Resposta contundente do estudantado contra a LOMCE e a Xunta di que se deixan enganar

Ducias de milleiros de estudantes nas rúas, apoiados por docentes e familiares, e a Xunta limítase a sinalar que están "confundidos e enganados". Unha maré percorreu centros de ensino secundario e universidades para facer fronte á LOMCE, "unha reforma que quer un ensino elitista, restrictivo e españolista".

A folga contra a LOMCE tivo un seguimento do 90% nos centros de ensino secundario e do 70% nas universidades, segundo os datos dos propios sindicatos estudiantís. Unhas cifras que valoran "máis que positivamente pois mostra o rexeitamento do estudantado a unha reforma que atenta contra eles" (Comités) ou ben como "un sinal do que Xunta e Madrid teñen que tomar nota" (Liga Estudantil Universitaria). Para o Sindicato de Estudantes, a outra organización convocante, o paro é un "éxito dos e das estudantes contra a privatización que nos queren impór". AGIR fala de vitória perante unha lei que só procura máis España e mercantilización do ensino.
Os centros de ensino ficaron baleiros, mais as rúas enchéronse nas manifestacións que percorreron Galiza. En cidades como Vigo ou Compostela foron multitudinarias. Mais tamén estiveron nutridas as mobilizacións que se desenvolveron a nivel comarcal. Unha mostra, apuntan os convocantes, de que a Lei da Wertgoña non convence.

"Ensino é un dereito, non un privilexio", "non á privatización", "menos sobres e máis educación" ou "aquí se ve, o estudantado galego en pé" foron algunhas das palabras de orde máis repetidas. Desde os convocantes sinálase que nalgúns centros houbo equipas directivas a intentar evitar as protestas, e mesmo denunciaron a presenza de policía nos Campus universitarios.

Pola reitarada do decreto


As mobilizacións de estudantes contaron co apoio da Plataforma Galega en Defensa do Ensino Público e de organizacións da oposición, como BNG ou AGE. Desde a fronte nacionalista, o seu portavoz Guillerme Vázquez afirmou que “estamos ante un proxecto absolutamente infumábel que debe ser retirado ao baúl dos recordos”. Nese sentido, Guillerme amosou o total apoio do BNG “ás mobilizacións de estudantes ante este intento de impor unha lei de educación regresiva”.
Tamén AGE mostrou o seu rexeitamento a esta reforma, considerando que a resposta desta cuarta feira debe implicar a retirada do decreto.

A Consellería: @s manifestantes, "enganados"


Fronte á masiva mobilización, o conselleiro de Educación, Jesús Vázquez, acusou os convocantes de "enganar" os estudantes e de intentar "confundir". Vázquez tamén acusou os convocantes de non ter vontade de diálogo e reiterou que a folga fora "un erro".

Masiva protesta estudantil que a Xunta cualifica de "erro" e "engano"

Éxito na xornada de folga xeral no ensino de Secundaria e Bacharelato en Galicia. O paro convocado, entre outros, pola Liga Estudantil, os Comités e o Sindicato de Estudantes -este último xa desde o pasado martes- deixou sen case actividade a maioría dos centros públicos do país, onde tamén se rexistraron 25 manifestacións que xuntaron milleiros de mozos protestando contra a Lomce e os continuos recortes en Educación que leva aplicando o Goberno do PP. Malia todo, o conselleiro de Educación da Xunta, Jesús Vázquez, cualificou a folga de "erro" e instou os convocantes a "non confundir nin enganar" a cidadanía".

Segundo os primeiros datos das organizacións estudantís, o seguimento do paro no ensino medio nas principais cidades acadou o 90%, aínda que foi menor nas áreas rurais. En canto á folga nas universidades, cuxos alumnos estaban convocados tamén a apoiar as protestas, as cifras sitúanse nun 70%, aínda que con seguimento desigual e moito máis acusado na de Santiago de Compostela.

Entre berros de "menos sobres e máis educación", "a Lomce é a lei do opus dei" ou "esta reforma ímola parar", milleiros de estudantes saíron ás rúas das principais cabeceiras de comarca de Galicia para amosar o seu rexeitamento a unha reforma educativa que cualifican de "elitista, recentralizadora e ideolóxica" e que contou co apoio de varios representantes da oposición parlamentaria en diversas cidades. As urbes volveron acoller as maiores mobilizacións, especialmente as de Santiago, A Coruña e Vigo, e en todas elas se reclamou tamén a dimisión do ministro José Ignacio Wert.

