martes, 13 de setembro de 2016

Denuncian novos recortes na educación pública no inicio do curso escolar

As plataformas en defensa do ensino público denuncian, un ano máis, os recortes en material, infraestruturas e profesorado que din, é de “1.700 millóns de euros” desde o inicio do goberno de Feijóo. Tamén critican a proba da reválida, mentres que o conselleiro de Cultura e Educación insiste que pedirá que esta proba non teña “valor académico”.

O peche de escolas públicas e o recorte de profesorado de cara ao comezo do novo curso 2016-2017, que este luns comeza en Educación Infantil, Especial e Primaria son as principais críticas que fixeron este luns os representantes de alumnos, pais e profesores integrados nas Plataforma Galega en Defensa do Ensino Público e a Plataforma en Defensa do Ensino Público.
Segundo as súas estimacións, desde a chegada de Feijóo á Xunta houbo un recorte de "1.700 millóns de euros" en educación en Galicia. Neste sentido, a Plataforma Galega en Defensa do Ensino Público avisa de que para este curso péchanse 64 unidades e 13 escolas, mentres a escola concertada e privada recibe 250 millóns.
A isto únese que 3.000 familias non teñen posto para os seus fillos entre 0 e 3 anos, mentres que 4.000 alumnos non poden cursar os estudos que queren en FP, á vez que existen en Galicia 200 unidades escolares que supoñen os cocientes de alumnos por profesor, segundo as súas cifras.
Nesta liña, a Plataforma en Defensa do Ensino Público critica que para este curso hai unha redución de 1.200 postos de traballo estruturais de profesores en comparación con 2009 (442 na Coruña, 273 en Pontevedra, 256 en Lugo e 229 en Ourense).
Xunto a isto, un 20 por cento dos profesores galegos son provisionais. En Primaria, a taxa de vacantes ofertadas para o profesorado interino subiu un 3 por cento fronte ao curso anterior; un 4 por cento máis en prazas itinerantes e a afinidade incrementouse en tres puntos. En Secundaria, a adxudicación ao persoal interino foi de 200 vacantes máis (un 1% máis) e a afinidade subiu un 2 por cento.
Protestas pola reválida
Por outra banda, as protestas contra a polémica proba da reválida tamén centraron o inicio do novo curso escolar. Así, integrantes da comunidade educativa denunciaron que "non se coñece nin a característica, nin o deseño, nin o contido" das 'reválidas' de 4º da ESO e 2º de Bacharelato, e cualificarono de "tomadura de pelo".
En senllas roldas de prensa, a Plataforma Galega en Defensa do Ensino Público e a Plataforma en Defensa do Ensino Público censuraron as carencias coas que se comeza este novo curso e denuncian a "imposición" das 'reválidas'. Por iso avanzaron que preparan protestas para denunciar esta situación.
A Plataforma Galega en Defensa do Ensino Público concentrarase o vindeiro mércores, 14 de setembro, ante a Consellería de Educación (11,30 horas) para esixir a eliminación da lei orgánica para a mellora da calidade educativa (Lomce) e das 'reválidas' que comezan a aplicarse na ESO e Bachillerado. Pola súa banda, a Plataforma en Defensa do Ensino Público prevé mobilizacións no mes de outubro.
Sobre este extremo, esta plataforma cualifica de "longas, custosas, inxustas e inútiles" estas probas finais que comezan a aplicarse este ano, nun curso escolar que se inicia para ESO e Bacharelato o día 15 en Galicia.
Tamén o portavoz de CIG-Ensino, da Plataforma Galega en Defensa do Ensino Público, Anxo Louzao, cre que estas reválidas son "unha crueldade para o alumno, unha mingua na calidade do ensino e un desprezo para o profesorado", no que identifica como o "desprezo máis absoluto" e prepotencia" da Xunta.
O conselleiro insiste que non terá influencia académica
Pola súa banda, o conselleiro de Educación, Román Rodríguez, avanzou que solicitará ao Ministerio de Educación que a proba final de 4º da ESO, coñecida como 'reválida', non teña efectos académicos. Sobre os exames que substitúen a selectividade, asegurou que confía en adaptar a Galicia unha proba que non altere de forma significativa o sistema actual.
.

Ningún comentario:

Publicar un comentario