Centos de mans por unha mellor atención educativa para o alumnado con enfermidades

O pasado sábado centos de nenos, nenas, nais e pais participaron en Malpica nunha cadea humana organizada pola Confederación Anpas Galegas reclamando unha nova normativa sobre atención educativa hospitalaria e domiciliaria. Na mobilización participaron Nieves Villar o seu fillo Hadrián, que veñen personalizando no seu caso esta reivindicación e esta problemática, que afecta a moitos outros rapaces e rapazas en Galicia.
En outubro a situación de Hadrián Antelo saltou ás portadas do medios, un rapaz de once anos que sofre leucemia e para o que a súa familia reclamaba unha mellor atención educativa, entendendo que o ensino debe ser garantido en condicións de igualdade pola Administración. A loita de Hadrián e a súa familia fixo que semanas despois a Xunta reaccionase, activando a Consellería Educación o Protocolo de Atención Educativa Domiciliaria, que permitirá impartir aulas nas súas casas aos alumnos que falten máis dun mes ao colexio por unha longa enfermidade. Unha medida positiva pero que a familia de Hadrián e outras xulgaron insuficiente.
Este sábado en Malpica demandouse que a Consellaría convoque "unha mesa na que estean presentes familias, profesionais da educación que agora mesmo están atendendo a estas nenas e nenos, profesionais da saúde, profesionais da educación que forman aos profesionais que atenden a estas nenas e nenos, técnicos da administración educativa e a todos aqueles sectores da sociedade que sexan necesarios, para que entre todas e todos elaboremos unha normativa acorde á realidade e as necesidades das nosas fillas e fillos". Unha normativa que "garanta dereitos concretos e procedementos claros".
Lembrouse, así mesmo, a loita desenvolvida durante os anos 2001 e 2002 na cidade de Vigo e a súa comarca "por familias cuxas fillas e fillos estaban a padecer o abandono educativo que hoxe denunciamos", unha mobilización que logrou que a administración educativa galega "recoñecera o dereito a atención educativa hospitalaria e domiciliaria de todas as alumnas e alumnos que non podían asistir ás aulas por mor dunha longa enfermidade ou dunha lesión".
O manifesto final criticou o “protocolo para a atención educativa domiciliaria” aprobado pola Consellaría, "un documento que dedica cinco páxinas a tratar a atención domiciliaria, esquecéndose completamente da hospitalaria e que non achega absolutamente nada ao que agora temos que é: nenas e nenos que dependen educativamente do esforzo individual e voluntarista de profesionais sen medios, sen recursos, sen apoios e sen contacto entre eles". E esixiu que a Xunta "blinde este dereito fundamental, ampliando a regulación e establecendo dereitos concretos e procedementos obrigatorios para as distintas administracións".

No texto tamén se fixo un recoñecemento destacado á loita de Hadrián e a súa familia, sobre todo a súa nai Nieves, "polo seu enorme esforzo e polo exemplo de solidariedade na procura deste obxectivo común". "Grazas pola vosa disposición incondicional a encabezar esta loita que é de todas e de todos", salientouse.