A Mesa concede o III Premio Abertos ao Galego á cooperativa Erica Mel e mención especial do xurado a Radio Fene

A entrega dos premios terá lugar o 19 de decembro ás 19.00 h no Museo Provincial de Lugo. O acto será presentado pola actriz Iria Sobrado e contará coa actuación musical de Caxade.

Abertos ao Galego, o proxecto da Mesa para a dinamización do galego no ámbito empresarial, entregará o III Premio á Cooperativa Erica Mel, de Arzúa, polo seu compromiso coa lingua galega. Unha empresa que abriu camiño no seu sector e foi pioneira na etiquetaxe en galego.

A Cooperativa Erica Mel naceu no ano 1990 e está integrada por máis de 350 socios e vende os seus produtos en todo o país e mesmo en todo o Estado

A Cooperativa Erica Mel foi expedientada nos anos 90 pola propia Administración autonómica por etiquetar en galego os seus produtos. A presión social conseguiu que se retirase a sanción. O xerente lembra ese episodio e móstrase “satisfeito do traballo ben feito, de estar onde debes estar e á altura dos tempos”. O xurado valorou o compromiso co galego demostrado pola empresa, que se mantivo firme no uso do galego, abrindo o camiño para que vinte anos despois sexa habitual atoparmos este tipo de produtos etiquetados en galego en calquera supermercado.

O xurado tamén recoñeceu cunha mención especial a Radio Fene, emisora municipal que cumpre 30 anos. Foi no seu momento a primeira radio pública local que, con carácter estábel, empregou integramente a lingua galega nas súas emisións, que principiaron en setembro de 1984.

O premio, de carácter simbólico, materialízase na pertenza durante un ano ao Proxecto Abertos ao Galego. A entrega dos premios será o 19 de decembro ás 19 h no Museo Provincial de Lugo. O acto será presentado pola actriz Iria Sobrado e contará coa actuación musical de Caxade.

Un proxecto para promover o galego no ámbito da empresa

Abertos ao Galego é un proxecto da Mesa pola Normalización Lingüística que ten como obxectivo a dinamización do galego no mundo da empresa. Partindo dun certificado de calidade asociado ao uso da lingua de Galiza, desde Abertos ao Galego promociónase a actividade das empresas que traballan en galego, ademais de fornecer argumentos á sociedade sobre a relevancia do uso do noso idioma por parte dos diversos tipos de empresas para conseguirmos un "consumo responsábel co noso idioma".

Anteriores premios

Na primeira edición do Premio Abertos ao Galego, en 2012, o xurado decidiu outorgarllo á empresa Tuenti Technologies, promotora da rede social máis popular entre a mocidade. En 2013 a II edición dos premios foi para San Luís, cadea coruñesa de electrodomésticos.