mércores, 18 de setembro de 2013

Miles de cidadáns piden unha lei para crear bancos de libros en colexios públicos

Unha cidadá, nai de dous fillos, entregou hoxe no Ministerio de Educación 265.000 firmas reclamando a aprobación dunha lei que estableza a creación de bancos de libros nos colexios públicos e concertados.
Esta nai madrileña, Elena Alfaro, iniciou hai un ano unha campaña online de recollida de firmas a través da plataforma cidadá change.org solicitando apoio para reclamar "un prezo máis xusto para os libros de textos escolares" e un sistema de reutilización.
"Pido que as administracións -o Goberno e as comunidades autónomas- fagan unha regulación para conseguir un sistema efectivo de reutilización de libros de texto en todos os centros públicos e concertados, pondo a disposición dos alumnos bancos de libros, sen que se esixa ningún requisito para acollerse a este sistema", explica Alfaro na porta da sede do Ministerio de Educación.
Para a autora da iniciativa, "é unha proposta básica, razoable, pedagóxica, ecolóxica e necesaria" porque evitaría que as familias estean sometidas ao "albur dos vaivéns económicos".
"Pido un cambio lexislativo para que a intimidade da xente se respecte e non teña que ir dicindo: non teño diñeiro, axúdeme a comprar os libros dos meus fillos".
Neste sentido, opinou que "non é razoable que os pais teñan que facer un esforzo importante, a compra de libros, para algo que a lei obriga, que é a educación".
"Hai moitos xeitos de organizarse; como que os libros pertenzan ao centro, llos preste aos alumnos e estes os devolvan a final de curso, ou que se fixe unha fianza e se devolva ao final de curso ou a través de doazóns de pais de libros que xa non usan", suxire.
Tamén propón "facer concursos públicos entre os produtores de libros, nos que se fixase un prezo máximo, e onde se competise pola calidade dos contidos".
Por exemplo, que se valore a posibilidade de que os libros poidan ser actualizados de forma online, apunta.
Elena Alfaro insiste na idea de que é necesario facer unha lei porque "obrigaría á administración a fixar unha partida que agora se estaba destinando a cheques de libros e a outras axudas, que moitas delas suprimíronse, para ir creando fondos bibliográficos de maneira que o sistema empezaría a rodar aos poucos".
Para esta cidadá, "a medida é necesaria e lóxica" e insiste en que está a ser aplicada en moitos países.
"A educación dos nenos é un tema moi serio; se todos os países fano, ¿por que somos os últimos da lista neste tema? As asociacións de pais e os particulares están a organizarse como poden. é o momento de solucionalo".
De momento, UPyD é o único partido que recolleu a súa proposta e presentou unha proposición non de lei para que sexa debatida no Parlamento.
"Agora deberán ser todos os partidos os que decidan aprobala ou rexeitala; todos deben dar un paso adiante e é fundamental que os cidadáns saibamos cales son os argumentos de cada partido", concluíu.

Ningún comentario:

Publicar un comentario