Wert cede e estuda atrasar para FP a reforma de acceso aos campus

• O novo sistema sen Selectividade debía entrar este ano para estes alumnos

• O ministro afirma que as bolsas universitarias aumentarán un 9% este curso

• As universidades queren atrasar a reforma de acceso aos campus

O ministro Wert estase a ver obrigado pouco a pouco a ceder no calendario de aplicación da súa reforma, que parte da comunidade educativa lle vén reclamando que pospoña. Esta vez, o titular de Educación aceptou un posible atraso na posta en marcha do novo sistema de acceso á Universidade sen Selectividade que comezaba xa, no curso 2014-2015, para os alumnos que proceden da FP (e para os que chegan de sistemas estranxeiros). As universidades e varias comunidades autónomas reclamáronlle que o pospoña a 2017, cando se aplicará á maioría dos estudantes. Ata o punto de que os campus acordaron que, se o Goberno non atende a súa petición, usarán a liberdade que lles dá a LOMCE para aprobar unha normativa que deixe todo igual ata 2017. Onte, tras reunirse coas comunidades na Conferencia Xeral de Política Universitaria, Wert aveuse a dar marcha atrás no caso da FP: "Pódese estudar", resolveu.

As universidades e varias comunidades reclaman que se pospoña a 2017

O ministro insistiu en que a reforma que elimina a Selectividade e a substitúe por unha reválida ao final do Bacharelato -ademais de permitir ás facultades que establezan as probas e os mecanismos de acceso que queiran para cada unha das súas titulacións- non empezará ata 2017 para o groso dos alumnos (fundamentalmente os de Bacharelato español), e que no caso dos que proceden da FP (o 12% do total de alumnos) o novo sistema non difire moito do que xa tiñan. As universidades obxectan, non obstante, que non lles dá tempo a aplicalo xa e que tampouco ten sentido que coexistan dous sistemas diferentes. Non nos parece ben que rexan modelos distintos para estudantes que van optar ás mesmas prazas. O máis xusto é mantelo todo como está os próximos tres anos", asegura Luis Rodríguez, vicereitor de estudantes da Universidade de Oviedo.

No sistema vixente ata agora, os alumnos procedentes da FP Superior teñen acceso directo ás ensinanzas universitarias de grao. A súa nota de admisión obtense facendo a media entre os módulos do ciclo formativo (cun máximo de 10) e, se queren mellorala, poden presentarse á parte específica da Proba de Acceso á Universidade (PAU ou, como lla coñece, Selectividade), para chegar ata 14. Coa Lei Wert, ademais da nota media que traian da FP, as universidades poden valorar máis aspectos, coma se teñen outra formación profesional ou outros estudos superiores, ademais de sometelos a "avaliacións específicas de coñecementos e competencias", di o borrador de decreto de acceso á Universidade. "Non" dá "tempo a organizalo todo, é inasumible que entre en vigor este curso", quéixase o vicereitor de Oviedo. "É imposible que se aplique xa", dixo onte á saída da reunión co ministro a directora xeral de Universidades asturiana, Miriam Cueto. O responsable de universidades catalán, Antoni Castellà, e o andaluz, Francisco Triguero, tamén expresaron as súas dúbidas sobre o calendario.

Educación recoñece que ningún alumno cobrou aínda o total das súas axudas

Ademais do novo acceso á Universidade, Wert informou onte á Conferencia Xeneral de Política Universitaria dos datos de bolsas. O ministro asegurou que as axudas xerais e ao estudo aumentarán este curso entre un 8% e un 9%, ata os 322.318 beneficiarios. É dicir, unhas 25.000 bolsas máis respecto ao ano pasado, segundo afirmou na rolda de prensa posterior. O incremento débese "a un importante aumento no rendemento dos estudantes", dixo Wert, que recoñeceu que ningún alumno recibiu aínda a contía total da bolsa, porque o novo sistema esixe que se tramite o total das solicitudes (e aínda non remataron de facelo, pasado o ecuador do curso) para distribuír, en función dos beneficiarios totais, a parte variable da axuda. "Empezarase a pagar nas próximas semanas", asegurou.

Maioría de alumnas, minoría de profesoras

En España dende hai anos licéncianse nas universidades moitas máis mulleres que homes. Concretamente, en 2011, completaron os seus estudos 134,7 mulleres por cada 100 homes, estreitando lixeiramente o desequilibrio que se advertía en 2010 (137,1 por cada 100) ou en 2008 (140,1 por cada 100). Porén, este claro dominio feminino nas aulas das universidades, segue sen ter aínda un reflexo nunha proporción semellante de profesoras, e moito menos de profesoras titulares ou de catedráticas. Son algúns dos datos que forman parte da publicación Mujeres y Hombres, elaborada polo Instituto Nacional de Estatística (INE), e que vén de actualizar o seu campo dedicado á educación.

