O sector da Enxeñaría Informática esíxelle ao Goberno un axeitado recoñecemento profesional

O sector da Enxeñaría Informática está a redobrar esforzos, a nivel estatal, na defensa da profesión. O obxectivo: que o Goberno, ante novas regulacións en curso, “recoñeza a cualificación profesional” das enxeñeiras e dos enxeñeiros en Informática. Para as organizacións que integran os diferentes colexios e entidades autonómicas (o CCII e o CONCITI), é o intre de xuntar forzas para esixir do Executivo “solucións urxentes” tralo informe emitido polo Ministerio de Industria no que se exclúe ao devandito sector respecto das enxeñarías no Recoñecemento de Cualificacións Profesionais. Ás voces das organizacións CCII e CONCITI uníuselles a fronte académica (CODDII) e os representantes dos estudantes (RITSI). Este venres terán unha xuntanza en Madrid para determinar as medidas a tomar antes unha situación que cualifican de preocupante. Non se desbotan mobilizacións e mesmo convocatorias de folga dos profesionais do sector.
Sinalar que o CONCITI conta con representación galega a través do Colexio Profesional de Enxeñaría Técnica en Informática de Galicia, o CPETIG, e que o CCII integra no seu seo ao Colexio Profesional de Enxeñaría en Informática de Galicia, o CPEIG.
A raizame da situación, aínda que vén de antigo e baixo outras formas (as reclamacións dos consellos e colexios a prol da defensa da profesión levan anos facéndose ouvir, tanto dos nosos enxeñeiros técnicos como dos nosos enxeñeiros), está no último informe emitido polo Ministerio de Industria, Enerxía e Turismo sobre a modificación do Real Decreto 1837/2008 sobre Recoñecemento de Cualificacións Profesionais e que exclúe ao sector da Enxeñaría Informática. Esta exclusión desencadeou unha vaga de críticas e reclamacións dos profesionais, estudantes e colectivos do sector.
O pasado 9 de marzo representantes do Consello Xeral de Colexios Profesionais de Enxeñaría en Informática (CCII e CONCITI) e directores e decanos de Enxeñaría Informática (CODDII) reuníronse con representantes da Secretaría de Estado de Telecomunicacións e para a Sociedade da Información (SETSI) do Ministerio de Industria, Enerxía e Turismo, para tratar o documento de alegacións ao redactado do Real Decreto e co fin de “liquidar a anormal situación de recoñecemento dos profesionais da informática”, así como para “evitar unha nova discriminación respecto ao resto de enxeñarías na posta en marcha da Tarxeta Profesional Europea”. Os profesionais, representados polos consellos CCII e CONCITI (respectivamente os Consellos Xerais de Colexios Profesionais de Enxeñaría Informática e Enxeñaría Técnica Informática), os centros universitarios, representados por CODDII (Conferencia de Directores e Decanos de Enxeñaría Informática) e os estudantes, representados por RITSI (Reunión de Estudantes de Enxeñarías Técnicas e Superiores en Informática), trasladaron hai meses ao Goberno, e en particular ao Ministerio de Industria, as súas propostas respecto da devandita tarxeta: non só para facilitar a súa mobilidade en Europa en igualdade de condicións con respecto aos profesionais doutros estados membros, senón en relación ao resto de enxeñeiros españois doutras especialidades.
No informe emitido agora polo Ministerio, informan os consellos, de novo exclúense medidas para “solucionar a situación da Enxeñaría Informática”. Trátase, en palabras da fronte común do sector, “dun inxustificábel veto por parte da Secretaría de Estado do Ministerio para solucionar este problema”.
Segundo o presidente do Consello Xeral de Colexios Oficiais de Enxeñaría Técnica en Informática, o galego Marcos Mata, “a situación actual está a incrementar cada vez máis os agravios, tanto a nivel profesional como académico, que vén sufrindo o noso colectivo a pesar de ser a segunda titulación de enxeñaría con máis profesionais titulados. É preocupante e triste a indiferenza que exhibe o Ministerio de Industria coa nosa profesión e mire cara a outro lado malia que os nosos profesionais son o motor da transformación dixital que necesita a sociedade española”.
Segundo o presidente do Consello Xeral de Colexios Profesionais de Enxeñaría en Informática, Juan Pablo Peñarrubia, “resulta alarmante que aínda non se haxa resolto esta situación nun sector tan importante para a competitividade. Os profesionais reclamamos solucións que corrixan a actual situación anormal e discriminación respecto ao resto de enxeñarías e a ameaza de penalización do noso profesionais respecto ao resto de Europa”.