A CIG-Ensino manifesta que a única mudanza necesaria para o ensino é un xiro de 180º na política educativa e lingüística do PP.
Desde
a CIG-Ensino emprazamos o novo Conselleiro a que lea de vagar as
propostas contidas na Iniciativa lexislativa popular promovida pola
CIG-Ensino en defensa do ensino público e para a restitución dos
dereitos laborais e salariais do profesorado, ILP que lle foi presentada
persoalmente ao Grupo do PP no Parlamento, dentro da rolda de
presentacións realizadas. Esta ILP contén as demandas fundamentais do
profesorado e da comunidade educativa e que están avaladas por case
23.000 sinaturas recollidas nun breve período de tempo, e que “el mesmo
recoñeceu que era unha emenda á totalidade da política educativa da
Consellaría de Educación”.
Hoxe foi presentado ante os medios de
comunicación o novo Conselleiro de Educación que vén substituír a Jesús
Vázquez, quen deixa o cargo co negro balance de ter sido o peor
conselleiro da historia da Consellaría de Educación.
Quen
agora deixa a Consellaría foi un Conselleiro que tivo como liña de
actuación o desmantelamento do ensino público en beneficio do ensino
privado concertado, a persecución do noso idioma coa promulgación do
Decreto de Plurilingüismo, a destrución de emprego coa supresión de máis
de 3000 postos de traballo docentes, o menosprezo ao profesorado cunha
batería de medidas que supuxeron máis precarización, menos profesorado
nos centros, incremento do horario lectivo e reducións salariais. Un
conselleiro insubmiso ás resolucións xudiciais e que conta no seu haber
con numerosas sentenzas en contra da súa actuación, tanto en política
laboral, como educativa. Un Conselleiro autoritario e antidemocrático
que non dubidou mesmo en utilizar o portal web institucional para atacar
o profesorado e os seus representantes. Un Conselleiro españolista,
totalmente submiso e vasalo perfecto dos mandatos de Madrid que non
dubidou en usar a Consellaría como laboratorio experimental da política
máis represiva do Partido Popular e fiel entusiasta da LOMCE. En
definitiva, tratouse dun conselleiro inimigo do ensino público e do
ensino en galego e ao servizo da patronal do ensino privado concertado e
da que segrega o alumnado por razón de xénero, un Conselleiro ao
servizo da ideoloxía máis reaccionaria do Partido Popular e en contra do
Ensino Público Galego.
Para a CIG-Ensino o
nomeamento do novo conselleiro na persoa do anterior portavoz de
Educación no Parlamento lévanos a pensar que o Partido Popular quere dar
continuidade á política educativa que até hoxe guiou o Conselleiro
saínte, enviando unha mensaxe de continuidade nas nefastas políticas de
educación.
Mais, en todo caso, desde a
CIG-Ensino emprazamos o novo Conselleiro a que lea de vagar as propostas
contidas na Iniciativa lexislativa popular promovida pola CIG-Ensino en
defensa do ensino público e para a restitución dos dereitos laborais e
salariais do profesorado, ILP que lle foi presentada persoalmente ao
Grupo do PP no Parlamento, dentro da rolda de presentacións realizadas.
Esta ILP contén as demandas fundamentais do profesorado e da comunidade
educativa e que están avaladas por case 23.000 sinaturas recollidas nun
breve período de tempo, e que “el mesmo recoñeceu que era unha emenda á
totalidade da política educativa da Consellaría de Educación”, declara o
Secretario Nacional da CIG-Ensino, Anxo Louzao, “mais xa as primeiras
declaracións de Román Rodríguez poñen en evidencia a aposta do PP por
unha política continuísta”.
Anxo
Louzao considera que “non temos postas esperanzas neste nomeamento, xa
que sen un cambio de rumbo total na política educativa e lingüística do
PP nada se pode agardar de quen sexan os seus executores. Por tanto, só
cabe unha revisión total da política educativa e lingüística realizada
desde o ano 2009 e pór as bases dunha política de apoio e fortalecemento
do ensino público que mellore a súa calidade e restitúa os dereitos dos
seus traballadores e traballadoras, así como a derrogación do Decreto
de Plurilingüismo e a aplicación do Plan Xeral de Normalización de 2004,
que asente os alicerces para unha plena normalización lingüística e o
ensino en galego”.
Ningún comentario:
Publicar un comentario