Educación pechou en Galiza 108 colexios públicos desde o 2007

Alternativa Galega de Esquerdas (AGE) acusa á Xunta de levar a cabo unha política “de esganamento" do ensino público no rural, unha dinámica que, sostén, verase acentuada coa Lomce. E esa modificación vai implicar a redución dos centros de ensino públicos no medio rural, asinando así "a sentenza de morte definitiva".

A Xunta admitiu, a través do secretario xeral da Consellaría de Educación, Jesús Oitavén, que modificará o mapa escolar unha vez o Congreso dos Deputados aprobe a Lei Orgánica de Mellora da Calidade Educativa (LOMCE), sinalan desde a Alternativa Galega de Esquerdas (AGE).
E esa modificación vai implicar, indican desde esta coalición, reducir os centros de ensino públicos no medio rural. AGE afirma que Oitavén “anticipou recortes no número de aulas e de profesores” e que tamén se referiu “á necesidade de adaptar a rede de centros á redución de alumnado dos últimos anos”. É dicir, proseguen desde esta formación, a Xunta “continuará a política de esganamento do ensino público no rural.

"A LOMCE, privatizadora, españolizadora, sexista, será, de non parármola, a sentenza definitiva de morte para o rural”

Oitavén asegurou, ademais, que dende o ano 2007, Educación pechou en Galiza 108 colexios públicos. Para AGE, esta sangría educativa e, polo tanto, social afecta sobre todo ao castigado medio rural. “E Galiza, sen o seu medio rural, non ten ningún futuro, e a LOMCE, privatizadora, españolizadora, sexista, será, de non parármola, a sentenza definitiva de morte para o rural”.