Así e todo, a Xunta volveu censurar a mobilización. "É un erro e é incongruente que os que abandonan a mesa convoquen a protesta", asegurou, no entanto, o conselleiro en referencia ás negociacións da Lomce, tamén coñecida como Lei Wert, e que recibiu tamén as críticas do profesorado e das asociacións de pais e nais. Así, Jesús Vázquz chamou a recuperar o "diálogo", xa que, ao seu entender, o que se persegue coas protestas "son outras cuestións". "As formas de actuar non son as correctas", asegurou respecto da actitude dos sindicatos estudantís.

Greve no ensino contra a mercantilización e españolización dun servizo público

Esta cuarta feira a comunidade educativa (alumnado, profesorado e familias) mobilízase contra a Lei Wert e as súas consecuencias: privatización e españolización do ensino.

"Apostar por un ensino público de calidade é apostar, ao mesmo tempo, por unha sociedade xusta e democrática. Nas antípodas da defensa do carácter público do ensino está o modelo educativo do Partido Popular, inspirado nun proxecto profundamente reaccionario e que ten a única intención de converter o ensino nun privilexio". Baixo esta reflexión, esta cuarta feira haberá unha folga no ensino impulsada por diferentes organizacións estudiantís co apoio de sidicatos e colectivos de pais e nais. Trátase de plantar cara á unha aposta do PP por desmantelar o ensino como servizo público.
A folga é unha mostra da unidade do tecido da comunidade educativa á hora de rexeitar o plan de Wert, o ministro de Educación. Desde os Comités, Dani Candal sinala que "o conxunto de medidas educativas do Partido Popular ten como obxectivo endurecer as condicións de acceso e tamén de permanencia, non só na universidade senón no conxunto do sistema educativo. Por exemplo, a LOMCE, dunha maneira resumida, é un campo de obstáculos ao longo de todas as etapas educativas coa finalidade de expulsar canto antes do ensino os mozos e mozas".

Na mesma liña está a Liga Estudiantil Galega, para a cal a LOMCE non vai só contra os intereses da comunidade educativa, senón da sociedade en xeral e de Galiza, "O movemento estudantil ten a posibilidade de vertebrar unha alternativa no marco do ensino e nese sentido hai que seguir camiñando para que esas mobilizacións que teñen moito éxito, mais que son puntuais, sexan sistemáticas e que efectivamente planten cara ao poder e logren verificar na práctica as nosas reivindicacións cara á un modelo de ensino ben diferente".

Nace a "Asociación de Medios en Galego", unión inédita dos medios en galego para defender a nosa lingua

Tempos Novos, Novas da Galiza, Galicia Confidencial, Que Pasa na Costa, Xornal Certo, Radiofusión, de Luns a Venres, Praza Pública, O Compás e Valminor.info son os impulsores da "Asociación de Medios en Galego", un grupo que ten como obxectivo fortalecer e asentar os medios en galego, consolidar un espazo de comunicación na lingua propia ou contribuir á profesionalización do sector dos medios en galego, entre outros.

A asociación, que xa foi rexistrada na Xunta o pasado venres, está aberta a outros medios de comunicación. Polo momento, Sermos Galiza xa amosou a súa intención de integrarse na mesma. Esta iniciativa ten a súa orixe na experiencia Vitaminas para o Galego, impulsada o pasado ano e que desenvolveu varios eventos xornalísticos e culturais na defensa do noso idioma.

Obxectivos

Os principais obxectivos da nova Asociación de Medios en Galego serán defender os intereses dos seus asociados, favorecendo así o fortalecemento dos medios de comunicación en galego. Tamén contribuír ao proceso de asentamento do sector dos medios de comunicación de información xeral na lingua propia de Galicia e á consolidación dun espazo de comunicación en galego fomentando a presenza pública, tanto individual coma conxunta, dos medios de comunicación neste idioma.
Esta asociación tamén contribuirá á profesionalización do sector procurando que as empresas se doten de estruturas sólidas que garantan a proxección de cada medio e que acaden a independencia económica, e representará o sector diante das distintas administracións en todo aquilo que afecte aos medios de comunicación en galego.
Tamén debaterá colectivamente os temas de interese para o sector e asesorará as entidades produtoras de medios integradas para facer fronte aos problemas profesionais comúns, promovendo iniciativas lexislativas e administrativas que beneficien o sector. Ademais, desenvolverá accións, eventos e campañas de sensibilización tendentes a visibilizar na sociedade a existencia dos medios de comunicación en galego, intercambiará coñecementos e información entre os membros da asociación, promoverá proxectos comúns e contribuirá ao proceso de normalización lingüística.

