CCOO denuncia a «improvisación» da Consellaría de Educación e a «falta de respecto» ao profesorado pola avaliación de primaria

• A día de hoxe, o sistema de xestión de datos XADE non permite que os profesores e profesoras poidan cubrir a avaliación por competencias

A Federación do Ensino de Comisións Obreiras de Galicia (CCOO-Ensino) denuncia a «improvisación» da Consellaría de Cultura, Educación e Ordenación Universitaria e «a falta de respecto» da Administración educativa ao profesorado. O sindicato critica que se publicase «tarde» (só doce días antes de rematar o curso) a orde de avaliación da educación primaria e, «aínda por riba», que o sistema XADE (a aplicación informática para a xestión de datos) non permita introducir as avaliacións por competencias a que obrigan tanto a devandita Orde como a LOMCE.

Pantalla de inicio de sesión no sistema XADE

CCOO-Ensino púxose en contacto coa Consellaría, pero unicamente tivo como resposta que «aínda non teñen claro» cando se poderán introducir estes datos no sistema. Pola contra, a interface do propio XADE amosa unha mensaxe que advirte que a dita opción previsiblemente estará dispoñible na primeira semana de xullo.

A Federación do Ensino de CCOO xa denunciara no seu día que a publicación da Orde de avaliación de primaria chegaba tarde e obrigaba o profesorado a adaptar sobre a marcha os documentos de avaliación da etapa. A queixa sindical vese confirmada pola imposibilidade de facer efectivos uns documentos no sistema de xestión que ha recoller o historial do alumnado —e que o acompañará por traslado de centro ou cambio de etapa educativa.