Ningún neno pasa fame en Ferrol?

"Aquí hai certa demagoxia. Estase falando de fame e malnutrición. E creo que en Ferrol ningún neno pasa fame. Se de algo estamos contentos, é de que en Ferrol se está creando unha verdadeira rede de servizos sociais". A concelleira de Benestar Social da cidade departamental, Rosa Martínez Beceiro, realizou esta polémica declaración nunha entrevista publicada este luns por La Voz de Galicia. Pasou pouco tempo até que as súas palabras fosen respondidas.

“Un cargo político de primeira orde non ten que crear ou pensar, senón afirmar"

O Colexio Oficial de Traballo Social de Galicia (COTSG) vén de sinalar, a través da súa presidenta, Marta Capeáns, que lle parece, “cando menos irresponsable” este tipo de afirmacións xa que, “un cargo político de primeira orde non ten que crear ou pensar, senón afirmar, xa que ten na súa man datos estatísticos e capacidade como para saber se no seu concello existen este tipo de situacións”. O COTSG entende que estas declaracións, “ademais de reprobables, deberían ser motivo de dimisión da concelleira”.

“Afirmar que ningún neno pasa fame é non só ser atrevida, senón distorsionar a realidade”

A entidade que agrupa e representa os e as traballadoras sociais galegas, con máis de tres mil profesionais colexiadas, afirma que Martínez Beceiro "amosa un gran descoñecemento da situación de Ferrol", onde varios estudos estatísticos de organismos oficiais como o IGE afirman que Ferrol é a cidade galega con maior taxa de risco de pobreza, co ingreso medio mensual por fogar máis baixo, coa maior taxa de paro e os maiores recortes en prestacións. Neste sentido, “afirmar que ningún neno pasa fame é non só ser atrevida, senón distorsionar a realidade”, sinalan, ao mesmo tempo que "cualificar de facer demagoxia a quen afirmamos que esta situación é moi preocupante, amosa que esta concelleira non está en contacto cos traballadores e coas traballadoras sociais, que día si e día tamén alertan do crecemento de nenos con deficiencias nutricionais, tamén e moi especialmente na súa cidade”.
Ferrol é, con moita diferenza, a cidade galega máis golpeada pola crise. A crise económica, xunto coa ausencia de novas iniciativas empresariais ou dun tecido renovado que revertese esta situación, xunto cos enésimos e pode que definitivos golpes aos sector naval, acabaron por configurar unha cidade na que, segundo a EPA, só teñen traballo o 30 por cento dos seus habitantes, cunha taxa de paro equivalente, e unha ampla proporción de inactivos.
Na entrevista, a concelleira tamén xustifica que o Concello delegue en entidades privadas como Cáritas as súas responsabilidades no ámbito dos servizos sociais, o que tamén provocou as críticas de Marta Capeáns: "Facer descansar a responsabilidade do combate da pobreza en asociacións do terceiro sector é eludir claramente responsabilidades e obviar que quen ten que implementar políticas, desenvolver proxectos e dispoñer de fondos para o combate da pobreza son as administracións públicas".

"Facer descansar a responsabilidade do combate da pobreza en asociacións do terceiro sector é eludir claramente responsabilidades e obviar que quen ten que implementar políticas son as administracións públicas"

O COTSG conclúe que “a fame e a pobreza infantil non deixan de ser a translación da pobreza das familias”, provocada “por malas decisións políticas e unha mala política económica e social, tamén en Galicia”,  e que para combatela precísase "algo máis que boas palabras, precísanse políticas transversais, cartos, axudas directas e rápidas ás familias con máis dificultades e a blindaxe dos servizos sociais básicos”.

A presidenta do COTSGA, Marta Capeáns, afirma estar "fondamente preocupada polo número de cargos públicos, sobre todo do Partido Popular, que están negando sistematicamente que existen este tipo de situacións”

Non é a primeira vez que cargos públicos do PPdeG negan a existencia de fenómenos de pobreza. Moi significativa foi neste senso a intervención no Parlamento do presidente da Xunta, Alberto Núñez Feijoo. O pasado 29 de marzo, despois de que a viceportavoz de AGE, Yolanda Díaz, lembrase que -segundo datos de Cáritas- en Galicia hai 650.000 persoas en situación de exclusión social, 120.000 delas en pobreza severa, e con máis do 20% dos nenos e nenas "en situación de pobreza", Núñez Feijoo limitouse a negar esta realidade. Ademais, acusou a AGE de "mentir" e sinalou que o Goberno galego "non dispón de habilitación legal nin de medios especializados que permitan iniciar unha campaña de detección de menores en risco de desnutrición".
De igual xeito, en maio do pasado ano a conselleira de Traballo e Benestar, Beatriz Mato, afirmou que "ningún galego nin galega está a pasar fame na nosa comunidade", e acusou o deputado Juan Fajardo de "catastrofista" e "demagogo". Este luns, a presidenta do COTSGA, Marta Capeáns, afirmou estar "fondamente preocupada polo número de cargos públicos, sobre todo do Partido Popular, que están negando sistematicamente que existen este tipo de situacións”.

