A agricultura ecolóxica tira do campo galego

O sector segue medrando, xa supera as 16.000 hectáreas e factura 5,3 millóns de euros anuais.

A agricultura ecolóxica segue medrando en Galicia e acumula na última década un crecemento sostido: a superficie ecolóxica certificada xa superou este ano as 16.000 hectáreas, cun aumento do 50% en sete anos, o número de operadores subiu un 42% nos dez últimos anos, até os 732, e o volume de vendas creceu en 2014 un 20,48%, cunha facturación total de 5,3 millóns de euros. Os produtos que máis medran na certificación ecolóxica son leite e derivados, carne e produción avícola, conservas, peixe e pensos para alimentación animal, segundo datos do Consello Regulador da Agricultura Ecolóxica de Galicia (Craega).

Superficie inscrita

A superficie inscrita en agricultura ecolóxica viviu un crecemento importante dende o ano 1997, cando só existían 13,35 hectáreas en toda Galicia. Dez anos despois superábanse as 10.000 hectáreas, concretamente 10.985,03. Para o ano 2014 a superficie acadada xa era de 15.233 hectáreas, cun incremento do 50% nos últimos sete anos. E no primeiro cuadrimestre de 2015, a superficie seguiu medrando até as 16.236,75 ha. inscritas: un crecemento do 6,59% en catro meses que compensa o leve retoceso do pasado ano respect0 a 2013. “Isto é debido, en parte, ás novas axudas para a agricultura ecolóxica, que puxo en marcha a Consellería do Medio Rural no mes de marzo deste ano”, explica José Antonio Fernández, presidente de Craega.
Comparativa de superficie por provincias entre os anos 2013 e 2014 (variación en hectáreas e en porcentaxe):

	SUPERFICIE 2013	SUPERFICIE 2014	VARIACIÓN	% VARIACIÓN
A CORUÑA	1.620,79	1.112,00	-508,79	-31,39%
LUGO	6.971,11	7.090,92	119,81	1,72%
OURENSE	5.979,28	6.016,86	37,58	0,63%
PONTEVEDRA	1.099,67	1.013,32	-86,35	-7,85%
TOTAL GALICIA	15.670,85	15.233,10	-437,75	-2,79%

Datos de superficie provincial no primeiro cuadrimestre deste ano comparada co 2014:

	SUPERFICIE 30/4/15	SUPERFICIE 2014	% VARIACIÓN
A CORUÑA	1.257,36	1.112,00	13,07%
LUGO	6.959,30	7.090,92	-1,86%
OURENSE	6.961,94	6.016,86	15,71%
PONTEVEDRA	1.058,15	1.013,32	4,42%
TOTAL GALICIA	16.236,75	15.233,10	6,59%

Tipos de cultivo

Segundo os datos de Craega, Ourense e Lugo destacan nos cultivos de terras arables, mentres que a lista de hortalizas frescas, amorodos e setas a lidera A Coruña que, pola contra, é última en canto a terra de pastos e prados. Lugo encabeza, con moita diferenza, o número de hectáreas en barbeito ecolóxico.
No seguinte cadro podemos observar a evolución do número de operadores inscritos e da superficie certificada por Craega desde 1997. O crecemento durante 2014 foi do 5,49%. O número de produtores medrou o pasado ano un 5,93% e o número de elaboradores, importadores e comercializadores, un 12,03%. Sen embargo, como xa vimos, a superficie total certificada reduciuse nun -2,79% no ano 2014 respecto do anterior. Para o primeiro cuadrimestre de 2015 obsérvase que o número de operadores medra un 4,13% respecto do ano 2014, sendo esta porcentaxe dun 4,03% nas industrias, e un 4,15% dos produtores, e que a superficie inscrita dispárase por riba das 16.000 hectáreas.

Ano	Produtores	Elaboradores*	Total operadores	Superficie inscrita (Has.)
1997	7	4	11	13,35
1998	34	9	43	173,84
1999	67	16	83	181,85
2000	97	18	115	265,00
2001	192	25	217	1.974,36
2002	230	32	262	3.585,31
2003	282	40	322	5.947,68
2004	314	47	361	6.725,60
2005	370	55	425	9.156,36
2006	396	60	456	9.623,46
2007	407	65	472	10.985,03
2008	445	64	510	12.895,37
2009	469	78	547	14.239,01
2010	484	89	573	14.167,74
2011	484	102	586	15.302,93
2012	491	116	607	15.242,40
2013	523	133	656	15.670,85
2014	554	149	703	15.233,10
30/04/15	577	155	732	16.236,75

Tipo de produción

A produción acuícola está moi presente nas dúas principais provincias costeiras: A Coruña e Pontevedra. A produción vexetal ten maior presenza na provincia de Lugo, con 117 operadores, por 100 de Pontevedra, e 66 e 40 para A Coruña e Ourense, respectivamente. “As provincias costeiras son as que loxicamente teñen maior número de inscirtos nos rexistros de acuicultura”, con “parques de cultivo mariño, bateas de mexilón e unha planta de troita arcoiris”, comenta Javier García Lozano, secretario de Craega.
Respecto da produción animal, Lugo, con 101 explotacións, supera por moito ó resto de provincias, seguida por Ourense, con 44; Pontevedra, con 37 e, finalmente, 27 na Coruña. E se observamos as cifras de elaboración e comercialización, Lugo volve ser a primeira por número de operadores, con 50, seguida por Pontevedra, con 41 e A Coruña e Ourense, con 29 e 26, respectivamente.
Datos de operadores no ano 2014 por tipo de produción:

Tipo de produción	A Coruña	Lugo	Ourense	Pontevedra	Totais
Acuicultura	15	0	0	27	42
Rec.Algas	2	0	0	2	4
Comercializador	2	7	3	4	16
Exportador/ Importador	1	0	0	2	3
Elaboradores	27	43	23	37	130
Prod.animal	27	101	44	13	185
Prod.vexetal	66	117	40	100	323
Totais	140	268	110	185	703

En conclusión,  en 2014 Craega viviu un crecemento do 20,48 % no volume de vendas certificadas en ecolóxico; en valor monetario, 5,3 millóns de euros. As principais producións galegas –se atendemos ao volume de negocio– son os produtos lácteos, pensos e alimentación animal, carne e derivados, conservas de peixe, outros elaborados, ovos e derivados e produtos de recolleita silvestre.