Xa podemos instalar a Actualización de Aniversario de Windows 10

Dende onte Windows Update está comezando a permitir que os usuarios poidan instalar unha “Actualización de características a Windows 10, versión 1607”, que vén a ser a esperada Actualización de Aniversario de Windows 10, que tanto podemos instalar como actualización ordinaria (cun proceso máis lento do habitual, xa que realiza grandes cambios no sistema) ou incluso optando por crear un disco DVD ou USB a través da descarga da súa imaxe ISO ou empregando a ferramenta de creación de medios (que asístenos no proceso para crear unha unidade de instalación de Windows 10). A principal vantaxe da creación dun medio externo de instalación é a posibilidade de aproveitalo posteriormente en caso de incidencias.
Está actualización de Windows 10 está chea de novidades que van dende melloras de seguridade (como a posibilidade de programar o Windows Defender para buscar malware no noso equipo periodicamente ou permitir a identificación biométrica en aplicacións e páxinas web) até detalles de interface (cunha reorganización do menú de inicio para facelo máis claro para o usuario).
Unha das novas características máis destacadas por Microsoft é a nova aposta por Windows Ink, ou sexa, un maior aproveitamento de dispositivos tipo stylus, de xeito que a tinta pasa a formar parte do sistema, permitindo así a creación de recordatorios tipo Post-It; facilidades para poder tomar notas, facer esquemas ou debuxar unha idea; e a posibilidade de que algunhas aplicacións abran a porta á realización de anotacións a man (como o uso de anotacións manuais en Office, pintar sobre páxinas web en Microsoft Edge e poder debuxar rutas en Mapas).
Aínda que as novidades a nivel de produtividade son moitas, a actualización de Windows 10 non esquece o lecer, e introduce o programa Xbox Play Anywhere, de xeito que os novos xogos de Microsoft que merquemos para Xbox One tamén poderán xogarse en PC sen custo adicional (conservando os progresos entre ambas plataformas) e outras medidas deseñadas para achegar a plataforma Xbox a Windows 10.
Pero unha das novidades máis visibles e destacadas é o feito de que o navegador Microsoft Edge incorpora extensións, o que permítelle, por exemplo, gozar das vantaxes dos bloqueadores de publicidade máis populares, facilita a tradución automática de páxina web ou incluso axiliza a interacción con servizos como Pocket. Espérase en que pouco a pouco vaian incrementándose o número de extensións dispoñibles, de xeito que supérase así un dos principais atrancos para a adopción deste navegador de magnífico rendemento.
De cara aos desenvolvedores e administradores de sistemas tamén hai unha novidade que resulta moi atractiva, como é a integración de Bash, o que permite empregar a sintaxe propia de sistemas Linux para introducir ordes no sistema (e incluso instalar paquetes).
O sistema de notificacións e Cortana tamén inclúen moitas novidades, resultando especialmente atractiva a sincronización de notificacións entre móbiles e escritorio, que por desgraza no caso de Windows 10 combinado con Android está limitada polo feito de que a aplicación de Cortana para Android polo momento só está dispoñible en inglés, polo que haberá que agardar para poder gozar desta interesante funcionalidade en España.