Socios

Serán socios desta asociación as persoas físicas ou xurídicas cuxa actividade principal sexa a produción e tratamento de información calquera que sexa o seu soporte e que, entre outros requisitos, utilicen o galego, teñan unha periodicidade non superior a un mes e teñan unha vida mínima anterior á constitución de seis meses, sempre que máis do 70% da súa extensión ou tempo de emisión estean dedicados a contidos non publicitarios. Non poderán formar parte da asociación os órganos de expresión de administracións públicas ou entidades dependentes, partidos políticos, organizacións sindicais, patronais e colexios profesionais, así como calquera outra de análoga natureza, nin as asociación ou entidades que se atopen incursas en procesos concursais ou de disolución, ou que manteñan débedas con traballadores ou ex-traballadores.
Os medios interesados en formar parte desta asociación poden informarse enviando un mail a vitaminasgalego@gmail.com.

Información tirada de Galicia Confidencial.

A versión 3.5.1 de Wordpress, cen por cen dispoñible na nosa lingua

Que unha ferramenta útil e de uso común como Wordpress (sistema de xestión de contidos enfocado á creación de blogs) teña a interface de usuario dispoñible en galego, na súa flamante versión 3.5, é sempre unha boa nova, pero a nova xa se converte en excelente cando tradución á nosa lingua é do 100% na 3.5.1. Isto significa, entre outras cousas, que amais do panel de uso común, tamén veremos en galego elementos como os menús de administración.
Lembremos que detrás deste importante traballo atópase o grupo de localización de WordPress ao galego. Dende este colectivo informan, para que ninguén se deite a durmir e todos os usuarios de novas tecnoloxías en galego poidan ter ao alcance da man as vindeiras versións deste aplicativo de publicación de bitácoras, que é preciso seguir traballando para corrixir posibles erros e ir dando forma á vindeira achega 3.6, agora en desenvolvemento.
Coma noutras ocasións, lembran que non está de máis que cada quen poña o seu gran de area no labor de adaptación ao galego desta e outras ferramentas libres, e máis tendo en conta que se trata dun labor desinteresado, sen arela de lucro nin máis recompensa ca traballar a prol do idioma e da programación aberta, feito por voluntarios.

Información tirada de Código Cero.

'Galego, chave do mundo', lema do Correlingua 2013

A edición 2013 do Correlingua, carreira pola lingua do alumnado de todos os ciclos educativos, organizada pola CIG-Ensino, a Asociación Socio-Pedagóxica Galega (AS-PG), a Mesa pola Normalización Lingüística e os Concellos de Pontevedra, Vigo, Lugo e Ourense xunto coa Deputación de Lugo, comezou xa con diferentes actividades nos centros educativos de Galiza que farán a súa achega participando nos concursos de Manifesto, Banda Deseñada, Vídeo e Cantalingua.
O Correlingua que nesta edición terá lugar baixo o lema Galego, chave do mundo, é unha proposta de carácter lúdico-educativo que pretende convidar á mocidade e aos centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro.

