venres, 13 de xaneiro de 2012

A Secretaría Xeral de Política Lingüística celebra os 20 anos dos equipos de dinamización lingüística no ensino

Coincidindo co vixésimo aniversario da creación dos equipos de dinamización da lingua galega (EDLG) nos centros de ensino de Galicia, a Secretaría Xeral de Política Lingüística puxo en marcha dúas iniciativas para contribuír ao recoñecemento e difusión do seu labor na promoción do uso do galego.
O secretario xeral, Anxo Lorenzo, inaugurou a homenaxe da Secretaría Xeral de Política Lingüística aos equipos de dinamización nos centros de ensino. A iniciativa central desta homenaxe desenvólvese no Museo Pedagóxico de Galicia (Mupega), en Santiago de Compostela. Trátase dunha exposición que repasa a traxectoria dos equipos a partir das revistas escolares que foron elaborando nos últimos vinte anos. A exposición estará aberta ao público ata o 15 de marzo.
A exposición compleméntase cunha mostra virtual que inclúe experiencias dinamizadoras desenvolvidas polos equipos na actualidade. Trátase de 20 propostas dirixidas ás diferentes etapas educativas e de diversa natureza, que están accesibles no web da secretaría xeral, en www.xunta.es/linguagalega/20_aniversario_equipos. Entre elas atópanse recursos lingüísticos e audiovisuais; accións vinculadas co teatro, coa radio ou coa ciencia; iniciativas para a dinamización da contorna; etc.

Máis información en:
http://www.xunta.es/linguagalega/noticias/2099
http://www.xunta.es/linguagalega/20_aniversario_equipos

Ningún comentario:

Publicar un comentario