A medida que se ascende nos distintos niveis de escolarización: educación infantil, primaria, secundaria, bacharelato, formación profesional, universidade..., a presenza feminina entre as docentes vai diminuíndo

Na información estatística, que non só se refire á universidade, senón que abrangue todo o sistema educativo, advírtese que a medida que se ascende nos distintos niveis de escolarización: educación infantil, primaria, secundaria, bacharelato, formación profesional, universidade..., a presenza feminina entre as docentes vai diminuíndo. Así, se en educación infantil o 97,2% das mestras son mulleres e estas porcentaxes son igualmente contundentes en educación primaria (80,2%) e especial (81,6%), cando chegamos a secundaria, bacharelato e formación profesional as cifras iguálanse (56% de mulleres), e a realidade dá unha volta ao entrar nas ensinanzas artísticas (45,5% de mulleres) e, sobre todo, na etapa universitaria (38,6% de profesoras).
Dentro deste porcentaxe do 38,6%, ademais, cómpre salientar que a presenza feminina vai reducíndose a medida que se ascende de escala: no profesorado contratado elas son o 41,5%, entre os titulares a súa presenza baixa até o 39,3%, e só o 19,5% dos catedráticos son mulleres. En Galicia, como lembraba GCiencia hai uns días, as cifras son mesmo menores: Vigo (18,5%), Santiago (12,4%) e A Coruña (11,1%). En canto ao profesorado titular, a de Santiago é a universidade que máis se achega á igualdade, cun 43,6% de mulleres, mentres que Vigo (38%) e A Coruña (37,3%) baixan do corenta por cento.

Tamén se advirte un gran desequilibrio no número de mulleres graduadas nos estudos de ciencias, matemáticas e tecnoloxía, un indicador no que no ano 2011, por vez primeira, os homes españois superaron a media da UE

Tamén se advirte un gran desequilibrio no número de mulleres graduadas nos estudos de ciencias, matemáticas e tecnoloxía, un indicador no que no ano 2011, por vez primeira, os homes españois superaron a media da UE. Así, nese ano había en España 23 licenciados nestas áreas por cada mil homes entre 20 e 29 anos, fronte a unha media europea de 22,3. Esta taxa foise incrementando con rapidez dende o ano 2008, cando se rexistraban 15,8 licenciados por cada mil persoas nesa franxa de idade (fronte a unha media europea de 19 por cada mil).

As mulleres son máis en practicamente todas as áreas de estudo, comezando por educación (77%), saúde (76%), ciencias sociais e dereito (62%) e humanidades e arte (61%), pero non en ciencias, matemáticas e informática (36%) e enxeñaría (27%)

Porén, a presenza feminina segue moi por debaixo desas cifras e non chega nin á metade. Así, en España había en 2011 10,4 mulleres licenciadas en ciencias por cada mil, por debaixo da media europea (11,1%). A pesar de que se produciu un notable incremento dende 2008 (7,2), o diferencial cos homes mesmo aumentou neste tempo. Romanía, Dinamarca e Polonia son os países da UE coas taxas máis altas de mulleres graduadas en ciencia, matemáticas e tecnoloxía. Pola contra, Chipre, Hungría, Holanda e Luxemburgo sitúanse nos tres últimos postos.
Estas cifras compleméntanse co dato sinalado ao comezo deste texto, que facía referencia á clara maioría feminina entre os estudantes universitarios. As mulleres son máis en practicamente todas as áreas de estudo, comezando por educación (77%), saúde (76%), ciencias sociais e dereito (62%) e humanidades e arte (61%), pero non en ciencias, matemáticas e informática (36%) e enxeñaría (27%). As proporcións por xénero en todas as áreas mantéñense, ademais, inalteradas dende 2008. Nas tres universidades galegas, as mulleres son maioría en todos os campos, agás nas carreiras técnicas, nas que se detecta unha clara maioría masculina: 4.300 mulleres por 9.700 homes.

A CIG-Ensino promoverá demandas por despido improcedente do profesorado que impartía cursos CELGA

A CIG-Ensino avanzou que a práctica totalidade do profesorado de secundaria de galego se negou a impartir estes cursos como horas extras como pretendía Educación.

CIG-Ensino denunciou este martes en rolda de prensa a situación que atravesa o profesorado que viña impartindo cursos CELGA unha vez que a Secretaría Xeral de Política Lingüística decidiu desfacerse deste colectivo e ofrecerlle ao profesorado en activo dos centros de secundaria que imparta estes cursos como horas extras, co obxecto de evitar, así, a aplicación da resolución das Inspeccións de Traballo da Coruña e de Ourense que obrigan a contratar a estes docentes.