Canarias ve "humillante" o convenio para o financiamento da LOMCE porque é "cambiar ideas por diñeiro"

O vicepresidente e conselleiro de Educación, Universidades e Sostibilidade do Goberno de Canarias, José Miguel Pérez, riscou de "humillante" o convenio remitido esta semana o Ministerio de Educación ás comunidades autónomas para acceder ao financiamento da Lei Orgánica para a Mellora da Calidade Educativa (LOMCE).

Preténdese no seu texto que as comunidades avalen os principios da LOMCE, asinando un documento en cuxas motivacións se analizan toda clase de eloxios aos postulados da nova lei que só apoia o PP, explicou.
Ademais, tal e como adiantou José Miguel Pérez o pasado mes de xuño na última conferencia sectorial co ministro Wert, o documento ratifica que os fondos chegarán ás comunidades autónomas en forma de préstamos e que computarán como endebedamento autonómico, prexudicando os esforzos realizados por rexións como Canarias, para cumprir co déficit público máximo.
"Intentan facernos cambiar ideas por diñeiro. Intentan humillar ás Comunidades Autónomas que pensamos de xeito diferente e que non estamos de acordo coa Lei", afirmou o vicepresidente e conselleiro, para explicar que o convenio admite expresamente que o Ministerio adiantará ás comunidades, en forma de préstamo sen intereses, o diñeiro do Fondo Social Europeo para financiar a nova lei, que se implantará a partir de setembro, e que as autonomías deberán contabilizar esta partida no pasivo financeiro do seu presuposto.
"Ao contrario do que defendeu o pasado mes o ministro Wert, estes fondos contarán como débeda para nós", sinalou. Pérez criticou o convenio obrígalles a avalar as liñas xerais dunha lei coa que Canarias e outras comunidades non están de acordo e, neste sentido, fixo referencia a épocas pasadas da historia española.
"A min recórdame todo isto a cando en tempos de Franco, os profesores, para poder obter a súa praza tiñan que xurar obrigatoriamente os Principios Fundamentais do Movemento", aseverou.

Educación suprime a axuda para material e cadernos do cheque escolar

Educación apertará un pouco máis ás familias con menos recursos o próximo curso académico. A consellería que preside Jesús Vázquez recortou tamén a axuda destinada á compra de libros que ata agora incluía o material escolar e os cadernos de exercicios obrigatorios. No novo curso, as familias con dereito ao cheque -por importe de 90 ou 170 euros, en función da renda- terán que facer fronte cos seus propios recursos (salvo en Infantil, onde se mantén a gratuidade dos cadernos) a estes dous últimos gastos e a Confederación de Anpas de Galicia (Confapa) xa comezou a alertar aos profesores de que se encontrarán nas aulas con "un elevado número" de alumnos sen o material necesario.
"Detectamos que hai moitas familias en situación crítica que non poden custear o comedor e son as mesmas que agora tampouco poderán pagar o material escolar", explica a presidenta da Confapa, Helena Gómez, o panorama que se aveciña nos colexios a partir do outono. Sostén que, da mesma forma que fixeron cos alimentos tras a entrada en vigor do copagamento o curso pasado, algunhas Anpas comezaron tamén agora a facer abasto de libretas e outros medios "para que estes nenos poidan comezar as clases nas mesmas condicións que os demais", pero se pregunta se será suficiente esta achega cidadá solidaria.
A nova orde coa que Educación regula, recortándoas, as axudas para os libros supón ademais a creación pola consellería dun banco paralelo ao das Anpas en cada centro (a Xunta obriga os beneficiarios -salvo aos de primeiro e segundo de Primaria e Educación Especial- a entregar os libros en bo estado ao finalizar o curso). Ao banco das Anpas acudían ata agora os pais para surtirse dos textos que non puideran comprar co cheque, que queda lonxe de cubrir o importe total. Optaban maioritariamente por destinar o diñeiro da axuda ao material e á compra dos cadernos de exercicios -as fichas- que non poden pasar dun alumno a outro e que ata este curso estaban subvencionados. Despois recorrían ao depósito da asociación para completar a lista.
A Confapa cre que esta duplicidade de bancos de libros non fará senón estigmatizar os alumnos con menos recursos. A partir de agora, os que reciben o cheque deberán ir ao depósito da consellería mentres que o resto dos seus compañeiros acudirá ao do Anpa. "Tanto denunciar a visibilidade da pobreza dos comedores escolares en verán e resulta que con esta decisión a Xunta a evidencia innecesariamente", lamenta Gómez a decisión de Educación mentres apunta que o gabinete de Jesús Vázquez "antepón a subvención aos centros do Opus que segregan por sexo" fronte á axuda de material escolar ás familias con rendas escasas. Abonda con que reclame a eses centros que devolvan as cantidades que percibiron ilegalmente segundo os tribunais" para manter as axudas de material escolar, conclúe a presidenta da Confapa.
O recorte, publicado no DOG do pasado mes de maio, sorprende estes días as familias nas librarías. Encóntranse con que, tendo que pagar do seu peto os cadernos e o material, e collendo, como sempre os libros no banco, non poden consumir o cheque. Aconteceulle a Alicia, nai dun alumno de terceiro curso de Primaria. Ela xa pediu os libros do seu fillo ao banco do Anpa. Pero ante a previsión de que o cheque, que debe gastar integramente, quede nun caixón, está disposta a comprar igualmente os textos e entregalos no banco do colexio "para que polo menos poida beneficiarse alguén".
A Consellería de Educación sostén que o único recorte que aplica este curso é o do material escolar. Insiste en que a supresión das axudas para os cadernos "afecta só aos que se venden independentemente dos libros", pero a Federación de Libreiros confirmou este diario que este é o 100% dos casos. Os libreiros avalan non obstante o novo decreto de Educación. A súa presidenta, Piar Rodríguez, entende que eliminando os gastos de material se evita "o mal uso" dos cheques que facían "algunhas grandes superficies comerciais" onde os pais acababan facendo a compra completa de todo o material.

