A sección da Mesa pola Normalización Lingüística en Bergantiños rexistrou un escrito no concello de Malpica de Bergantiños exixindo a reposición do uso do galego en todos os rótulos públicos que o exclúe, concretamente nas praias de Area Maior e na de Canido onde foron instalados recentemente varios letreiros sen teren en conta a lingua propia de Galiza.
A sección comarcal da Mesa denunciou que “a exclusión do galego na sinaléctica pública vulnera a lexislación vixente en materia lingüística” e lembroulle ao concello de Malpica de Bergantiños que a Lei de Normalización Lingüística estabelece que “Os poderes públicos de Galicia promoverán o uso normal da lingua galega, oralmente e por escrito, nas súas relacións cos cidadáns” e que tamén a Lei 5/1997 da Administración Local de Galiza di que “O galego, como lingua propia de Galiza, éo tamén da súa Administración Local”, mostrándose moi clara ao respecto ao dictaminar que: “todos os actos de carácter público ou administrativo que se realicen por escrito en nome das corporacións locais redactáranse en lingua galega”, o que inclúe os rótulos e sinais da vía pública e dos edificios municipais.
A agrupación comarcal da entidade en defensa da lingua mostrou a súa sorpresa pola instalación das novas rotulacións coa denominación en castelán “Concejalía”, algo “insólito na comarca” que a sección comarcal da Mesa cualificou como “un paso atrás no uso do galego pola administración local de Malpica”.
O responsábel da Mesa na comarca, Xosé Cotelo, preguntou ironicamente ao goberno local se tamén ten pensado substituír “Concello” por “Concejo” e reclamou ao goberno malpicán “respecto pola lingua propia de Galiza e o cumprimento da lexislación en materia lingüística”
Xosé Cotelo declarou que “a lingua galega precisa de reposición do seu uso, de promoción e de prestixio” pois “de agresións e reducións de dereitos ao galego xa está o caixón cheo”.
Ningún comentario:
Publicar un comentario