Unha vez coñecida esta decisión, a través do profesorado dos centros, a CIG-Ensino  propúxolle aos docentes en activo que, por solidariedade, non impartise estes cursos. A esta altura, informou o Secretario Nacional da CIG-Ensino, Anxo Louzao, xa podemos confirmar que a práctica totalidade do profesorado dos centros está negándose a dar os cursos. "Dámoslles os parabéns ao profesorado que  se solidarizou e que rexeitou ser complice da Consellaría", di Louzao.
O secretario Nacional da CIG-Ensino subliñou que a Consellaría está actuando de maneira fraudulenta e que en lugar de aplicar as resolucións da Inspección de Traballo, afonda na irregularidade deixando no paro a un colectivo importante cuxa listaxe inclúe 476 profesores/as. Marta Dacosta, integrante tamén da Executiva da CIG-Ensino lembrou que estas resolucións da  inspección recoñecen a situación irregular deste profesorado, obrigan a dalo de alta na Seguridade Social con efectos retroactivos e impóñenlle unha sanción económica á Consellaría de máis de 200.000 euros. A CIG-Ensino explicou que a Inspección de Traballo da Coruña se dirixiu de oficio aos xulgados para que determine que tipo de relación contractual lle corresponde ter a este profesorado coa Administración.
Diante desta situación, a CIG-Ensino anunciou que promoverá entre o profesorado CELGA a presentación de denuncias por despido improcedente e presentará unha queixa do Valedor do Pobo. Ao tempo continuará coa campaña nos centros para convencer ao profesorado de que se negue a facer horas extras.
Na rolda  de prensa, David Cobas, que é un dos profesores que impartía os CELGA engadiu, que este último paso da Consellaría  non está avalado por ningunha normativa, que non existe ningunha orde ou resolución que ampare esta decisión de ofrecerlle os cursos ao profesorado en activo. Neste sentido Louzao acusou á Consellaría de ser “un niño de caciquismo, irregularidades e fraude” e denunciou que xa no mes de decembro Educación fixo chamamentos a profesorado para formar teletirores de linguaxe específica de galego sen respectar a listaxe de profesorado que existía, sen coñecerse os criterios nin a baremacion do profesorado e sacando unha resolución posterior para tratar de darlle legalidade.
Anxo Louzao engadiu que a CIG-Ensino seguirá a loitar polas melloras salariais do profesorado pero non a costa de deixar no paro a outros colectivos e avanzou tamén que o sindicato ten prevista a celebración de asembleas nas sete cidades co profesorado afectado para decidir nova propostas de actuación.

Ligazón ao CIG-Informa

A campaña activada por unha profesora sevillana para pedir que Música volva a Primaria alcanza case 168.000 firmas

A iniciativa activada na plataforma dixital Change.org por unha profesora sevillana de Música para solicitar ao ministro de Educación, Cultura e Deporte, José Ignacio Wert, que restitúa esta materia como troncal en Educación Primaria obtivo xa case 168.000 firmas de apoio a data 14 de marzo.

Baixo o título 'Que a Música volva a Primaria', a campaña foi impulsada por Cinta Rodríguez, que denuncia que coa Lei Orgánica para a Mellora da Calidade Educativa (Lomce) os alumnos poden rematar a escolarización obrigatoria sen estudar esta materia porque pasa a ser optativa, "algo que non acontece en practicamente ningún país da Organización para a Cooperación e o Desenvolvemento Económico (OCDE) ".
"A música é cultura, axuda á estimulación. Desenvolve a psicomotricidade, o pensamento lóxico, as competencias en idiomas, a sensibilidade artística, os valores e a autoestima, entre outros factores: os nenos deberían ter dereito a unha formación completa e a unha boa educación musical", subliña a docente, para quen non apoiar a clase de Música en Primaria significa "privar os nenos destes factores, xa que moitos só teñen a oportunidade de coñecer a educación musical a través da escola".
A campaña iniciada por esta docente creceu de forma sostida durante os últimos días. Non é a única iniciativa sobre este tema, pois existe outra petición similar, impulsada por unha cidadá de Basauri (Biscaia), que obtivo ata a data máis de 6.000 firmas dende o pasado 5 de marzo.
Dende Change.org sinalan que, en ambos os dous casos, o Ministerio de Educación recibe periodicamente un correo electrónico informando das novas firmas de apoio.

O idioma galego é unha lingua estranxeira?

Non é que o actual goberno da Xunta estea facendo campaña para que se exclúe a lingua galega no ensino a través do decreto de plurilingüismo é que, atendendo a como publicou a nova na web, trátaa literalmente como lingua estranxeira.
Infórmannos que se lle preguntou á Xunta e, curiosamente, non lle contestaron ás persoas que se interesou polo tema. A nova, tal como estaba, desapareceu polas dez da mañá.
A Confederación de Anpas Galegas, parafraseando os versos de Rosalía de Castro en Cantares Gallegos – obra coa que a nosa gran escritora nacional ergueu unha bandeira na defensa do noso idioma e que aínda está en vigor- reitera que nas cuestións do idioma, tamén no ensino, non quere ser estranxeira na súa Patria.

O exemplo do IES Ponteceso: manuais escolares gratuítos para todos

Falar de libros de texto escolares é falar dun produto ben complexo. Cuestionado dende hai tempo pola súa supremacía como ferramenta de traballo didáctico, parece ter os días contados nun futuro cada vez máis informatizado. Porén, mentres ese futuro non chega, a realidade de cada mes de setembro é que para un número crecente de familias, a compra dos libros do curso supón un esforzo que fai cambalear o principio de igualdade no acceso á educación. A diminución nas bolsas para a adquisición de material escolar e o aumento do IVE, non fan máis que agravar este problema.
A breve –pero intensa– experiencia do sistema de préstamo gratuíto de libros de texto, posto en marcha polo goberno bipartito, pode que teña que ser retomada polo goberno da Xunta antes do que ao partido no goberno, responsable da súa substitución por un sistema máis caro e inxusto, lle gustaría. Iso parece indicar o feito de que na LOMCE se recolla, por presión das ANPAS, a posta en marcha de sistemas de préstamo de libros como o que aquí derrogou o PP ao chegar ao poder.