Nova lei, outros libros

C. H.

A tesoirada nas axudas para o material escolar coincide co cambio da lei de ensino (a substitución de GÁBEA pola LOMCE) que supón a publicación de novos textos, axeitados ao cambio curricular. Así, por exemplo, a materia de Coñecemento do Medio vixente ata agora analizarase, nun retorno ao pasado, en dúas materias: Ciencias Naturais e Ciencias Sociais. Isto é, hai novos libros, polo menos nalgúns cursos, co que se suprime a posibilidade de que algunhas familias poidan abastecerse por completo nos bancos das Anpas e quedan obrigadas ao desembolso económico.
O responsable de CC OO Ensino en Ourense, Alex Portela, alerta de que nin sequera están aprobados os currículos, co que matiza que os libreiros están a arriscar "sen protestar" ao conseguir textos baseados nun borrador do Real Decreto. "As comunidades que non están gobernadas polo PP plantáronse; dixeron que non teñen tempo para desenvolver o currículo que esixe a LOMCE", sinala Portela. O sindicalista coincide coa Confapa en acusar de "despropósito" a supresión da gratuidade dos libros nun momento de crise como a actual "agravando a situación das familias máis vulnerables economicamente".

O día 22 daranse a coñecer as primeiras entidades que gozarán de páxinas web baixo o dominio .gal

O vindeiro martes ás 12:00 horas o Museo do Pobo Galego acollerá o acto de presentación do Programa Pioneiros .gal a través do que, a partires do vindeiro 25 de xullo, entrará en funcionamento a primeira serie de páxinas web baixo o dominio .gal dentro dun proceso de pre-lanzamento no que deuse a oportunidade a unhas noventa institucións públicas, empresas e entidades sen ánimo de lucro de amosar o seu apoio pola lingua e a cultura galegas gozando de xeito anticipado dun dominio de Internet baixo o sufixo .gal, que non estará dispoñible para outras páxinas web até primeiros de decembro.
O Programa Pioneiros .gal cumpre cunha dobre función: por unha banda as entidades que estrean dominio .gal poden conseguir unha meirande visibilidade grazas a pertencer a un grupo selecto, que destaca fronte ao resto de espazos na web; e por outra, temos que a sociedade comeza a tomar consciencia da existencia do dominio .gal grazas ao seu uso por parte de entidades representativas da nosa comunidade socio-lingüística.
As entidades que non tiveran a fortuna de acceder a este Programa, poderán iniciar os trámites para facerse cun dominio .gal a mediados do mes de setembro, cando botarán a andar as fases de Abrente e Carreira a través das que será posible conseguir de xeito preferente un dominio .gal, evitando a súa usurpación e podendo así facer uso do mesmo a primeiros do mes de decembro.

O xenio criador do Pobo galego. Lingua, cultura e literatura.

Desde a súa institución o 28 de abril 1963 até o pasado 5 de xuño de 2014, a Real Academia Galega escolleu para ser homenaxeada no Día das letras Galegas unha ”figura autora dunha obra relevante en galego e persoa de calidade cultural e humana que mereza propoñerse como exemplo á sociedade galega de hoxe”, tal e como se recolle na acta da sesión onde se decidiu estabelecer esta data tan relevante para a nosa lingua e cultura e que celebra a saída ao prelo da obra mestra da literatura galega contemporánea, Cantares Gallegos de Rosalía de Castro.
Ao longo destes 51 anos as persoas homenaxeadas nesta data caracterizáronse por seren autoras e autores cunha obra de calidade e un compromiso e achegas claros en defensa da nosa lingua e da nosa cultura fóra de toda dúbida, alén das súas posicións máis ou menos progresistas, máis ou menos conservadoras,máis ou menos relixiosas ou ateas.
Estes dous elementos: lingua e compromiso co país, fixeron do Día das Letras Galegas unha data de reinvindicación da nosa lingua e de festa para a nosa ampla literatura, capaz de unir todo o pobo galego nunha soa voz, sendo xunto co Día da Patria Galega o máis sinalado de Galiza.
As entidades asinantes, que traballamos día a día para a defensa, dignificación e normalización plena da nosa lingua e cultura en centros de ensino, vilas, cidades e todos os recunchos do país, queremos que o Día das Letras Galegas siga a ser a data para festexar a lingua que nos une e darlle á nosa literatura a difusión social que merece.
Queremos que siga a manter o carácter integrador e de unión que sempre tivo, e que debera ser reforzado nun momento de ataques á nosa lingua sen precedentes na etapa democrática como o que padecemos na actualidade.
Filgueira Valverde non pode unir ninguén. O seu papel destacado dentro da estrutura dun réxime como o franquista que perseguiu a lingua e cultura galega e as súas figuras máis relevantes, silenciándoas, exiliándoas ou facéndoas presas, fan del o contrario do que debe ser “exemplo á sociedade galega” e por iso só podemos considerar profundamente desafortunada a decisión tomada pola RAG
O xenio creador do pobo galego a través da súa lingua e a súa literatura, o seu exemplo cívico e de compromiso co país mesmo nas peores circunstancias, debe ser hoxe e sempre o homenaxeado o Día das Letras Galegas, e a el dedicaremos o 2015 como primeiro paso dunha camiñada conxunta e partillada con toda a cidadanía que pretendemos explorar a partir de setembro.

