CEAPA esixe ás Comunidades Autónomas gobernadas por partidos
diferentes ao do goberno en funcións, que sexan consecuentes cos seus
compromisos coa comunidade educativa.
Levamos máis de 4 anos loitando para que non se implante neste país
unha lei de educación segregadora, inxusta e clasista pero a cerrazón do
goberno en funcións, unha vez máis, obríganos a tomar medidas
indeseadas ante unha situación de indefensión para os nosos fillos e
fillas.
A práctica totalidade dos partidos políticos aprobaron unha
proposición non de Lei no Congreso para paralizar o calendario de
implantación da LOMCE. Un goberno en funcións, que de forma canto menos
dubidosa en democracia, non só non se someteu ao control da cámara senón
que fai, como sempre, oídos xordos ao que ocorre no país que gobernou e
ao que decide a cámara de representantes elixidos por todos os
españois, non ten autoridade moral nin ética para seguir tomando
decisións en contra do aprobado pola maioría dos Deputados e Deputadas. O
Ministro tenta maquillar a realidade, pero a sociedade en xeral, e as
familias en particular, teñen que saber que a LOMCE recolle que o
alumnado que non supere as reválidas, nuns casos non titula, como
ocorrerá na ESO e Bacharelato, e noutros, como na proba de 3º de
Educación Primaria e a Avaliación Final de 6º, levará o seu expediente
lastrado polos resultados que conseguise.
No noso sistema educativo, as nosas fillas e fillos xa son sometidos a
exames suficientes - máis ben excesivos- como para que o profesorado
teña a información necesaria para avaliar os seus coñecementos, pero
polo que parece, a intencionalidade do Goberno anterior e agora en
funcións é poñer un camiño de probas, competicións, trabas e rivalidades
para illar aos máis desfavorecidos e apartalos do sistema, aproveitando
á vez para segregar ao alumnado por centros e categorías.
O último paso dado polo Goberno para implantar as reválidas, foi
publicar a resolución cos cuestionarios de contexto que deberán encher
familias e alumnado.
CEAPA considera que as intencións do Goberno en funcións ao publicar
esta resolución van en contra dos dereitos tanto das familias como do
alumnado e vulnera o dereito á intimidade das familias e os dereitos do
menor ao someterlle a unha tensión innecesaria por obrigarlle a
responder preguntas que teñen un carácter manipulador con intención de
culpabilizar dos problemas da educación tanto ao alumnado, familias ou
aos docentes.
CEAPA cre que a intencionalidade dos cuestionarios é segregar ás
familias e ao alumnado dependendo da súa situación económica, social,
nacionalidade, laboral e formativa, facéndolles responsables dos
resultados do sistema educativo, con intención de desviar a atención
sobre os efectos demoledores que supuxeron os recortes, ademais de facer
sesgadamente o ránking de centros que, a última hora, o Ministro de
Educación, xa en funcións, dixera que non faría.
Os datos persoais das familias xa os ten a administración tanto nas
declaracións de Facenda das familias como nos impresos de matrícula e,
por tanto, CEAPA pide ás súas familias da escola pública que non axuden a
facer os ránkings que segreguen aos seus fillos e fillas e atacan o
concepto de igualdade.
Nin as familias nin o alumnado son culpables do fracaso educativo. O
son as diferentes administracións que non apostan pola educación e
detraen das súas partidas orzamentarias os recursos que se necesitan
para levar a cabo un labor educativo adecuado en atención á diversidade,
gratuidade, contratación de docentes e especialistas.
O éxito escolar non debe depender da nacionalidade do alumnado, a
situación laboral da súa familia, a cor da súa pel, onde nacese, dos
estudos dos seus pais, de se reside preto dun centro escolar, das
crenzas da súa familia, do tipo de familia que sexa, da orientación
sexual ou do número de membros da familias. A educación pública debe
superar calquera carencia de orixe, calquera situación de desigualdade e
aceptar a diversidade como algo bo, enriquecedor e propio da nosa
sociedade.
CEAPA cre que ningunha resolución pode vulnerar o dereito á
educación, os dereitos dos menores e das familias e respecto da
publicada o día 30 de marzo CEAPA considera que se vulneran, e, por iso,
pide ás súas familias que non enchan os cuestionarios que lles presente
o centro educativo, limitándose a asinalos e poñendo unha anotación
pedíndolle ao Ministerio que recade os datos dos arquivos
correspondentes e para as preguntas nas que se require a súa opinión ou a
dos seus fillos e fillas, que a súa opinión persoal gárdanlla para
cando teñamos un goberno que escoite o que dicimos xa que o actual non o
fixo en 4 anos e medio de mandato.
CEAPA esixe aos gobernos das CCAA que apoiaron a PNL aprobada no
Parlamento e que pedía a paralización da implantación da LOMCE, sexan
consecuentes co seu voto e regulen as reválidas de tal forma que non
afecte nin anímica nin academicamente ao alumnado xa que teñen
competencias para poder facelo.
Ningún comentario:
Publicar un comentario