Máis persoas xubiladas que mozas en 216 concellos do país

Os dados do IGE reflicten un descenso poboacional de máis de 14 mil persoas en 2014, máis persoas xubiladas que mozas en 216 concellos e máis de 3 mil núcleos poboacionais con menos de dous habitantes ou ningún. 

O Instituto Galego de Estatística (IGE) fixo públicos as cifras de poboación correspondentes ao 1 de xaneiro de 2014. Os dados deixan en evidencia os principais tazos da crise demográfica que atinxe Galiza.
Segundo o IGE, no noso país había a comezos do pasado ano 2.747.226 habitantes. Isto é, o censo poboacional reduciuse en 14.744 persoas a respecto do ano anterior. Neste senso, de acordo cos dados fornecidos polo mesmo organismo, en Galiza faleceron en 2013 30.433 persoas e só naceron 19.727.

O censo poboacional reduciuse en 14.744 persoas con respecto ao 2013

Este feito sitúa o noso país cun saldo vexetativo negativo --unha tendencia que se mantén desde 1986. En comparanza cos demais territorios do Estado español Galiza encabeza o ránking con -10.706. Unha cifra substancialmente superior á segunda comunidade, Castela e León (-9.680) e radicalmente inversa á de lugares como Catalunya (10.784) ou Madrid (22.950).
Desde esta perspectiva fica en evidencia que a poboación galega se caracteriza por un forte avellentamento, como reflicte a súa pirámide poboacional. A 1 de xaneiro de 2014 e, segundo o IGE, 216 concellos galegos --dun total de 314 após a fusión de Oza e Cesuras-- posúen unha maior porcentaxe de poboación con máis de 65 anos do que de menores de 19. Este feito tradúcese nunha pirámide invertida que camiña en dirección completamente oposta á dun país saudábel en termos demográficos. 

((Preme na gráfica para despregar))

Esta tendencia reprodúcese e faise máis aguda no interior das provincias de Ourense e Lugo, no entanto, non é exclusiva do rural nen do interior do país. Das sete cidades galegas tan só Pontevedra posúe unha pirámide cunha base --infancia e mocidade-- máis ancha que o cumio --como tamén acontece en localidades próximas á Coruña. En total, só 21 municipios galegos contan cunha poboación moza que garanta, en termos económicos, o benestar ás xeracións que @s precederon.

En Galiza hai máis de 3 mil lugares despoboados ou en risco de o estaren de xeito inminente

Entre 2003 e 2013 --os últimos dados comparados polo IGE-- a cifra de habitantes con menos de 20 anos pasou do 17,10% ao 15,80%. Entrementres, a poboación maior de 65 anos continuou en ascenso do 21,30% ao 23,10%.
O avellentamento carrexa, inevitabelmente, o despoboamento poboacional de Galiza. Segundo os dados recompilados polo analista Carlos Neira através do INE, e cos que elaborou un mapa interactivo, no 2013 en Galiza existían "máis de 3.000 lugares despoboados ou en risco de o estaren de xeito inminente (menos de 3 habitantes)". No concreto, 3.679 núcleos de poboación "case un 10% das entidades singulares de poboación de Galiza" entre os que 1.547 non contan con ningún habitante; 838 só cunha persoa e 1.093 con dúas. Os 201 lugares restantes careceron de persoa algunha nalgún intre ao longo dos últimos 15 anos.

 

Artigos relacionados (2)

• "O avellentamento poboacional non mudará se non logramos frear a emigración"
• Entre a emigración e a precariedade, as opcións laborais da mocidade galega