No IES de Ponteceso poden gabarse de teren sido quen de manter a gratuidade dos libros de texto para todo o alumnado

Entre mentres, no IES de Ponteceso poden gabarse de teren sido quen de manter a gratuidade dos libros de texto para todo o alumnado da ESO, a pesar da desaparición  do programa impulsado polo bipartito. Cunha planificación sinxela, se ben laboriosa na súa xestión, poden presumir de teren contribuído a que a dureza da crise que golpea as familias non se vexa reflectida nas mochilas escolares.

Ningunha familia paga os libros de texto da ESO grazas a dúas medidas: a renovación gradual dos libros e a colectivización de todos os cheques escolares

En Ponteceso ningunha familia paga os libros de texto da ESO, grazas a dúas medidas combinadas de xeito equilibrado: unha renovación gradual dos libros por departamentos e a colectivización de todos os cheques escolares que reciben as familias como axuda para a merca de material escolar. Se ben estas axudas individuais non chegan para cubrir todos os gastos de practicamente ningunha familia con dereito a percibila, e mesmo cando  moitas familias non teñen axudas de ningún tipo, a colectivización dos cheques e a xestión eficiente permite manter unha gratuidade universal que a Xunta non é quen de garantir.

Pode ler o artigo completo no blog d'O patio das ideas

A Xunta quer prescindir do profesorado especializado na formación de galego para o Celga

A Xunta bota man de profesorado funcionario de Lingua e Literatura Galegas de Secundaria, ''sen garantir a capacitación axeitada para a formación lingüística da poboación en xeral, e pagándolle como horas extras''. Así o afirman desde a Coordinadora de Traballadores de Normalización da Lingua (CTNL).

A Secretaría Xeral de Política Lingüística está intentando prescindir do profesorado específico dos cursos de galego para persoas adultas, que denunciou a súa precaria situación laboral, e quere botar man de profesorado funcionario de Lingua e Literatura Galegas de Secundaria, sen garantir a capacitación axeitada para a formación lingüística da poboación en xeral, e pagándolle como horas extras. Esá e a denuncia que fan desde a CTNL, a Coordinadora de Traballadores de Normalización da Lingua.
A CTNL sinala que desde a Secretaría Xeral estase a chamar a profesores de Lingua e Literatura Galega de secundaria edas Escolas Oficiais de Idiomas para lles ofrecer a docencia dos cursos preparatorios para a acreditación do Celga, que computarían como horas extras. Para a Coordinadora esta decisión adóptase para non ter que recoñecer os dereitos laborais que o profesorado inscrito nas listaxes da propia Secretaría conseguiu a través dunha denuncia na Inspección de Traballo. De aí que, inciden, se estea actuando sen que haxa constancia por escrito.
A CTNL quere mostrar a súa desconformidade con esta decisión, “tanto pola problemática laboral que supón e que afecta a máis de cincocentas persoas que están inscritas nas listaxes de profesorado e que levan moitos anos impartindo estes cursos, como pola perda de calidade da formación que supón prescindir do profesorado especializado nesa formación concreta”.

Eira dá Xoana organiza ´Namora a túa árbore ´ con nenos de Agolada

O centro de educación ambiental Eira dá Xoana acolle esta mañá a actividade "Namora a túa árbore", tras ter que pospoñela en dúas ocasións. Os nenos do CEIP de Agolada chegarán a Ramil antes das 15.00 horas, para coñecer as diferentes especies arbóreas da zona. Ademais, mañá sábado está programado un cocido de Entroido, con produtos traídos de Lugo e unha rolda posterior de visitas a todos os veciños desta parroquia agoladense.

A CIG-Ensino denuncia que a Xunta deixa de ofrecer os cursos CELGA a docentes en paro e opta por profesorado en activo, como horas extras

A CIG-Ensino rexeita que a Consellaría pretenda que o profesorado dos centros imparta estes cursos como traballo extra.

A CIG-Ensino denuncia que a Xunta deixa de ofrecer os cursos CELGA ao profesorado en paro e opta por profesorado en activo. A CIG-Ensino rexeita que a Consellaría pretenda que o profesorado dos centros imparta estes cursos como traballo extra, deixando o profesorado desempregado sen esta posibilidade. Por iso, facemos un chamamento aos departamentos de Lingua e Literatura Galega para que, por solidariedade cos compañeiros e compañeiras en situación de desemprego, se neguen a impartilos.

Até agora, os cursos preparatorios das probas CELGA eran impartidos por profesorado “colaborador” procedente dunha listaxe, elaborada baixo uns criterios recollidos nun baremo estabelecido pola Secretaría Xeral de Política Lingüística e cuns requisitos entre os que figura o ser “demandante de emprego en situación laboral de desempregado”.

