A ANPA do Golmar acepta unha reunión coa Xunta, pero prepara mobilizacións

O encontro co xefe territorial será o día 12 -A edil de Cultura irrompe na asemblea.

A ANPA do colexio Xesús Golmar de Lalín mantén o seu pulso coa Consellería de Educación nas súas demandas para o centro. Onte á noite celebrouse unha asemblea extraordinaria na que os pais debían dar a súa opinión sobre as medidas a tomar para esixir a construción dun patio cuberto, celosías na planta alta para poder ventilar as aulas, evitando así as altas temperaturas ou a cobertura de toda a demanda das prazas de comedor.
O encontro celebrouse pese ao ofrecemento da xefatura territorial dunha reunión para finais de mes, á que a ANPA presidida por Elizabeht Igrexas respondeu que a asemblea xa fora convocada. Pero onte pola mañá desde o departamento que dirixe César Pérez Ares volveron contactar cos pais para adiantar a reunión ao próximos martes 12. Igrexas e a súa xunta directiva aceptaron este encontro, pero sen rexeitar á organización de dúas concentracións diante do centro, para as que xa se están tramitando as preceptivas autorizacións. Porque os pais o que desexan é un compromiso por escrito para as súas demandas e, no caso de que Pérez Ares non garanta as súas esixencias, convocaranse os actos de protesta para os días 18 e 20 deste mes.
Entre os presentes causou malestar a irrupción da concelleira de Cultura -tamén profesora no colexio- María Álvarez, quen tomou a palabra para indicar á directiva que as relacións co concello sempre foran fluídas. "Dixo que a visera na zona de Infantil pagaríaa a Deputación e que tamén estaban previstas as celosías, algo que non sabiamos", comentaban desde a directiva da ANPA: Sobre o patio cuberto a edil dixo que existen outras prioridades como as deficiencias do colexio de Prado. Algúns dos presentes reprochoulle que admitise agora os problemas do Xoaquín Loriga, que transcenderon hai semanas.