O co fundador e director
de Cilenis,
empresa xurdida ao abeiro da Universidade de Santiago e especializada
en tecnoloxías da linguaxe, Isaac González, presentou a súa
iniciativa o pasado venres 30 perante a nosa comunidade TIC docente,
investigadora, profesional e empresarial. O
acto celebrouse no Centro Singular de Investigación en Tecnoloxías
da Información (CiTIUS). Amais das liñas principais de
actividade de Cilenis, González tamén expuxo (nun plano máis
concreto) algunhas das ferramentas lingüísticas achegadas pola
empresa: dende analizadores de sentimentos até recoñecedores de
entidades e conxugadores en diferentes idiomas, como o galego, o
español, o portugués e o inglés.
Asemade, debullou as
orixes da compañía (que iniciou a súa actividade en 2011 como
spin-off universitaria, gañando nese mesmo ano o Primeiro
Premio como Proxecto Empresarial Innovador) e algúns dos principais
fitos da súa andaina (como por exemplo a
adhesión ás fileiras de Cilenis, en 2012, do empresario e analista
económico Marc Vidal, que se converteu en socio da empresa
galega adquirindo parte da mesma).
Unha das cuestións máis
salientábeis da presentación foi sen dúbida o portal de
ferramentas lingüísticas Linguakit
lanzado o ano pasado por Cilenis. Isaac González lembrou que esta
achega ofrece ao gran público un completo portal de análise textual
que achega de xeito doado unha morea de instrumentos tecnolóxicos
para o uso e o estudo de catro linguas: galego, español, inglés e
portugués. Trátase, dixo, do primeiro portal de recursos
lingüísticos para este grupo de idiomas e, moi especialmente, para
o galego, que dispón por primeira vez de ferramentas até agora só
accesíbeis para o inglés e o castelán.
Cilenis tamén lembrou
que o dito espazo na Rede conta, entre outras cousas, cun conxugador
verbal ou un extractor de palabras chave, pasando por un analizador
do sentimento dun enunciado, un resumidor, un tradutor ou un
corrector ortográfico e gramatical. “Linguakit poderá ser ben
útil para: publicistas, xornalistas, tradutores, profesores e
lingüistas, ou en xeral calquera persoa con interese pola lingua”,
engadiu a empresa no seu día.
Ningún comentario:
Publicar un comentario