Este profesorado impartía estes cursos sen ningún contrato de traballo e sen ser dado de alta na seguridade social. Ante esta situación irregular, a CIG-Ensino interpuxo denuncia perante a inspección de traballo da Coruña que a resolveu, con data do 15 de novembro de 2013, recoñecendo a relación laboral entre a Consellaría de Educación e o profesorado “colaborador” dos cursos CELGA e dando de alta de oficio con efectos retroactivos nos períodos en que impartiran clases nos últimos catro anos. A propia inspección impón unha multa de máis de 200.000 euros á Consellaría pola actuación fraudulenta. A CIG-Ensino tamén interpuxo denuncia nas outras tres inspeccións de traballo. A Inspección de Ourense vén de resolver en termos semellantes á da Coruña. Fican por resolver a das inspeccións de Pontenvedra e Lugo que a CIG-Ensino espera sexa nos mesmos termos.

A CIG-Ensino, á vista da resolución da inspección de traballo e da actuación fraudulenta da Consellaría,  exixiulle á Secretaría Xeral de Política Lingüística que os próximos chamamentos se producisen obrigatoriamente mediante contrato laboral. Agora,  Consellaría, no canto de continuar ofrecendo os cursos preparatorios CELGA  ao profesorado en paro, opta por que sexa o profesorado en activo dalgúns centros de secundaria o que os imparta como horas extraordinarias, para así evitar a contratación do profesorado “colaborador” dos cursos preparatorios CELGA.

“Non deben servirnos de escusa as reducións salariais que sufrimos, nin os recortes e a eliminación de dereitos laborais para aceptar estas medidas porque supoñen destrución de emprego”; explica Anxo Louzao, secretario nacional da CIG-Ensino. A CIG-Ensino pelexará e loitará para restituír os nosos salarios e mellorar as nosas condicións laborais, mais non a conta de horas extras procedentes dun traballo que era desempeñado por profesorado en situación de desemprego.

 

"O .gal será fundamental para calquera produto no que a identificación con Galicia supoña un plus de calidade"

Aínda sen unha data concreta, pero cada día máis preto. Na Asociación Puntogal estase á espera de recibir a comunicación oficial por parte da ICANN da delegación do dominio, despois de que o pasado 11 de novembro a corporación que goberna as direccións da Internet asinase o contrato de creación do dominio .gal.
A delegación do dominio refírese ao proceso polo cal o identificador entra en funcionamento na raíz do DNS, o sistema que permite o funcionamento das direccións da Internet. En xaneiro informouse xa de que o .gal superara as probas técnicas da ICANN, o Pre Delegation Test, nas que Puntogal demostrou, entre outros aspectos, que o seus sistemas funcionan con IPv4 e IPv6,  tanto vía TCP como a través dunha interface web, e que traballan co novo estándar Root Key Signing Key, coñecido como DNSSEC.
No momento en que se reciba a tan esperada comunicación, a Asociación Puntogal poderá aceptar xa pedimentos para o rexistro e posta en marcha dos dominios .gal. Nese momento publicaranse na páxina web da asociación un conxunto de documentos nos que se establecerán as normas que rexerán cada unha destas fases, seguindo a normativa estándar da ICANN. "Estamos empeñados en que o proceso sexa o máis simple, o máis público e o máis transparente posible", destacou este mércores Manuel González, presidente da Asociación, nunha intervención no Consello da Cultura Galega, na que fixo un repaso do proceso de case oito anos que levou a acadar este obxectivo, dos poucos pasos que aínda faltan por percorrer, e da importancia (simbólica e económica) que o .gal terá para distintos sectores.

Nunha primeira fase poderán solicitar o rexistro dos seus dominios entidades públicas, marcas rexistradas, empresas que figuran nunha base de datos que posúe a propia ICANN e axentes que traballen a prol da lingua e da cultura galega

Nunha primeira fase, explicou Manuel González, poderán solicitar o rexistro dos seus dominios "determinados colectivos e entidades", comezando polas entidades públicas, as marcas rexistradas, as empresas que figuran nunha base de datos que posúe a propia ICANN e os axentes que traballen a prol da lingua e da cultura galega, "porque así vai na nosa proposta de candidatura". Para esta fase a ICANN prevé un mínimo de 30 días, "pero no noso caso" -explicou González- "probablemente será algo máis longo, uns 45 días". Pode que previamente se realice, igualmente, unha fase de prelanzamento, na que se poderá activar un grupo reducido de dominios pioneiros (un máximo de 100 fixado pola ICANN), que sirvan de modelo, antes de comezar co lanzamento en si mesmo.
Unha vez superado este período de arranque, comezará a fase de dominio aberto, sen límite de tempo, na que (se non hai conflito pola propiedade dunha marca), o que primeiro o rexistre o dominio quedará con el. Os responsables da Asociación Puntogal barallan a cifra de 8 mil dominios como un horizonte probable, que se acadaría en poucos anos. En Galicia hai máis de 50 mil dominios rexistrados, cunha taxa de novas altas que se achega aos 10 mil novos dominios .es anuais.