Folga no ensino contra a mercantilización e españolización dun servizo público

"Apostar por un ensino público de calidade é apostar, ao mesmo tempo, por unha sociedade xusta e democrática. Nas antípodas da defensa do carácter público do ensino está o modelo educativo do Partido Popular, inspirado nun proxecto profundamente reaccionario e que ten a única intención de converter o ensino nun privilexio". Baixo esta reflexión, esta cuarta feira haberá unha folga no ensino impulsada por diferentes organizacións estudiantís co apoio de sidicatos e colectivos de pais e nais. Trátase de plantar cara á unha aposta do PP por desmantelar o ensino como servizo público.
A folga é unha mostra da unidade do tecido da comunidade educativa á hora de rexeitar o plan de Wert, o ministro de Educación. Desde os Comités, Dani Candal sinala que "o conxunto de medidas educativas do Partido Popular ten como obxectivo endurecer as condicións de acceso e tamén de permanencia, non só na universidade senón no conxunto do sistema educativo. Por exemplo, a LOMCE, dunha maneira resumida, é un campo de obstáculos ao longo de todas as etapas educativas coa finalidade de expulsar canto antes do ensino os mozos e mozas".
Na mesma liña está a Liga Estudiantil Galega, para a cal a LOMCE non vai só contra os intereses da comunidade educativa, senón da sociedade en xeral e de Galiza, "O movemento estudantil ten a posibilidade de vertebrar unha alternativa no marco do ensino e nese sentido hai que seguir camiñando para que esas mobilizacións que teñen moito éxito, mais que son puntuais, sexan sistemáticas e que efectivamente planten cara ao poder e logren verificar na práctica as nosas reivindicacións cara á un modelo de ensino ben diferente".

Unha folga estudantil que se prevé histórica contestará con dureza á Lei Wert

O alumnado galego de Secundaria e Bacharelato sairá este mércores á rúa e baleirará as aulas nunha xornada de folga que se prevé "histórica" en Galicia. Será unha nova e contundente protesta contra a Lomce (Lei Orgánica para a Mellora da Calidade Educativa) e unha reforma educativa que desde as organizacións estudantís se ve como a intención de "converter o ensino nun privilexio" e a plasmación do proxecto ideolóxico do PP na ensinanza, "co obxectivo de debilitala, facela menos pública, menos democrática, menos galega e de menos calidade".

As mobilizacións comezaron xa este martes, coas tres xornadas de folga consecutivas convocadas polo Sindicato de Estudantes a nivel estatal, pero será este mércores cando se amplifique a protesta en Galicia, co paro xeral ao que chaman tamén as dúas principais organizacións estudantís galegas, as nacionalistas Liga Estudantil Galega e Comités, que prevén un apoio masivo, tanto á folga como ás manifestacións.

Será a convocatoria que conte con máis marchas convocadas nos últimos anos, con arredor de 25 manifestacións en varias cabeceiras comarcais de Galicia e moito máis aló das cidades, que levarán o peso das protestas. "Agardamos unha resposta masiva contra a Lomce", asegura Daniel Candal, voceiro dos Comités, que lembra o apoio social que están a recibir os estudantes, ademais do de profesores e pais.
"Os recortes no ensino e a Lei Wert non só son unha agresión contra os estudantes, senón que afectan o conxunto da sociedade porque supoñen recortes en democracia e en igualdade de dereitos", engade Candal, nunhas palabras nas que coincide con Diotino Nóvoa, voceiro da Liga Estudantil. "Son medidas que afectan a moita xente e aos máis desfavorecidos da sociedade, que ven moi prexudicado o seu futuro", asegura, tras prever tamén "unha ampla mobilización" e amosarse gratamente "sorprendido" polo apoio que as mobilizacións están a recibir nos centros de Secundaria.

"O Goberno non ten dúbida en atacar os máis novos porque pensan que somos a cadea máis débil; sempre se dixo que os mozos estamos desmobilizados, pero a cousa semella que está revirando", engade Candal, que destaca "a unidade de acción" e a fortaleza do movemento estudantil nacionalista como claves da boa resposta que xa nos últimos meses tiveron as protestas.

Ademais, tanto desde a Liga como desde Comités recoñecen que a "situación social" que se está a vivir, os continuos recortes, os "abusos de poder" e os casos de corrupción engaden "máis rebeldía" a unha mocidade que xa ve negro o seu futuro laboral e que asiste cada mes aos duros datos de desemprego xuvenil.

