Ana Miranda, un dos aspectos máis relevantes do
informe está "na énfase coa que recomenda apoiar medidas que favorezan a
adquisición de dúas linguas maternas dende a infancia", citando expresamente a
educación preescolar e subliñando que este tipo de programas "favorece a
adquisición posterior doutras linguas".
Información tirada de Galicia Hoxe e de Praza Pública.
Ningún comentario:
Publicar un comentario