Beneficios para todos

“Calquera pode darse conta dos beneficios que vai ter para a nosa comunidade o contar cun dominio puntogal”, destacou Manuel González na súa intervención, que comezou salientando a importancia para "a normalización lingüística" e para "a nosa autoestima". Segundo o presidente da Asociación, "na sociedade do século XXI unha lingua que non teña visibilidade na rede é unha anormalidade democrática. É o caso do galego, que conta cun peso relativamente importante en canto aos contidos, pero que non ten a necesaria visibilidade. Ímonos sentir máis respectados e normalizados".

"Un dominio que nos identifique será un factor de cohesión, que incrementará o sentimento de pertenza a unha comunidade, con independencia do espazo xeográfico no que nos atopemos"

Porén, González foi moito máis aló da lingua e da cultura á hora de enumerar as posibilidades que o feito de contarmos cun dominio propio terá para Galicia. "Un dominio que nos identifique será un factor de cohesión, que incrementará o sentimento de pertenza a unha comunidade, con independencia do espazo xeográfico no que nos atopemos" -dixo- "Os nosos emigrantes, os nosos empresarios no mundo poderán exhibir en internet un carné de identidade que os identifica como galegos".
Ademais, engadiu, "vai facilitar o labor dos buscadores de contidos á hora de realizar procuras en galego ou sobre Galicia". De igual xeito, "vainos permitir tamén participar no dominio de Internet" e suporá un "estímulo do uso do galego na rede, tanto na creación de contidos, novo software en galego, e tradución ao galego de aplicacións de todo tipo".

O .gal será "fundamental dende o punto de vista empresarial, para os produtores, cultivadores ou comercializadores de produtos nos que a identificación con Galicia supoña un plus de calidade"

Dende unha perspectiva de beneficio económico directo, González lembrou que mentres na actualidade "unha parte importante da recadación polo rexistro de dominios vai para fóra de Galicia", co .gal, "todos os beneficios que xeren irán dedicados a fomentar a presenza do galego na rede e nas novas tecnoloxías". Pero, ademais, o .gal será "fundamental dende o punto de vista empresarial, para os produtores, cultivadores ou comercializadores de produtos nos que a identificación con Galicia supoña un plus de calidade". Puntogal, engadiu, "visibilizará todo valor engadido que se relacione con Galicia: turismo, natureza, o Camiño de Santiago....". Manuel González concluíu que o .gal será unha "propaganda gratuíta para Galicia e o galego", pois "cada vez que unha persoa en calquera lugar do mundo entre nunha páxina .gal estará recibindo a información de que existe un país chamado Galicia e unha lingua que é o galego".

8 anos de traballo

• 16 de setembro de 2005: A ICAAN aproba o dominio .cat. Era a primeira vez que unha comunidade cultural e lingüística acadaba esta posibilidade para rexistrar as súas páxinas web.
• 10 de xuño de 2006: As entidades fundadoras da Asociación Puntogal poñen en marcha a candidatura.
• 7 de febreiro de 2007: A Xunta comunica o seu apoio oficial á candidatura.
• 3 de febreiro de 2009: Puntogal supera as 10.000 sinaturas de apoio.
• 29 de maio de 2012: Preséntase oficialmente a candidatura galega para contar cun dominio de primeiro nivel.
• 15 de xuño de 2013: O ICANN informa de que o dominio .gal superou positivamente o proceso de avaliación.
• 11 de novembro de 2013: O ICANN asina o contrato de creación do dominio .gal.

Wert reitera o seu compromiso de dimitir se o TC declara inconstitucional a LOMCE

Pide unha actitude "máis construtiva"

O ministro de Educación, Cultura e Deporte, José Ignacio Wert, reiterou o seu compromiso de dimitir "inmediatamente" se o Tribual Constitucional declara inconstitucional algún aspecto da Lei Orgánica para a Mellora da Calidade Educativa (LOMCE), aínda que dse mostrou que está "tranquilo" e "convencido" de que a normativa se axusta á legalidade.

Así o indicou o titular de Educación aos medios, nos corredores do Congreso dos Deputados, tras ser preguntado polos cinco recursos presentados ante o alto tribunal a semana pasada polo PSOE e catro comunidades autónomas: Cataluña, Andalucía, Asturias e Canarias.
Aínda que o ministro recoñece que non leu todos estes recursos, e que se trata de "un dereito dos que teñen a lexitimación" para facelo, tamén pediu unha "actitude máis construtiva e colaboradora" para mellorar a educación de España.
Wert mostrouse "tranquilo" e "convencido" de que a normativa non ten causa de insconstitucionalidad e que o Consello de Estado non fixo ningunha observación, "nin sequera accidental", sobre unha posible invasión de competencias, nunha materia, que, segundo recoñeceu, "é delicada".