"É evidente que o causante de todos os problemas é o sistema que padecemos; estamos nunha situación na que os mozos galegos non podemos nin traballar nin estudar", recorda Candal, que aclara que "por algún lado ten que saír o descontento social tan xeralizado cara ás políticas do PP". "O deste mércores é unha protesta estudantil pero tamén é unha protesta xeral", remata.
Pablo Álvarez (Sindicato de Estudantes): "isto non é só unha loita dos estudantes ou dos mestres senón que afecta a toda a sociedade"

A Galipedia prepara o seu décimo aniversario rozando os 100.000 artigos

Ou: Conxunción. Con valor disxuntivo expresa unha alternancia. ¿Queres que ceemos ou queres que baixemos? Flores amarelas ou brancas. Deste xeito, con carácter disxuntivo, botaba a andar a Galipedia, a wikipedia en galego, hai xa unha década. O 8 de marzo de 2003 o usuario ILVI creaba a primeira versión da portada da Galipedia e, cinco días despois, o 13 de marzo, creaba o primeiro artigo, dedicado á conxunción ou. Pouco despois, e tal como se reflicte no texto dedicado á propia Galipedia, chegaron os seguintes termos: cal, ciencias experimentais, ciencias humanas, ciencias ocultas, ciencias aplicadas e botánica. Nos primeiros meses rexistrouse o usuario Agremón, converténdose no primeiro administrador e empregando por vez primeira o termo Galipedia.

Dende aquela, xa pasaron dez anos e máis de 97.000 artigos creados por unha comunidade colaborativa que prepara o décimo aniversario da iniciativa coa intención de lle dar máis difusión a esta ferramenta virtual de coñecemento. “Nestes tempos resulta imprescindible ter unha enciclopedia en rede, que se ocupe de darnos información en galego do mundo. E tamén resulta imprescindible poder contar na rede con información fiable sobre Galicia e que estea na nosa lingua”, explica Manuel Igrexas, profesor en Lalín, un dos dez administradores da Galipedia e o editor máis activo, con máis de 4.500 artigos creados segundo as estatísticas do propio portal. Outros usuarios activos tamén subliña a relevancia da ferramenta no eido da normalización. “É esencial ter unha mirada propia, dende a nosa lingua, da nosa cultura e do mundo que nos rodea. Se estivésemos normalizados, a Galipedia sería simplemente algo máis que está aí. Pero non o estamos e resulta importante” sinala Alejandro Tobar, o décimo editor con máis actividade segundo as estatísticas internas da Galipedia.

Os perfís de Manuel Igrexas, cuxo nome de usuario é Xas, ou de Tobar responden ás características da comunidade que lle dá vida e soporte á Galipedia. Coma eles, hai un conxunto duns vinte usuarios que son considerados os máis activos e que superan o milleiro de artigos creados. Segundo o artigo da Galipedia, en realidade son entre os 260 e 330 os editores habituais, sendo preto de vinte os que invisten máis tempo e esforzo. E, como en toda comunidade, hai unha mínima xerarquía de organización. “Na comunidade hai dúas categorías. A primeira é o simple editor, que pode ser calquera usuario que achega información e edita os artigos, en maior ou menor número. A segunda está formada polos administradores, que son escollidos polo conxunto de editores atendendo a criterios de traxectoria, número de correccións, edicións, etc. Os administradores son os que se encargan de levar o control da Galipedia”, explica Manuel Igrexas, que destaca neste senso o “valor colaborativo e democrático” do proxecto.

A Mesa pola Normalización Lingüística recibiu unha sentenza favorable ás súas teses no recurso perante o TSXG

A Xunta é o primeiro goberno autonómico do Estado que recorre aos tribunais para que o seu idioma propio estea máis desprotexido

