mércores, 30 de marzo de 2016

A USC impulsa o primeiro curso sobre microbioloxía que se realiza en Twitter

O grupo de Docencia e Difusión da Microbioloxía da Sociedade Española de Microbioloxía (SEM) vén de pór en marcha o que sería o primeiro curso mundial en liña vía Twitter sobre microbioloxía (sendo a dita Sociedade a primeira das súas características que pon en marcha unha actividade formativa a través da rede social). Dáse a circunstancia de que o curso terá sobranceiros apoios galegos. Máis polo miúdo os do Grupo de Innovación Docente en Microbioloxía da Universidade de Santiago (MIKROBIOS) coordinado polo profesor Jesús López Romalde. Na actividade participan xunto con outros 27 docentes e investigadores de 20 universidades e centros de investigación.
O obxectivo é botar man das posibilidades comunicativas de Twitter para acadar unha linguaxe concisa, certeira e moi visual ao servizo da difusión de conceptos sobre microbioloxía. Vai dirixido a estudantes de bacharelato, profesores de secundaria, universitarios, profesionais das ciencias, xornalistas científicos e público en xeral. As “clases” compoñeranse de 30-40 chíos con contidos, webs, ligazóns, novas, imaxes ou vídeos sobre cuestións científicas relacionadas coa microbioloxía dunha duración de arredor de 30 minutos que se enviarán a unha hora e día da semana concretos. “Cada día tratarase un tema distinto”, sinalan os impulsores da actividade, que lembran que se trata, no seu conxunto, dun curso en liña masivo gratuíto (MOOC) que poderá seguir calquera persoa a partir do 5 de abril (ata o 2 de xuño) con conta en Twitter coa etiqueta #microMOOCSEM. As “clases” enviaranse a través da conta de Twitter da SEM @SEMicrobiologia e quedarán logo recollidas no enderezo storify.com/microMOOCSEM.

Ningún comentario:

Publicar un comentario