A xeración do 98, Buero Vallejo ou 'La Fundación', protagonistas da primeira xornada de selectividade en Galicia

Normalidade na primeira das sesións de exames, que arrincou coa proba de Lingua Castelá e Literatura II. O longo día continúa coas probas de Historia de España e Historia da Filosofía, Lingua Galega e literatura e Lingua Estranxeira. Será o xoves cando arrinquen as probas específicas de cada rama. Entre os estudantes, moitos nervios, repasos de última hora e ilusión ante as portas da Universidade abertas de cara ao próximo curso. Iso si, tras as probas toca armarse de paciencia e esperar unha semana, ata o día 19, polos resultados provisionais

O arranque das probas de acceso á universidade na comunidade galega caracterizouse pola normalidade no transcurso dos primeiros exames, nos que os alumnos tiveron que mostrar os seus coñecementos sobre a xeración do 98 ou a figura de Buero Vallejo e o teatro posterior á Guerra civil.

De acordo con informacións de Europa Press, tras a presentación habitual das xornadas de selectividade e os típicos nervios dos mozos durante a espera ao comezo das probas, os exames arrincaron este mércores con Lingua Castelá e Literatura II, ás 10.00 horas, no que, como é habitual, os aspirantes podían escoller entre dúas opcións a realizar, unha en cada cara.

A primeira delas presentaba un texto de Paulino Castells publicado en La Vanguardia, no que argumentaba sobre a problemática da cada vez maior dedicación dos mozos aos televisores, os computadores e demais aparellos electrónicos, que substituíron cada vez máis o contacto físico e o tempo dedicado ás persoas "de carne e óso".
A outra opción, propuña un texto de Marcos Balfagón de El País que abordaba a cambiante situación económica de moitas persoas, cuxa caída obrigoulles a buscar xeitos de sobrevivir, como durmir na terminal de Barajas, para non vivir entre cartóns na rúa.
Ambas as propostas estaban acompañadas das súas respectivas preguntas de léxico, resumo e comentario crítico. A maiores, incluían cuestións de carácter ortográfico e sintáctico, como transformar a estilo indirecto, ou buscar oracións impersonais.
Xa na vertente máis teórica da proba, preguntábanse certos aspectos dunha obra en base a un fragmento que se incluía en cada unha das opcións, neste caso Crónica de una muerte anunciada e Plenilunio. Ademais, preguntábase polos trazos formais de Campos de Castilla, argumento e temas de La Fundación, ou as principais características do Romanticismo e identificar o movemento, grupo ou época de varios autores, como Cela e Cortázar.
Finalmente, as opcións concluían coa figura de Buero Vallejo no teatro español posterior á Guerra Civil e a Xeración do 98: Baroja, Unamuno e Azorín.


"ERA O ESPERADO". Dous das mozas que se atopaban facendo os exames na Facultade de Medicina de Santiago, Eva e María, sinalaron a Europa Press que estaban "moi contentas" tras as primeiras impresións da selectividade, dado que o primeiro exame "non era tan difícil" como se esperaban, aínda que a unha delas faltoulle algo de "tempo".
Tamén destacaron as "moitas horas" de estudo que dedicaron para preparar estes exames, e as que quedan de "últimos repasos", co fin de conseguir "sacar o selectivo" para despois "ver todas as posibilidades" que teñen para continuar a súa formación.
Outros dous compañeiros, que incidiron que o primeiro exame "era o esperado" e foi "fácil", teñen máis claro o seu futuro, dado que as súas aspiracións son estudar Enxeñería informática e Química.

Intensas xornadas

A primeira das sesións de exames continuou coas probas de Historia de España e Historia da Filosofía (12.15 horas), Lingua Galega e literatura (16.00 horas) e Lingua Estranxeira (18.15 horas).
Ao día seguinte realizaranse os exames de Matemáticas II, Grego II e Técnicas de Expresión Gráfico-Plástica (09.00 horas); Ciencias da terra e ambientais, Literatura Universal e Deseño (11.15 horas); Química, Latín II e Debuxo Artístico II (13.30 horas); Bioloxía e Historia da arte (16.30 horas); e Electrotecnia, Matemáticas Aplicadas ás Ciencias Sociais, e Artes Escénicas (18.45 horas).
A terceira xornada de exames contará coas probas de Física, Xeografía e Análise Musical II (09.00 horas); Tecnoloxía Industrial II, Economía da Empresa (11.15 horas); e Debuxo Técnico II e Historia da Música e da Danza.
As cualificacións provisionais, segundo o calendario publicado pola CIUG, publicaranse o 19 de xuño, mentres que as notas serán publicadas o próximo 26 tras as resolucións das reclamacións.