Carlos Callón: “Insulta a intelixencia de calquera que nos digan que gañaron as sentenzas e que, ao mesmo tempo, as van recorrer”.
A Xunta tira diñeiro de todas e todos para atacar o noso idioma nos tribunais, cando a súa obriga é defender a nosa lingua e a nosa cultura
Santiago de Compostela, 30 de xaneiro de 2013.- A Mesa pola Normalización Lingüística, a primeira entidade que recibiu unha sentenza favorábel ás súas teses no recurso perante o TSXG polo decretazo contra o galego, considera “obscenos” os argumentos utilizados pola Xunta para os seus recursos perante o Tribunal Supremo. A Mesa recorda que, aínda que houbo gobernos noutras comunidades do Estado que si practicaron nalgún momento políticas contra as súas linguas (como os de Navarra ou Valencia), a Xunta de Feijóo é “o primeiro goberno autonómico que recorre aos tribunais para conseguir unha maior desprotección para o seu idioma”.
O presidente da Mesa, Carlos Callón, apunta ademais que “está á vista de todo o mundo que temos un presidente que é mentireiro compulsivo”, pois “insulta a intelixencia de calquera que se nos diga que gañaron as sentenzas e que, ao mesmo tempo, as van recorrer”. “Ha de ser a primeira vez na historia que alguén recorre sentenzas que di que gañou!”, ironiza.
As varias sentenzas do TSXG anulan por ilegais os núcleos do decreto do plurilingüismo e o cerne do discurso do PP sobre a presenza dos idiomas no sistema educativo. Así, o decreto en vigor é un “decreto zombi”, posto que, aínda que continúa en vigor, “en realidade está xa morto xuridicamente, igual que estaba xa morto socialmente e pedagoxicamente”, pois é unha norma “sen apoios na comunidade educativa e considerada unanimemente como inservíbel desde o ámbito da pedagoxía”.
A Mesa lamenta tamén que “nun momento como o actual, en que tan necesaria é a cohesión social de Galiza, a aposta da Xunta sexa destruír a nosa cultura todo o posíbel, mesmo malgastando diñeiro público nese obxectivo, como está a acontecer agora cos seus recursos ao Tribunal Supremo”. No entanto, a asociación asume que “dará a batalla en todos os ámbitos que for preciso para defender o galego na escola”.

Rexeitamento frontal ao recurso da Xunta que tenta "aumentar a desprotección do galego"

A Xunta decidiu enlamarse nunha batalla xudicial co galego como protagonista, logo de anunciar o pasado martes que xa se prepara para presentar un recurso de casación ante o Supremo contra as numerosas sentenzas que anulan o cerne do decreto do plurilingüismo. Todo, malia que o Goberno de Feijóo insiste unha e outra vez en que os ditames "avalan" a norma e a súa política lingüística. O rexeitamento de colectivos, sindicatos e oposición é, de novo, frontal e rotundo.

A Mesa pola Normalización Lingüística, a primeira entidade que recibiu unha sentenza favorábel por parte do TSXG, cualifica de "obscenos" os argumentos utilizados pola Xunta para os seus recursos perante o Tribunal Supremo e recorda que, aínda que houbo gobernos noutras comunidades que si aplicaron políticas contra as súas linguas, o Executivo de Feijóo é “o primeiro que recorre aos tribunais para conseguir unha maior desprotección para o seu idioma”.
O presidente da Mesa, Carlos Callón, asegura que “está á vista de todo o mundo que temos un presidente que é mentireiro compulsivo”, pois “insulta a intelixencia de calquera que se nos diga que gañaron as sentenzas e que, ao mesmo tempo, as van recorrer”. “Ha de ser a primeira vez na historia que alguén recorre sentenzas que di que gañou!”, ironiza.

Outro dos colectivos aos que o TSXG estimou en parte o recurso, CIG-Ensino, cre que a Consellaría de Educación "amosa unha vez máis a súa galegofobia" e entende que o feito de que a Xunta decida finalmente acudir á Xustiza implica que o Goberno sabe que os ditames "poñen en entredito o decreto". "Insisten na súa política contra a nosa lingua, que é o seu obxectivo central, e para iso non dubidan en gastar importantes cantidades de diñeiro en recorrer estas sentenzas porque amparan o noso idioma", engade a central nacionalista, que coincide coa Mesa en denunciar tamén o gasto de cartos públicos para atacar a cultura propia.

Alternativa Galega de Esquerda (AGE), pola súa banda, considera que "a belixerancia da Xunta contra a lingua galega non parece coñecer límites" e critica o "asañamento" do PP "co idioma que o Estatuto considera propio de Galicia". “Jesús Vázquez é un perverso galegófobo que desde a institución que debera defender a identidade galega”, lembra o deputado Xabier Ron, “non deixa de atentar contra a súa lingua”. "O conselleiro e Feijóo teiman no seu odio furibundo contra o galego e a cultura galega", insiste.

Ademais, o membro da Executiva Nacional de Compromiso por Galicia (CxG), Henrique Monteagudo, cre que “o Partido Popular ten que reflexionar”, xa que as sucesivas sentenzas do TSXG “desmontan un por un todos e cada un dos elementos principais do decreto”. O membro da Real Academia Galega considera tamén que Feijóo perdeu unha oportunidade para rectificar “unha política lingüística errada que se basea no desprezo total e absoluto ao galego".
Monteagudo destaca tamén que "este desprezo e maltrato da lingua" está acompañado dun “desprezo ás institución propias”, xa que "Feijóo acode a Madrid, ao Tribunal Supremo, para que resolva sobre unha materia que é competencia exclusiva da Comunidade Autónoma".

