A cervexa vai á universidade

Ourense acolle un curso de verán sobre elaboración de cervexas artesás, que en Galicia xa ten 27 marcas.

A elaboración de cervexas artesanais é unha moda en auxe nos últimos anos. Ben como negocio ou ben como afección, cada vez son máis as persoas que están interesadas en aprender a facer esta bebida a pequena escala. Para que estas elaboracións sexan, ademais de artesanais, de calidade o campus de Ourense acolle esta semana un curso de extensión universitaria centrado na Tecnoloxía de elaboración da cervexa ao que asisten case unha trintena de persoas.

A formación, durante toda a semana, foi inaugurada luns no Edificio Politécnico por Virxilio Rodríguez, vicerreitor do campus de Ourense, e polas directoras do curso, Sidonia Martínez e Mª Inmaculada Franco. “Alí onde un vai atópase sempre cunha cervexa características á que os nativos consideran a mellor cervexa do mundo. Agardamos que ao longo desta semana vós tamén consigades facer a mellor cervexa do mundo”, díxolles aos asistentes Virxilio Rodríguez, segundo informa Rosa Tedín.
Este curso, salientaron as súas responsables, celébrase por segundo ano consecutivo co obxectivo principal dar a coñecer os principios da elaboración da cervexa, dende as materias primas ata a cervexa final. Especificamente, os participantes coñecerán os ingredientes e as súas funcións na elaboración da cervexa e aprenderán por que se aplica un tratamento ou se efectúa unha manipulación determinada e que fenómenos se producen durante os mesmos. Tamén coñecerán detalladamente o proceso de elaboración desta bebida, identificando as etapas involucradas e os diferentes tipos de cervexa existentes e identificarán os seus principais parámetros de calidade e os seus atributos sensoriais, desenvolvendo a capacidade para atopar solución a flavores indesexables no produto e para identificar as variables que inflúen na elaboración. Por último, os participantes tamén se achegarán á situación actual das macro e microcervexarías.

En España consúmese unha media de 48 litros por persoa e ano

O primeiro día de traballo, os encargados de introducir ás persoas inscritas na temática foron José Luis Olmedo, presidente do Comité Técnico da Asociación Española de Técnicos de Cervexa e Malte, e Bernardo Prieto, profesor contratado doutor da Universidade de León. Olmedo inaugurou as sesións cunha introdución ao mundo da cervexa, desde a súa historia e características ata a súa produción, consumo e comercialización. “Despois de tres anos de caída, o sector cervexeiro en España estase recuperando”, apuntou José Luis Olmedo. Na actualidade o consumo por español sitúase en 48 litros ao ano, unha cifra que o sitúa na media europea, aínda lonxe dos países que encabezan este consumo, como pode ser Alemaña, que está en 100 litro por persoa. Neste contexto, comentou, o auxe das cervexas artesanais “constitúe unha boa oportunidade para aumentar a cultura cervexeira”, xa que amplía o espectro de consumidores e o abano de cervexas que se consumen.

Bernardo Prieto será o encargado de facer cos participantes catro tipos de cervexas, dúas de trigo, unha cervexa negra e unha especial, neste caso con fabas de cacao tostado. “Vamos a traballar cos ingredientes desde o principio, moendo o malte e podendo modificalo”, indicou. Os participantes realizarán a formulación da mestura, a preparación do malte e os adxuntos, a súa maceración, o filtración do bagazo, a cocción do mosto, a adición do lúpulo, o arrefriamento do mosto, a fermentación (elección do fermento, acondicionamento do mesmo, sementeira) e o control do proceso, desde a densidade á cor. Os arredor de 25 litros resultados serán embotellados e probados un mes despois da súa elaboración. “Artesán non é sinónimo de mellor. Hai que aprender a facer as cousas ben para ter bos resultados”, recalcou.
Ademais de coñecer e pór en práctica todo o proceso de elaboración da cervexa, os participantes nesta formación coñecerán exemplos empresariais de microcervexarías, como Dama Alaricana e Áncora, ambas ourensás; visitarán as instalacións da empresa cervexeira galega por excelencia, Estrella Galicia; coñecerán as tendencias no sector da man de técnicos do grupo Mahou-San Miguel e achegaranse á análise sensorial e avaliación da calidade dunha cervexa da man de Xavier Galobart, asesor estratéxico de empresas do sector de alimentación e bebidas.