Colexios e institutos da zona compiten para sumar máis alumnos

Nalgúns centros do rural está en xogo a súa supervivencia

Os colexios e institutos da zona abriron o prazo de reserva de praza para o novo curso para infantil, Primaria, Secundaria e BAC. Ata o día 29 poderán presentarse as peticións na secretaria dos centros de ensino que compiten para sumar alumnos e dan a coñecer os seus encantos.

Mentres nalgúns colexios como no Xesús Golmar de Lalín están á espera de que o número de matriculados poida determinar algún aumento de unidades, noutros do rural contan os nenos nados fai tres anos no municipio coa esperanza de manter a matrícula e non perder alumnos. Desas cifras, nalgún caso, depende a súa supervivencia. Nalgún colexio como o Manuel Rivero, hai algúns cursos nos que a oferta de prazas é cero, ao estar xa ao completo. O colexio lalinense oferta para o próximo curso 25 prazas para nenos de tres anos (vinte e dous, máis tres para escolares con necesidades especiais) e só conta con tres vacantes en cinco anos, dous en terceiro de Primaria, unha en cuarto e catro en quinto de Primaria. No resto, de momento, a non se ser que se produza algunha baixa ou algún traslado máis adiante, non se oferta ningunha.

No Figueroa da estrada tampouco hai moitas. Si en tres anos, onde se ofertan cincuenta, do mesmo xeito que o pasado ano, pero no resto dos cursos de infantil só hai quince vacantes en total, sumando as existentes en catro e cinco anos. A estas engádense oito en cuarto de Primaria, catro en segundo e nove en sexto. O sexto deste curso é máis numerosos e intégranos 45 escolares que abandonarán o colexio para irse ao instituto. Neste centro, o primeiro día xa houbo varios pais que entregaron a solicitude de praza para os seus fillos. No Xesús Golmar de Lalín teñen dezasete vacantes en catro anos e cinco en cinco anos. En Primaria o centro conta con tres unidades en todos os cursos, menos en segundo e en cuarto que hai catro.

Un elevado número de estudantes co que soñan outros colexios máis pequenos que loitan por rabuñar alumnos e seguen intentando convencer os pais do centro urbano das excelencias dalgúns dos centros do rural lalinense ofrecendo comedor, transporte e clases menos saturadas.

Os vaivéns da natalidade traen en xaque aos máis pequenos

Os vaivéns da natalidade traen de rúa aos equipos directivos dos colexios máis pequenos. A maioría leva ao día as contas dos nenos nados. En Rodeiro saben que fai tres anos naceron dez. Unha cifra nada boa, tendo en conta que este curso abandonarán o centro, polo menos, os dezanove que cursan sexto. Dentro de tres anos esperan poder beneficiarse do bum da natalidade do 2015, un ano no que naceron vinte pequenos. Logo, está claro, fai falta que todos se matriculen neste colexio.

No de Vilatuxe, este ano teñen oito de tres anos e consideran que sete incorporacións xa as teñen garantidas. En Merza este curso xa non había ningún de sexto e saben do irmán dalgún alumno que se matriculará para o novo curso. En Piloño tamén fan contas porque se lles van unha decena, o curso máis numeroso do colexio que conta este ano con 62 alumnos. No colexio de Cerdedo vanse oito de sexto e saben que fai tres anos naceron cinco nenos, pero algún xa reside en Pontevedra.

Os institutos tamén abren o prazo ata o día 29 para alumnos procedentes doutros centro. O Laxeiro oferta os BAC de Humanidades e Ciencias Sociais e o Científico-Tecnolóxico, mentres que o Ramón María Aller engade aos de Humanidades e Ciencias Sociais e ao de Ciencias e Tecnoloxía, o de Artes.

O Laxeiro oferta 27 prazas vacantes en Primeiro da ESO, dezaseis en segundo, nove en terceiro e 28 en cuarto. Dezaseis en primeiro de BAC e dezaoito en segundo. Son as que quedan en principio, despois de descontar as reservas internas.