A Feira de Innovación para o Emprego abre portas con 142 ofertas laborais

Estes días estase a celebrar en Santiago, no Palacio de Congresos, a Feira de Innovación para o Emprego, edición 2016. Trátase dun escenario referencial para o encontro (e a comunicación) entre empresas e estudantes, entre contratadores e demandantes de emprego, entre quen ten un proxecto tecnolóxico en mente e quen ten os recursos para convertelo en realidade. A FIE, que vén da man da Concellería de Desenvolvemento Económico (co obxectivo de “dotar de ferramentas e recursos 2.0 ás persoas participantes”) está a xestionar arestora arredor de 150 ofertas. O encontro (que comezou onte e se estende até hoxe) foi inaugurado polo alcalde Martiño Noriega e máis concelleira de Igualdade, Desenvolvemento Económico e Turismo, Marta Lois.
A concelleira aproveitou a súa estadía na FIE para presentar os premios INDEA, que se convocan dende o Goberno local co obxectivo de "potenciar ideas colaborativas para o emprego que proveñan do diálogo entre a cidadanía, os axentes económicos e sociais, e a comunidade educativa, en especial da Universidade e a formación profesional". Trátase, máis polo miúdo, dun certame concibido como un reto: un convite para os profesionais de Santiago e contorna (axentes territoriais, actores da USC e centros de FP, etc) poidan crear os escenarios axeitados para que haxa máis e mellor colaboración e solidariedade arredor da xeración de emprego.
Como dixemos, a FIE xestiona 142 ofertas de emprego procedentes de 82 empresas ofertantes. Segundo fixeron saber o alcalde e a concelleira, estas cifras confirman o potencial da feira “como punto de encontro entre as compañías ofertantes e os profesionais que buscan un posto de traballo”, e tamén consolidan a capacidade do foro para formaren a uns e outros nas redes sociais e nas novas ferramentas de busca e achega de emprego. A FIE rexistrou máis de 3.300 inscricións nas ofertas e máis de 900 currículos enviados.
Durante os dous días de celebración do foro hai máis de 700 inscritos nas actividades formativas e máis de 1.000 nos cursos previos levados a cabo, relacionados coas novas tecnoloxías e a marca dixital na busca de emprego, vía e-learning e webinar.
No marco do foro estase a formar aos participantes en cousas como o uso dos portais de emprego de maneira eficaz (Infojobs ou Infoempleo) ou en plataformas como Womenalia, a primeira rede mundial de mulleres profesionais, ou BeBee, nova e exitosa rede social de networking.
As persoas participantes poden concorrer ademais en obradoiros prácticos sobre as redes sociais Pinterest, Google +, Instagram, Linkedin, Twitter ou Facebook.
Tamén haberá obradoiros de emprego de diversas plataformas como re.vu ou visualize.me para facer un CV infográfico e atopar traballo grazas á creación dunha marca persoal “dunha forma entretida e atractiva”, sinalaron os organizadores da FIE, que engadiron que esta feira está a servir, igualmente, para levar acabo actividades de introdución ás posibilidades laborais de Vime ou YouTube, ou para formar aos demandantes na creación de vídeo currículos.
Marta Lois salientou que “o foro é un espazo de aprendizaxe e de coñecemento e recoñecemento de distintos soportes, portais e ferramentas para que as persoas demandantes de emprego poidan atoparse coas ofertas que máis se axustan ao seu perfil”.