Wert resolve o burato que deixou a súa reforma para os alumnos de FP Básica

• Educación deseñará un "exame especial" para que os estudantes non perdan un ano sen poder titularse na ESO
• A 'lei Wert' deixa un ano no limbo aos alumnos da nova FP básica

O ministro de Educación, José Ignacio Wert, viuse obrigado a rectificar o desenvolvemento da súa reforma da Formación Profesional Básica, que por un burato do calendario de aplicación deixaba colgados un ano sen titularse en ESO á primeira promoción de alumnos destas novas ensinanzas, que empezan este mes de setembro. O titular de Educación anunciou este mércores no Congreso, despois de que O PAÍS publicase o fallo do calendario, que aprobará unha disposición para que estes alumnos poidan graduarse en secundaria. Fontes do seu departamento precisaron que poderán facelo cun "exame especial".
A FP Básica, dirixida aos estudantes con máis dificultades para rematar a educación obrigatoria, permite obter o título de graduado en ESO só se se aproba a nova reválida de secundaria que crea a Lei Orgánica de Mellora da Calidade Educativa (LOMCE). Pero esta non empeza a aplicarse ata o curso 2017-2018, polo que os primeiros estudantes da FP Básica que rematen en prazo rematarán de estudar en 2016 (a FP Básica dura dous anos), e terían que esperar como mínimo un ano ata poder facer a reválida e obter o graduado escolar. O ministerio asegurou primeiro que o que poderían facer estes alumnos era presentarse ao exame de ESO para adultos, pero tampouco solucionaba o problema, porque este require ter 18 anos (ou 16 cun contrato de traballo) e os alumnos de FP Básica poden empezar con 15 anos e rematar con 17.
Wert resolve agora o desfase na aplicación da LOMCE cun exame de carácter temporal, do que o Ministerio non deu detalles, ata que se apliquen as reválidas. "Pódese solucionar perfectamente mediante unha norma de dereito transitorio", asegurou o ministro na sesión de control ao Goberno en resposta a unha pregunta da deputada de Esquerda Plural Caridade García, que cualificou de "chapuza" a lei e criticou "as présas" do Goberno en aplicala. O Ministerio, apurado polos prazos, non publicou aínda todos os decretos de desenvolvemento da LOMCE, e o previsible é que inclúa o parche ao burato nun deles, como no decreto que regulará as reválidas.

O ministro rexeitou o "suposto limbo" no que se poden encontrar os estudantes, porque "o lóxico", dixo, é que a maioría dos matriculados en FP Básica continúen a súa formación na FP de Grao Medio, á que poden acceder directamente, sen o graduado niso. Pero, ao mesmo tempo, Wert recoñeceu que pode haber unha proporción de estudantes que queiran obter o título de secundaria, unha opción que lles permite a LOMCE. O primeiro borrador de decreto da FP Básica non incluía esta opción, que foi engadida despois, seguramente para evitar que o sistema cree o que os expertos chaman "vías mortas". É dicir, para que non se impida a un alumno que con 15 anos se deriva a estes estudos porque non vai ben, que poida retomar se quere a vía do bacharelato ao rematar.
Os datos dos análogos Programas de Cualificación Profesional Inicial (PCPIS), aos que vai substituír a FP Básica, revelan que, aínda que non son a maioría, si hai alumnos destes estudos que logran graduarse en secundaria. Dos 84.217 que cursaron un PCPI no curso 2011-2012, un total de 11.178 conseguiron o título diso.
Wert admitiu hoxe que o Ministerio traballa a un ritmo moi rápido para elaborar os decretos de desenvolvemento da LOMCE. O sector educativo e as comunidades autónomas véñenlle reclamando un atraso na aplicación da lei, cuxa implantación progresiva empeza este ano para primeiro, terceiro e quinto de Primaria e para a FP Básica.
O ministro reiterou, por outro lado, o seu compromiso de dimitir "inmediatamente" se o Tribunal Constitucional declara inconstitucional a LOMCE. Cinco comunidades e o PSOE recorreron a reforma educativa ante o alto tribunal.

Galicia comeza a aproveitar a "vantaxe histórica" da lusofonía

Tras máis de tres décadas de autonomía, o lexislativo galego decide ollar cara á lusofonía e identificarse -parcialmente- con ela. Fixeron falta máis de trinta anos e unha iniciativa lexislativa popular presentada baixo o nome de Valentín Paz Andrade para que a unanimidade do Parlamento de Galicia avale o que xa é rutina en autonomías sen máis ligazón histórica co mundo lusófono que a proximidade xeográfica a Portugal. De agora en diante o Goberno galego ten, aínda que cuns prazos notablemente laxos, a obriga legal de aproveitar a "vantaxe histórica" de compartir lingua e vencellos históricos cunha comunidade de máis de 250 millóns de persoas".
"Este é o día en que Galiza en rompemos unha fenda histórica ou volvemos unir o que a historia separou", sinalaba en maio de 2013 Xosé Carlos Morell ao iniciar a tramitación en pleno dunha ILP que, non obstante, foi matizada no trámite parlamentario, especialmente no que atinxe aos compromisos temporais. Así, por exemplo, a Xunta terá que incorporar "progresivamente a aprendizaxe da lingua portuguesa no ámbito das competencias en linguas estranxeiras nos centros de ensino", mentres que a comisión promotora propuña completar o proceso en catro anos.

