As escolas en galego buscan vías de crecemento

A Semente abrirá, próximamente, novos centros en Vigo e Trasancos tras a boa acollida do centro de Compostela. Insiste en que o seu modelo consolida a lingua dos nenos galegofalantes e “provoca mudanzas nas habilidades comunicativas” dos castelánfalantes. Tamén Avoaescola busca novas formas de crecemento.

Tres anos leva xa funcionando o proxecto autoxestionado A Semente, un proxecto de escola en galego, que estuda xa ampliar a súa oferta educativa despois de que algúns nenos quedaran sen prazas polas limitacións que, ata o momento, teñen os seus centros.

 

A potenciación deste tipo de proxectos, entre os que se atopan outros como o da Avoaescola, en Narón, chegan logo de que se teña coñecido unha enquisa do IGE que apunta a unha notable perda de coñecemento do galego por parte dos nenos.

 

Por iso, A Semente, considera “necessário e urgente” dar resposta, como colectivo, “à gente que -sendo galego-falante habitual ou nom- confia na imersom lingüística, e no modelo Semente, para a educaçom dos seus filhos e filhas”. Por isso, este colectivo quere abrir un proceso de interación cos veciños de Compostela –onde se atopa o seu principal centro educativo--, para procurar “ideias, participaçom, informaçom sobre locais, vias alternativas, criatividade e inteligéncia coletiva,  para que o projeto da Semente poida crescer para atender a preocupaçom das famílias que procuram um  espaço de socializaçom em galego”.

 

A través dun comunicado, este colectivo suliña que o seu obxectivo é “consolidar o galego como a sua própria língua, no caso das crianças galego-falantes,  ou adquiri-lo e desenvolve-lo com normalidade, no caso das crianças castelám-falantes”.

 

E, como exemplo, pon o seu proxecto educativo, un modelo de inmersión lingüística “ligada a valores educativos como a coeducaçom, a interaçom com a natureza, a laicidade, o assemblearismo ou o respeito pola autorregulaçom da criança” que, din, “está a resultar um modelo eficaz para a intervençom educativa sobre crianças de diferente perfil lingüístico, conseguindo consolidar a língua das nenas e nenos galego-falantes e melhorar atitudes e provocar mudanzas nas habilidades comunicativas das crianças castelám-falantes”.

 

As Escolas de Ensino Galego Semente son unha iniciativa social, impulsada pola Gentalha do Pichel, que pretende conformar, xunto com outros proxectos semellantes, “as bases necessárias para a criaçom da Escola Nacional Galega. De feito, o colectivo ten previsto abrir próximamente novas escolas en Vigo e Trasancos.

 

Tamén en Narón subsiste, sen ningún tipo de axuda institucional, outro proxecto educativo, o da Avoaescola, un espazo educativo en galego dedicado, nun primeiro momento, a nenos e nenas até os 6 anos, coa finalidade de se transformar nunha escola infantil.

 

Avoaescola Ferrolterra realiza todas as accións, actividades lúdicas e educativas en lingua galega, co fin de que nenas e nenos "acaden o seu uso nas relacións afectivas e de comunicación tanto sociais como familiares". Naceu apoiada económica e socialmente pola Asociación Galiza co Galego, en colaboración coas Asociacións pedagóxicas Nova Escola Galega e Asociación Socio-Pedagóxica Galega, e a Asociación de Escritores e Escritoras en lingua Galega.