Comunicado conxunto das asociacións da cultura e lingua galegas

Aquí podes coñecer, difundir e asinar o comunicado conxunto das asociacións da cultura e lingua galegas.
Ligazón para sinaturas de colectivos
Ligazón para sinaturas individuais

Asina e difunde o comunicado conxunto das asociacións da cultura e lingua galegas.

Ligazón para sinaturas de colectivos

Ligazón para sinaturas individuais

As universidades critican que a Xunta ignore a súa axuda contra a caída do uso do galego no ensino

As tres universidades galegas veñen de difundir un comunicado conxunto no que, tras alertar da "escasísima presenza do galego como lingua vehicular" no ámbito urbano critican que a Xunta ignore a súa axuda contra a caída do uso do galego no ensino. Sinalan que o Goberno galego non respondeu a súa proposta de colaboración para avaliar cientificamente os resultados da aplicación do Decreto de Plurilingüismo.

Sinalan que o Goberno galego non respondeu a súa proposta de colaboración para avaliar cientificamente os resultados da aplicación do Decreto de Plurilingüismo

No documento, os membros da Comisión Interuniversitaria de Política Lingüística (CIPL) lembran que o pasado ano lle propuxeron á Xunta de Galicia a constitución dunha comisión mixta de traballo para actualizar o Decreto 79/2010, para o plurilingüismo no ensino non universitario, como consecuencia da anulación xudicial de varios dos seus preceptos. As tres universidades consideraban "que os nosos equipos de investigación  poderían contribuir decisivamente, desde a independencia e alta cualificación técnica da que dispoñen, á avaliación seria, transparente e rigorosa dos resultados da aplicación do Decreto". Unha avaliación prevista na disposición adicional quinta do propio Decreto 79/2010 como paso previo á súa actualización. Porén, as tres universidades sinalan que "non recibimos resposta até o día de hoxe".
Subliñan que "as razóns que nos levaron en 2013 a ofrecer a nosa leal colaboración institucional á Xunta de Galicia para avaliar cientificamente o cumprimento da legalidade vixente son a día de hoxe ainda máis prementes, vistos os síntomas de aparente retroceso que experimentou o uso do galego no nivel máis decisivo (educación infantil e primaria) para unha correcta formación das novas xeracións de nenos e nenas na nosa lingua propia". E conclúen que "non poden existir motivos para que o goberno galego incumpra a obriga de avaliación que establece a propia legalidade vixente" e que "ningunha política pública pode construirse seriamente sen unha científica e transparente avaliación dos resultados derivados da súa aplicación". O documento, asinado polos responsables de normalización lingüística das Universidades da Coruña, Santiago e Vigo, péchase reiterando "a nosa oferta de colaboración institucional á Xunta de Galicia neste ámbito".

As comunidades estarán endebedadas ata tres anos por financiar a Lomce

O ministerio adiántalles fondos europeos que figuran como préstamos para as rexións.

