Meteogalicia presentou
onte as actividades para este mes de marzo, algunhas delas moi
ligadas co ámbito TIC (por exemplo cos novos servizos e
funcionalidades incorporados a meteogalicia.es).
Segundo fixeron saber fontes do servizo autonómico, recibirá ao
longo destas catro semanas un total de 303 alumnos de diferentes
centros de ensino e colectivos de Galicia repartidos en 8 grupos. As
visitas, de feito, comezaron esta semana coa acollida de medio cento
de nenas e nenos de 5º e 6º de Primaria do CEIP San Xosé Obreiro
de Arteixo e máis un grupo de 22 alumnos do mesmo curso do CEIP
Mestre Rodríguez Xixirei, de Santiago.
As actividades
proseguirán o día 8 (IES do Milladoiro de Ames), o 9 (ASPACE
Coruña), o 15 (IES do Milladoiro), o 16 (CEIP Sigüeiro de Oroso), o
29 (CEIP Raíña Fabiola de Santiago) e o 30 (CEIP
Infante Felipe Borbón, de Salvaterra do Miño)
Nestes encontros, amais
de amosar o funcionamento e os sistemas de predición de
Meteogalicia, aproveitarase para explicar aos visitantes a
optimización levada a cabo na web do servizo meteorolóxico galego,
que consiste na posta en marcha dun sistema de elaboración
automática de comentarios na predición a curto prazo específico
para cada concello e que xa
está dispoñíbel na páxina de seu. Segundo informan dende
Meteogalicia, este reforzo a información é froito da colaboración
entre o servizo meteorolóxico autonómico e a Universidade de
Santiago de Compostela (USC) para mellorar a información sobre a
predición meteorolóxica dos concellos que se ofrece a través da
páxina web. Grazas a el, as notas explicativas ofrecen o prognóstico
meteorolóxico e o índice de calidade do aire en cada concello
galego, entre outras cousas. O comentario xérase de xeito automático
a partir da aplicación GALiWheather, empregando para isto técnicas
de intelixencia artificial e xeración de linguaxe natural.
Ningún comentario:
Publicar un comentario