A Universidade da Coruña, entre as máis influentes nas redes sociais

A institución académica ocupa o posto 49 entre as cen entidades e persoas de relevancia no sector universitario en España e o 38 só entre as institucións académicas. Tamén destaca a Universidade de Vigo.

A Universidade da Coruña (UDC) está entre as universidades máis influentes nas redes sociais en España. Así o salienta a propia institución coruñesa con datos de Klout, ferramenta que mide a influencia social das contas en redes cunha puntuaxe entre 0 e 100, baseada en máis de 400 parámetros, como o número de seguidores en Twitter, os fans en Facebook, as recomendacións nun perfil en LinkedIn, os consellos compartidos a través de Foursquare no momento de evaluar servizos ou lugares, etc.

En total, a UDC ten agora 58 puntos e sitúase no posto 49 de 100 entidades e persoas de relevancia no sector universitario en España. O promedio está en 40, polo que se considera influente todo aquel que supere ese nivel, e moi influente para o grupo do 5% que se sitúa sobre os 60 puntos.
O ránking do grao de influencia universitaria en España está encabezado pola Universidade de Harvard, seguido pola de Cambridge, ambas as dúas con 99 puntos; a primeira española é a Universidade de Granada, que ocupa o posto 7, mentres que a Universidade da Coruña é a primeira de Galicia.
Na clasificación exclusiva de contas de institucións universitarias —é dicir, excluídas as contas de persoas vinculadas ao ámbito académico— a UDC ascende até o posto 38 e aparece entre as 50 primeiras a Universidade de Vigo, no posto 46, con 56 puntos.
Esta clasificación non é un índice só cuantitativo, que mida o número de seguidores ou de contidos xerados nas redes sociais, senón que ten en conta a capacidade de influír que ten ao transmitir os seus contidos.