O custo da reforma educativa contará como débeda nas contas das comunidades autónomas nun prazo que pode chegar a tres anos. Así se desprende do convenio de financiamento da implantación da Formación Profesional (FP) básica e dos novos itinerarios para 3º e 4º da ESO que o Ministerio de Educación remitiu esta semana ás comunidades autónomas.
O ministerio presentou as liñas básicas de financiamento a Lei Orgánica de Mellora da Calidade Educativa (LOMCE), ás comunidades o pasado 30 de xuño, último día lectivo. Os 964 millóns que Educación estima que se necesitan para a fase de implantación, entre 2014 e 2017, sairán do Estado (350 millóns) e do Fondo Social Europeo (614 millóns). Distintos conselleiros comentaron ter coñecido anticipadamente por informacións do Ministerio de Facenda, pero non de Educación, que o diñeiro procedente de Europa computará primeiro e temporalmente como débeda das comunidades autónomas.
"Non xera débeda [a longo prazo] aínda que a xere de forma inmediata", sinalou de forma críptica o ministro de Educación, José Ignacio Wert, ao termo do encontro cos conselleiros autonómicos de finais de xuño.
O Estado adiantará a partida europea ás comunidades autónomas. Dende a recepción dese diñeiro ata que o xustifiquen, a cantidade computará como débeda nas súas contas, tal como explicaron entón dende o ministerio. O que aclara agora o convenio é canto tempo pode durar esa débeda.
A amortización do "anticipo", segundo o texto, poderase facer "dentro dos tres anos seguintes a aquel en que recibiu o libramento do ministerio". É dicir, que ese aspecto que provocou a protesta en tromba de comunidades gobernadas por partidos distintos ao PP, que temían que puidese afectar ás medidas postas en marcha para combater o déficit das Administracións, computará ata tres anos nas súas contas.
Preguntado por este aspecto, un voceiro do Ministerio de Educación rexeita facer comentarios e remite a comparecencia do ministro Wert tras a conferencia sectorial e outra posterior no Congreso. "Se o ministro considerase necesario facer algunha puntualización máis, faríaa máis adiante", indicou por escrito ese voceiro.

Convenio "eloxioso" coa reforma

O convenio comeza dicindo que os asinantes (o ministro José Ignacio Wert e cada comunidade autónoma), "expoñen" que a Lomce "pretende facer fronte aos principais problemas detectados no sistema educativo español sobre os fundamentos proporcionados polos resultados obxectivos reflectidos nas avaliacións periódicas dos organismos europeos e internacionais".
Os conselleiros de Educación de Andalucía (PSOE) e Canarias (PSOE-CC) criticaron ese ton "eloxioso". O conselleiro de Educación de Canarias, José Miguel Pérez, cualificou de "humillante" o documento porque, ao seu xuízo, pretende que as comunidades avalen os principios da Lomce ao asinar un documento en cuxas motivacións se analizan "toda clase de eloxiosa os postulados da nova lei que só apoia o PP".
O seu homólogo andaluz, Luciano Alonso, considérao unha "provocación" porque cre que formula o "intercambio de ideas por diñeiro". Alonso enviou unha carta a Wert na que lle pide a revisión ou modificación en profundidade do convenio porque tamén está en contra de que se elixise a fórmula de financiamento mediante convenios coas comunidades e o Fondo Social Europeo, algo "sen precedentes en educación".

A Consellaría de Educación mente nos datos que fai públicos sobre o noso idioma para seguir reducindo o uso da nosa lingua nas aulas

A CIG-Ensino exixe, unha vez máis, a derrogación do Decreto de Plurilinguismo e a aplicación do Plan Xeral de Normalización Lingüística.

A CIG-Ensino vén de denunciar que a Consellaría de Educación mantén a campaña de persecución contra o noso idioma dando uns datos de uso nas aulas que non confirma documentalmente e que contradín todos os estudos existentes, así como as análises realizadas por diversas entidades. Por iso exixe, unha vez máis, a derrogación do Decreto de Plurilinguismo e a aplicación do Plan Xeral de Normalización Lingüística única maneira de avanzar na normalización lingüística e no uso da nosa lingua no ensino.

Para a CIG-Ensino resulta rechamante comprobar como a Consellaría pretende, ademais, facer pasar por bos os datos que ela mesma inventa e que poñen de manifesto efectivamente que o seu Decreto non se cumpre. Un Decreto que, denuncia, “só lle garante á nosa lingua un terzo do horario escolar, extremo este que no seu día foi rexeitado por todo o ámbito educativo e valorado negativamente polo Consello Consultivo” e que naceu para “impedir o ensino en galego e malia iso, os seus mínimos nin sequera se cumpren”. Por iso entende a CIG-Ensino que o Conselleiro “utiliza uns datos dos que se descoñece a súa fiabilidade para xustificar a súa política antigalega”.

Asegura que calquera persoa sen prexuízos que observe a situación do noso idioma “é quen de comprobar que está en franco retroceso, realidade que vén quedando patente nos diferentes estudos sobre a situación do noso idioma, como o da Mesa pola Normalización Lingüística ou outros de diversas entidades que chegan á conclusión de que este Decreto favorece a hexemonía do español e a invisibilidade da nosa lingua”.
Neste sentido, o secretario nacional da CIG-Ensino, Anxo Louzao asegura que "a Consellaría enmascara a situación para continuar afondando na súa política de fobia á nosa lingua" e engade que porén, "non dan disimulado que o galego é marxinal na Educación Infantil no ámbito urbano, precisamente onde está a maioría da poboación e onde precisamos máis que o noso idioma siga vivo como garantía de supervivencia."
De feito a propia Consellaría nestes datos dados no Parlamento “alardea” de que no ámbito urbano, é dicir nas entidades de poboación de máis de 50.000 habitantes, que en Galiza son as sete cidades, nas que se concentra o 50% da poboación galega, a nosa lingua en Educación Infantil está presente nun 10% dos centros. Mais o que non di a Consellaría neses datos que a CIG-Ensino asegura que “inventa” é cal é a situación dos concellos que oscilan entre os 50.000 e os 5.000 habitantes, practicamente a outra metade da poboación. “Para eses numerosos concellos non se inventan datos”, sinala Louzao.
O secretario nacional da CIG-Ensino explica tamén que "a Consellaría non dá datos da FP, precisamente unha das etapas de máis ostensíbel incumprimento, onde mesmo calquera persoa pode comprobar como todos os recursos están en español, impedindo así dar cumprimento ao pouco que se recolle no Decreto de Plurilingüismo".