A ILP propuña implantar o portugués no ensino en catro anos, pero farase "progresivamente" e sen prazo concreto

Sexa como for, o certo é que o conxunto dos poderes públicos do país teñen agora o compromiso de "promover o coñecemento da lingua portuguesa e da cultura lusófona para afondar nos vencellos históricos que unen Galicia cos países e comunidades de lingua portuguesa", e tamén para tirar partido do "carácter estratéxico que para Galicia teñen as relacións económicas e sociais" co norte de Portugal. Ao tempo, "deberán ser promovidas as relacións a todos os niveis cos países de lingua oficial portuguesa" e "fomentarase o coñecemento desta lingua por parte dos empregados públicos", aínda que este non será, como se propuña, un mérito tido en conta nos procesos selectivos da administración.
"Favorecer e permitir a reciprocidade das emisións televisivas e radiofónicas" entre Galicia e Portugal e o intercambio de producións audiovisauis entre a CRTVG e canles lusófonas completan un paquete de medidas sobre as que o Goberno galego terá que ralizar un informe anual "no que se fará constar, de xeito pormenorizado, as accións levadas a cabo, o seu custo e as previsións que efectúa o exercicio seguinte"

"Que non sexa flor dun día"

Aínda que con certos receos polos matices introducidos a oposición en pleno saudou de bo grao a aprobación dunha iniciativa que agarda que non sexa "flor dun día", en verbas da nacionalista Ana Pontón. Para a deputada do BNG esta lei debera ser o primeiro chanzo para a "fin do isolacionismo" e para que, definitivamente, no país deixe de ser "un tabú ou unha herexía afirmar algo que científica e historicamente está acreditado", que galego e portugués "son variantes da mesma lingua". Na actualidade, lembra, apenas unha vintena de centros educativos galegos ofrecen a posibilidade de estudar portugués como lingua estranxeira, polo que cómpren "medios e recursos" para que a ILP sexa unha realidade.

A iniciativa saíu adiante por unanimidade e a oposición insta o Goberno a non relaxar o seu cumprimento

"No fondo do imaxinario social están ancorados estereotipios e prexuízos sobre Portugal", abonda Xabier Ron, de AGE, para quen a Xunta debe traballar arreo para que o pobo galego se sinta "a gusto na casa común" da lusofonía, di, parafraseando a José Saramago. Esa ligazón debe ir "alén do economicismo", subliña, e partir dun "enfoque convivencial, unha concepción que se fundamente en cultura e afectivivdade". Na mesma liña o socialista Francisco Caamaño apela a "garantir a execución" da nova lei, que lle marca "obrigas claras" ao Goberno para convertir en oficiais "pontes de entendemento que sempre existiron", garantindo o "fundamental" coñecemento do portugués sen "entorpecer nin colisionar" na "batalla" pola normalización lingüística en Galicia.
Nunha actitude pouco habitual o PP tamén optou polo ton conciliador nesta "iniciativa de consenso", considerando a través de Agustín Baamonde que o portugués "evidentemente é unha vantaxe para o galego, porque nos coloca nunha senda de universalidade". "Esperamos que non cheguemos tarde a ningún sitio", di o popular. Tarde ou cedo, as obrigas fican basicamente claras.

Axudas para os proxectos de innovación en dinamización lingüística dos centros educativos

A Xunta de Galicia vén de facer pública, a través do Portal Educativo e da web da Secretaría Xeral de Política Lingüística, a convocatoria pola que se establecen as bases para a realización de proxectos de innovación en dinamización lingüística en centros docentes da titularidade da Consellería de Cultura, Educación e Ordenación Universitaria para o curso 2013-14.
O obxectivo desta disposición é apoiar os cinco mellores proxectos de centro, ou de ata tres centros agrupados, que redunden no uso do galego oral, no achegamento a esta lingua do alumnado procedente do estranxeiro e das súas familias, na colaboración con entidades externas ao centro educativo para promover o idioma propio de Galicia ou na relación da lingua galega coas tecnoloxías da información e da comunicación. Trátase, en definitiva, de recoñecer, apoiar e difundir a innovación educativa en materia de promoción da lingua galega para estendela e facela máis eficaz.
O prazo para presentar os proxectos está aberto desde hoxe mesmo e ata o día 6 de abril.
Recoñecemento e axuda
Os cinco proxectos seleccionados como excelentes recibirán unha dotación económica de 2.000 euros cada un, apoio e asesoramento para a posta en marcha do proxecto e a difusión deste, así como das experiencias e materiais producidos a raíz da súa implementación, no espazo habilitado na web da Secretaría Xeral de Política Lingüística para os equipos de dinamización da lingua galega.
Ademais, o profesorado implicado no desenvolvemento do proxecto seleccionado verá recoñecido o seu compromiso cunha certificación de participante nunha actividade de innovación educativa en que se fará constar a equivalencia con 30 horas de formación permanente do profesorado.
Tamén se establecen dúas mencións de honra, sen dotación económica, pero co resto dos apoios e recoñecementos.
Máis información no web da SXPL.