martes, 29 de abril de 2014

Entidades pola educación inclusiva denuncian os efectos dos recortes da Xunta no ensino

Os recortes orzamentarios levados a cabo nos últimos ano pola Consellaría de Educación están a provocar graves prexuízos ás nenas e nenos con diversidade funcional nos centros de ensino de Galicia, dificultando moito a educación inclusiva e de calidade que o Estado está obrigado a proporcionar. É unha advertencia de tres entidades sociais: a Oficina de Vida Independente de Galicia (Vigalicia), a Asociación Solcom para a solidariedade comunitaria das persoas con diversidade funcional e a inclusión social, e a Asociación de pais de nenos e persoas con discapacidades das mariñas coruñesas (Dismacor), que parten da denuncia dun caso particular, pero que alertan de que a situación é común a todo o país e que está a afectar a milleiros de rapaces e rapazas e as súas familias.
Arturo é un neno con autismo escolarizado no CEIP Salgado Torres da cidade, un centro de escolarización preferente para nenos con TGD e que, polo tanto, debería estar perfectamente dotado para atender adecuadamente estes nenos. O traslado da súa titora a outro centro e a chegada dunha nova docente mudou completamente a súa situación, que até ese momento era boa, sen conflitos e cunha integración máis que aceptable. O centro modificou o sistema de ensino de forma unilateral e sen informar os pais, e ao neno retiráronlle os apoios visuais da aula. Ante as protestas da súa nai, os responsables do colexio recoñeceron que non dispuñan de formación nin de persoal especializado para realizar correctamente o seu traballo.
"O caso de Arturo é un máis dos moitos que ultimamente se dan nos colexios públicos de Galicia e que están directamente relacionados coa diminución de orzamentos para a educación"
Ante a situación de estrés creada, en novembro médicos do Sergas recomendaron a desescolarización de Arturo. Posteriormente o Director Xeral de Educación da Xunta de Galicia propúxolles aos pais trasladar a Arturo ao colexio no que traballa na actualidade a pedagoga terapéutica que tan vos resultados acadase no pasado. Ante este proposta, os pais de Arturo non puideron máis que rexeitala xa que: “o neno non pode cambiar continuamente de colexio seguindo aos seus docentes”. A día de hoxe, Arturo voltou á aula "pero segue a ter medo e a súa inclusión segue a ser pouco satisfactoria", segundo estas entidades, que tamén denuncian que a Consellería de Educación da Xunta de Galicia non tomou ningún tipo de medida ao respecto que permita mellorar a calidade de vida do neno.
"A Administración pública coñecedora do empeoramento clínico do neno parece optar por mirar para outro lado, vulnerando así o seu dereito a unha educación inclusiva e de calidade"
As tres asociacións denuncian que "o caso de Arturo é un máis dos moitos que ultimamente se dan nos colexios públicos de Galicia e que están directamente relacionados coa diminución de orzamentos para a educación dende o comezo da crise". Engaden que "é obvio que si se retira persoal cualificado que lles proporcione aos nenos o trato individualizado e específico que precisen, os que máis van notar os resultados na súa evolución son os propios nenos e, por ende, o seu entorno máis cercano". Ante esta situación, conclúen, "a Administración pública coñecedora do empeoramento clínico do neno parece optar por mirar para outro lado, vulnerando así o seu dereito a unha educación inclusiva e de calidade tal e como se reflicte no artigo 24 da Convención Internacional sobre os dereitos das persoas con diversidade funcional promovida pola ONU no ano 2006, e poñendo en risco a saúde do rapaz".
"A Consellaría de Educación considera que a vida de Arturo, a súa saúde e integridade, facerlle pasar un calvario, non valen 200 euros"
"Pasamos moito medo por Arturo", afirma a súa nai, Esther Cuadrado, "non quero verme nunha rolda de prensa como lles pasou a outros pais, cando as consecuencias para o meu fillo sexan irreversibles". Acusa, ademais, á Consellaría de Educación de "responder dende a indolencia e o pleno convencemento de que non todos os nenos teñen os mesmos dereitos". "Ao meu fillo retiráronlle as adaptacións que necesita porque a Consellaría de Educación considera que a vida de Arturo, a súa saúde e integridade, facerlle pasar un calvario, non valen 200 euros. A solución é sinxela: persoal formado e 200 euros", di. E engade que "parece xusto reclamar que cos cartos dos impostos da miña familia se faga unha política pública que trate a todos, tamén ao meu fillo, como cidadáns de pleno dereito, en definitiva como persoas".

Ningún comentario:

Publicar un comentario