A Xunta mantén que o galego é maioritario en Primaria e Bacharelato

A Xunta atribúese converter o galego en maioritario nas aulas do país. É a conclusión que cabe tirar das afirmacións lanzadas este martes no Parlamento polo Conselleiro de Educación, Jesús Vázquez. Tras a controversia xerada o pasado xuño polo estudo d'A Mesa pola Normalización Lingüística que amosaba a lingua propia do país relegada a un 2% do ensino infantil das cidades e a reacción de, entre outras, a Real Academia Galega instando o Goberno a revelar os datos de uso do idioma no ensino o BNG interpelou a Vázquez para instalo a revelar a información que o denominado decreto do plurilingüismo obriga a recompilar. E o conselleiro asegurou que o galego é maioritario en Primaria e Bacharelato e está próximo a selo na ESO.
Ademais de contrastar coa percepción xeral de equipos de normalización lingüística, de grupos de defensa da lingua ou da propia oposición dar por boa esta afirmación implica que o gabinete de Alberto Núñez Feijóo vén dicir que foi quen de darlle a volta á situación do galego no ensino en apenas media década. Como informou Praza Pública a Secretaría Xeral de Política Lingüística admitiu en 2012 que, no retorno do PP ao poder no ano 2009, a propia Consellería detectou que a situación do galego era "moi desfavorable" no conxunto do sistema educativo. Así, tras anos axitando a teoría da imposición admitía daquela que o seu mandato "partiu dunha situación de uso minoritario do galego polo alumnado na xeralidade dos centros", que no caso das cidades "podería dicir" que é "escaso".

Educación admitiu que a situación do galego era "moi desfavorable" en 2009 e agora ofrece cifras que indican que é maioritario

Pero nada disto acontece xa, segundo o conselleiro Vázquez. Nunha irada resposta á nacionalista Ana Pontón o titular de Educación accedeu a "explicar os resultados" tras "catro cursos" nos que, afirma, o Goberno "eliminou a presión que [o bipartito] exercía sobre os rapaces, as familias, o profesorado e os inspectores" porque "querían un sistema monolingüe". Sempre segundo Vázquez, cuxo departamento non difundiu documentación ningunha ao respecto, "en educación primaria o peso das materias en galego é de case o 51%, unha porcentaxe que é do 47,4% na ESO e do 50,4% en Bacharelato".
O conselleiro detívose especialmente no ensino infantil para rebater os datos d'A Mesa, colectivo que ao seu xuízo non é máis ca "un instrumento" do BNG "para atacar a opinión maioritaria do pobo galego". "Lonxe do que o seu aparato está a dicir para tratar de confundir", acusou, "o dato correspondente ao ensino de infantil nas cidades galegas", categoría na que inclúe as poboacións de máis de 50.000 habitantes, "acada o 10,4%". "Se me vou ao rural curiosamente as aulas de galego" chegan ao 90,6% en infantil, porque "no rural se fala galego", sentencia.

Por riba dos datos do bipartito

Mentres o conselleiro mantén que non ten "obriga de facilitar os datos que reciba" dos centros educativos aínda que llelos solicite a oposición -contradicindo así o artigo 9 do Regulamento do Parlamento- Pontón considera que Vázquez segue instalado nunha "forma civilizada de xenocidio", incumprindo "conscientemente" a lexislación vixente. "O ataque ao galego" é para a deputada do BNG "un sinal de identidade do Goberno" con medidas como o "decreto "inmoral e antigalego". Ese mesmo decreto, segundo o conselleiro está a garantir unha "utilización equilibrada de galego e castelán" que, botando a vista atrás, mesmo deixaría en mellor lugar o galego no ensino co actual Executivo que co anterior decreto, que estipulaba un "mínimo" do 50% de materias en galego e que segundo o PP traía consigo a "imposición".

