A operadora Telefónica
vén de anunciar que a súa filial centrada en solucións de
aprendizaxe telemática (elearning), Telefónica Learning
Services, será coñecida a partir de agora cun novo nome, Telefónica
Educación Dixital. Este cambio, sinala a compañía, forma parte
dun labor de transformación máis amplo no seo da devandita filial,
que se atopa mergullada na adaptación ás novas oportunidades de
negocio no ámbito global da ensino. A empresa resultante, sinálase,
constitúe “a evolución dunha entidade que conta cunha traxectoria
de máis de 14 anos ofrecendo solucións de formación online
e educación dixital a empresas e organismos públicos a nivel
internacional”.
Telefónica Educación
Dixital pretende captar novas oportunidades no sector da educación
tanto en ámbalas beiras do Atlántico e fornecer un enfoque “que
vai máis aló dunha compañía de formación en liña, achegando
máis a marca ao mercado da educación dixital en termos globais
(ámbito universitario e escolar) e asociándoa a un concepto aínda
máis amplo e actual”. Segundo lembra a operadora, o ano que vimos
de deixar atrás a filial educativa acometeu un importante proceso de
medre, situándose arestora con 400 empregados en cinco países
(España, Colombia, Chile, Perú e Brasil), 300 clientes e 4 millóns
de alumnos en distintas plataformas. Ademais, desenvolve a través da
factoría de seu máis de 20.000 contidos ao ano.
Ningún comentario:
Publicar un comentario