A seca abafa o campo galego: perdas na produción e prexuízos de millóns de euros

Organizacións agrarias advirten que se está nunha situación “extrema”. A produción de millo caeu á metade e as perdas son de varias ducias de millóns de euros. 

A seca afoga o campo galego. Recoñéceno gandeiros, produtores, organizacións agrarias... A ausencia de choivas e altas temperaturas está a bater, e non pouco, a un sector, o gandeiro, que non está falto de dificultades após levar meses soportando caídas de prezos. Mais tamén a secta está a xerar problemas e prexuízos a produtores hortícolas, agricultores... “A seca está a afectar moito, como non, e non para ben precisamente”, manifesta Elías Somoza, da Federación rural galega (Fruga) en conversa con Sermos Galiza.
A situación tamén se denuncia desde outras organizacións, como Unións Agrarias, que fala dunha perda do 50% na produción de millo, a principal especie cultivada no país, e perdas por riba dos 50 millóns de euros. A produción anual de millo forraxeiro (somos os principais produtoresz do estado, unhas 70.000 hectáreas cultivadas) sofre, logo, unha perda considerábel. E isto vai afectar negativamente aos gandeiros, tanto de vacún de carne como de leite.
“Imos pasalo moi mal”
“As explotacións de carne e de leite de pastoreo teñen que gastar agora a forraxe que tiñan para o inverno porque coa seca non hai aspstos”, explica Somoza, que incide no problema que para este sector implica que a colleita de millo vaia ser baixa: “É o alimento do gando”. E isto, engade, chega nunha situación na que os baixos prezos do leite provocaron que nos primeiros sete meses do 2016 tivesen que botar o fecho máis de 320 explotacións en Galiza.
Desde UUAA apontan que a merma da produción dase en moitos máis produtos que no millo e que estas perdas non van ser recuperábeis. Máis unha mala nova para o rural galego.
Somoza considera que, se ben a climatoloxía é un imprevisto sobre o que pouco se pode facer, si que a administración pode e deba actuar sobre as súas consecuencias. “Non falo só de indemnizacións”, di, mais de tomar medidas e facer previsións para actuar netse tipo de situacións de seca.