Sete euros do Goberno de España para cada menor galego en risco de pobreza

"Alimentación, aseo persoal, vestiario ou pagamento dos gastos do fogar como a luz ou a auga". Son os obxectivos do "fondo extraordinario para xudar as familias con menores ao cargo que se atopen nunha situación de pobreza material severa como consecuencia da crise" que vén de repartir o Ministerio de Sanidade e Servizos Sociais entre as comunidades autónomas. Trátase dun fondo que o departamento que dirixe Ana Mato presenta como histórico, por ser a primeira vez que se aplica, e que segundo a ministra "permitirá que os menores non se vexan afectados polas dificultades económicas que atravesan as súas familias". A grandilocuencia destas verbas fica minorada ao ser contrastadas cunhas cifras que indican que, no caso galego, as axudas suporán uns 7 euros por cada neno ou nena nesta situación de pobreza.
Para distribuír estes cartos, 17,4 millóns de euros en total, o Ministerio tomou como referencia a taxa AROPE, o indicador homologado a nivel europeo para medir a pobreza e a exclusión social e que no ano 2012, referencia para o reparto das axudas, se situou en Galicia no 23,2%. "O recurso a este indicador suscitou o consenso das comunidades autónomas", sinalaba o gabinete ministerial mentres nos corredores a propia conselleira de Benestar da Xunta, Beatriz Mato, se mostraba disconforme co criterio, toda vez que obvia variables como a poboación. A disconformidade non se estende, así e todo, co montante global da partida que, mergullándose un chisco máis nos datos, semella difícil que poida paliar grandes problemas.

No 2012, ano referencia para o reparto, había en Galicia unhas 100.000 persoas menores na pobreza

Segundo o Instituto Galego de Estatística (IGE) en 2012 había en Galicia unha taxa de pobreza infantil do 27,35%, indicador referido á poboación de entre 0 e 16 anos. Nese mesmo ano vivían no país un total de 368.503 persoas desa idade, polo que un sinxelo cálculo permite tirar que as que tiñan este tipo de problemas económicos eran unhas 100.785. Dado que a distribución do Goberno central indica que á Xunta lle tocará xestionar 723,868 euros dese fondo cabe concluír que, efectos prácticos, a Administración autónomica disporá de 7,18 euros por neno ou nena. Segundo a conselleira, estes cartos irán parar a axudas de inclusión social e á Federación do Banco de Alimentos para "garantir os sustento das familias con menores ao cargo que están pasando maiores dificultades", unha vez desbotada a posibilidade de abrir comedores escolares no verán aínda que así foi aprobado no Parlamento.

Un problema en aumento

O reparto deste fondo do Goberno central chega nun contexto no que organizacións sociais como a Rede Europea contra a Pobreza ou Cáritas, entre outras, alertan do incremento da pobreza infantil mentres a propia Xunta, por boca do seu presidente, nega algunhas das súas mostras máis preocupantes, tales como os casos de malnutrición, existentes aínda que haxa outros territorios do Estado máis afectados por eles. Estas circunstancias, que si lle ofrecen "credibilidade" a outras institucións como o Valedor do Pobo, prodúcense nun contexto no que os datos estatísticos tamén revelan un agravamento da situación económica das familias. É o caso, por exemplo, dos fogares galegos con menores ao cargo nos que existe risco de pobreza, que pasaron do 14% ao 20% en apenas seis anos.

Entre as causas directas desta situación está o incremento do desemprego nos últimos anos que acredita a Enquisa de Poboación Activa, o estudo homologado a nivel da Unión Europea para medir o mercado de traballo. Esa enquisa, ademais de contar persoas sen traballo, mide tamén as repercusións desta circunstancia na súa contorna e amosa, por exemplo, como lles afecta aos menores de idade. Así, indicadores como o que mide os nenos e nenas que viven en fogares nos que ninguén ten traballo resultan especialmente reveladores: no ano 2004 pouco máis do 6% da poboación infantil galega estaba nesta stiuación, en 2007 eran apenas o 5,4% e no 2012, ano tomado como referencia polo Ministerio para repartir os cartos, chegaron ao 12,2%.

A ausencia de traballo remunerado deriva tamén, como é obvio, na ausencia de ingresos. Na súa enquisa de condicións de vida o IGE fíxase tamén nas vivendas familiares que, con independencia da idade dos seus membros, dispoñen ou non de ingresos. Esta radiografía tamén amosa datos preocupantes, toda vez que a carencia total de cartos practicamente se duplicou en apenas catro anos. No ano 2010, cando xa estourara a crise económica, eran algo menos de 20.000 vivendas nas que non entraba ingresos ningún. No primeiro trimestre deste 2014 o instituto estatístico galego sinala xa que son uns 34.300 os fogares galegos que tentan sobrevivir sen ingresar nada.

Asociacións culturais rexeitan Filgueira e homenaxearán o “xenio criador do Pobo galego” o Día das Letras

As asociacións máis numerosas e activas do país homenaxearán o “xenio creador do Pobo galego” o vindeiro Día das Letras Galegas. “Filgueira Valverde non pode unir a ninguén”, din e anuncian unha conmemoración festiva á marxe da oficialidade da Academia. 

