O Colexio Oficial de Arquitectos de Galicia xustifica o non uso do galego pola crise

ProLingua pídelle que a documentación tamén estea en galego tras as queixas de varios colexiados e di que a crise "non pode ser razón para a desaparición da lingua propia do país". 

Prolingua ven de remitirlle unha misiva ao Colexio Oficial de Arquitectos de Galicia (COAG) logo de recibir críticas porque non ofrece toda a súa documentación técnica e de apoio en galego, malia ser esta a lingua propia e cooficial do territorio no que este Colexio exerce a súa actividade.

 

Tras poñer esta cuestión en coñecemento da dirección desta entidade, a súa resposta foi que, debido á crise, non tiñan recursos para pasar esa documentación a galego e que preferían “priorizar” outros servizos.

 

“Consideramos que a crise económica non pode ser razón para a desaparición da lingua propia de Galicia da documentación oficial do Colexio Oficial de Arquitectos de Galicia e pedímoslles que o máis axiña posible volvan ofrecer este tipo de documentación en galego aos seus colexiados e colexiadas”, recolle ProLingua na misiva que lle enviou. 

 

Esta é a carta enviada:

 

 

Carta aberta ao Colexio Oficial de Aquitectos de Galicia

 

Á xunta directiva do Colexio Oficial de Arquitectos de Galicia.

Prezados/as señores/as:

 

Tivemos coñecemento de que o COAG non ofrece toda a súa documentación técnica e de apoio en galego, malia ser esta a lingua propia e cooficial do territorio no que este Colexio exerce a súa actividade. Tivemos coñecemento, tamén, de que a xustificación ofrecida polo Colexio -ante as queixas previamente recibidas neste senso-, facía alusión á falta de recursos relacionada coa crise e á conseguinte priorización doutros servizos.

 

Sendo a Arquitectura unha disciplina vencellada ao deseño e configuración do marco físico das nosas vidas, consideramos importante que esta fale tamén a lingua en que desenvolvemos esas vidas milleiros de galegos e galegas. A posta ao dispor dos usuarios e usuarias de toda a documentación en galego, alén de ser unha prioridade polo seu valor simbólico, como o poden ser os servizos de tipo operativo, é unha cuestión de vontade e decisión institucional. Consideramos que a crise económica non pode ser razón para a desaparición da lingua propia de Galicia da documentación oficial do Colexio Oficial de Arquitectos de Galicia e pedímoslles que o máis axiña posible volvan ofrecer este tipo de documentación en galego aos seus colexiados e colexiadas.

 

ProLingua, Plataforma apartidaria a prol do galego