Maré de reaccións contra o recurso da Xunta ao Supremo para salvar o decreto de plurilinguismo

Organizacións políticas, sindicais ou cidadás amosan o seu rexeitamento á decisión da Xunta de presentar recurso de casación ante o Tribunal Supremo para intentar enmendar o lapote que lle deu o TSXG ao seu decreto de 'pulrilingüismo'

O domingo, milleiros de galeg@s encheron as rúas de Compostela en defensa do galego. 48 despois, a Consellería de Educación informaba que se personaba diante do Tribunal Supremo co fin de presentar o recurso de casación contra as sentenzas ditadas polo Tribunal Superior de Xustiza galego arredor do decreto do plurilingüísmo. A respostaretadora do goberno autonómico ao clamor social que defendía o galego na mobilización da capital de Galiza.
Diferentes entidades e organizacións están a amosar o seu rexeitamento contra esta decisión da Xunta. Desde A Mesa afirman que "é o primeiro goberno autonómico do Estado que recorre aos tribunais para que o seu idioma propio estea máis desprotexido". Para o seu presidente, Carlos Callón, “insulta a intelixencia de calquera que nos digan que gañaron as sentenzas e que, ao mesmo tempo, as van recorrer”.

Galegofobia.

Desde a CIG-Ensino denuncian "a galegofobia da Xunta", que vai provocar un "gasto importante para recorrer as sentenzas do TSXG por ampararen o noso idioma". O sindicato nacionalista considera que "o Partido Popular emprendeu desde o primeiro día unha cruzada contra o noso idioma, procurando a súa desaparición das aulas, privando así o alumnado do dereito a ser escolarizado na súa lingua propia, e procurando que deste xeito a nosa lingua deixe de ser falada entre as e os máis novos".
Mentres, o AGE considera que "a belixerancia da Xunta de Alberto Núñez Feijóo contra a lingua galega non parece coñecer límites", engadindo que "o Executivo de Feijóo, a través do brazo executor do conselleiro Vázquez, pasará á historia como lingüicida".
Tamén desde Compromiso por Galicia mostraron o seu rexeitamento ao recurso. e consideran que con esta decisión "Feijóo maltrata á língua e á xustiza galega".

Bota a andar o Taboleiro do Libro Galego, un proxecto que achegará unha listaxe semanal das obras máis vendidas en lingua galega

Desde o coñecido blog Caderno da Crítica, o profesor e tradutor Ramón Nicolás botou a andar esta fin de semana o Taboleiro do Libro Galego, no que se achegará unha listaxe semanal das obras máis vendidas nas nosas letras atendendo ás categorías de Narrativa, Poesía, Ensaio-Teatro, Literatura Infantil e Xuvenil, Banda Deseñada e mais Álbum Ilustrado.
Un total de 12 librarías de diferentes localidades do país achegan os datos para elaborar estas listaxes, que abren con As voces baixas, de Manuel Rivas como a obra de narrativa máis vendida dos últimos sete libros, e Ardalén, de Miguelanxo Prado, a encabezar as vendas de banda deseñada.

Información tirada de culturagalega.org.

Pecha o último diario impreso en lingua galega

A compañía de Lugo pecha a edición diaria en papel de De Luns a Venres (LV), o último medio impreso a diario en galego. A empresa promete que o cambio non suporá a desaparición da información diaria, que di se reforzará a través da súa páxina web. Tamén promete que a nova publicación semanal aumentará as páxinas e a tirada, mantendo a aposta polo idioma galego.
Pola súa banda, o Colexio de Xornalistas reaccionou xa ao peche de LV. Na súa opinión a desaparición de LV non obedece á falta de receptividade e apoio dos lectores, xa que, segundo asegura o propio medio no seu derradeiro número, "pechou o ano 2012 como o xornal de maior crecemento da prensa de Galicia, segundo o Estudio General de Medios (EGM), cun 34,29% de suba, que lle permitiu acadar os 38.000 lectores". Outros 7000 recibían o xornal a diario nos seus correos electrónicos.

Máis información en Galicia Confidencial.