As asociacións culturais con máis persoas asociadas e maior actividade do país asinan o manifesto común “O xenio criador do Pobo galego. Lingua, cultura e literatura” no que manifestan a vontade de manter o carácter de unión e festivo do Día das Letras, en especial, “nun momento de ataques á nosa lingua sen precedentes na etapa democrática como o que padecemos na actualidade”.
A Mesa pola Normalización Lingüística, Associaçom Galega da Língua, Asociación de Escritoras e Escritores en Lingua Galega, Asociación Socio-Pedagóxica Galega, Comités, Confederación Intersindical Galega- Ensino, Coordinadora de Traballadoras e Traballadores pola Normalización Lingüística, Federación de Asociacións Culturais Galegas-Galiza Cultura e Liga Estudantil Galega son as entidades asinantes do comunicado no que rexeitan a decisión da Academia de dedicarlle o Día das Letras a Filgueira Valverde, unha figura que, segundo din, “non pode unir a ninguén”.
A exemplaridade e o franquismo
“O seu papel destacado dentro da estrutura dun réxime como o franquista que perseguiu a lingua e cultura galega e as súas figuras máis relevantes, silenciándoas, exiliándoas ou facéndoas presas, fan del o contrario do que debe ser exemplo á sociedade galega e por iso só podemos considerar profundamente desafortunada a decisión tomada pola RAG”, explican no comunicado, nacido da xuntanza mantida a pasada quinta feira en Compostela, cinco días despois de que a Academia fixera pública a designación de Filgueira como figura a homenaxear o vindeiro Día das Letras Galegas.
Anuncian tamén que van dedicar o 2015 a homenaxear o “ xenio creador do pobo galego a través da súa lingua e a súa literatura, o seu exemplo cívico e de compromiso co país mesmo nas peores circunstancias”, como primeiro paso “dunha camiñada conxunta e partillada con toda a cidadanía” que iniciará a súa andaina a partir de setembro cando se vaia materializando a proposta das asociacións culturais.
Apostan nunha data para festexar a lingua que nos une e darlle á nosa literatura a difusión social que merece. Son asociacións que tradicionalmente organizan actos e programacións arredor do 17 de maio e que se xuntarán de novo despois de setembro para artellar as súas actuacións cara á un Día das Letras en que, por vez primeira nos cincuenta e un anos de historia, optarán por unha conmemoración diferente, á marxe da figura escollida pola Academia.

Resolución de 3 de julio de 2014, de la Secretaría de Estado de Educación, Formación Profesional y Universidades, por la que se convocan ayudas para alumnado con necesidad específica de apoyo educativo para el curso académico 2014-2015.

Artículo 1. Objeto.

Se convocan, para el curso 2014-2015 las siguientes ayudas individualizadas:

a) Ayudas directas para el alumnado incluyendo al afectado por TDAH (trastorno por déficit de atención por hiperactividad) que requiera por un periodo de su escolarización o a lo largo de toda ella, determinados apoyos y atenciones educativas específicas 

derivadas de discapacidad o trastornos graves de conducta.

b) Subsidios por necesidades educativas especiales derivadas de discapacidad o trastorno grave de conducta para familias numerosas.

c) Ayudas para programas específicos complementarios a la educación reglada 

para alumnado con necesidad específica de apoyo educativo asociado a altas 

capacidades intelectuales.

Convocatoria axudas nee

Teñen que devolver os cartos os colexios que segregan por sexo?

Os cinco colexios privados, catro deles dunha empresa do Opus Dei, que veñen beneficiándose de concertos educativos da Xunta reciben, en conxunto, uns 3 millóns de euros ao ano, segundo cálculos sindicais. Segundo a sentenza que vén de ditar o Tribunal Supremo a instancias da CIG-Ensino esas achegas económicas foron ilegais mentres estivo en vigor a Lei Orgánica de Educación (LOE), que prohibía a discriminación por razón de sexo na admisión do alumnado. Malia esa colisión coa lei, que tamén observou o TSXG, o Goberno galego estableceu os concertos en 2009 e volveuno facer en 2013 nunha orde que tamén está pendente de resolución xudicial. Neste punto, e con independencia de que a vixente LOMCE permita este financiamento dende o 30 de decembro do ano pasado, a pregunta que xorde é se os colexios deben devolver os cartos que, segundo o Supremo, cobraron por unha resolución ilegal.
Dado que a sentenza do alto tribunal non especifica se isto debe suceder -limítase a anular a orde e a sinalar que non é posible asignar fondos públicos contra o criterio legal- a devolución ou non préstase a interpretacións, cando menos polo momento. O primeira en considerar que ese retorno ao erario se debe realizar foi o sindicato impulsor da demanda, que cifra en 12 millóns as "cantidades indebidamente percibidas polas empresas Fomento de Centros de Enseñanza e Asociación Fontenova" entre 2009 e 2012. A Xunta, di o secretario nacional da CIG-Ensino, Anxo Louzao, "ten o deber de recuperar" os cartos "e reintegralos á Facenda Pública".

A CIG-Ensino e a oposición apelan á Lei de Réxime Financeiro para esixir que os fondos retornen ás arcas públicas

Esta afirmación, di Louzao, susténtase na Lei de Réxime Financeiro e Orzamentario de Galicia. Nomeadamente, no artigo 78 desa lei explícase que deben ser devoltas as cantidades "da subvención ou axuda pública" que sexa obxecto dunha "declaración xudicial ou administrativa de nulidade ou anulabilidade da resolución de concesión por concorrer nas causas previstas" na lei 30/92 de réxime xurídico das Administracións públicas. A ambas leis apelan tamén os deputados de AGE Ramón Vázquez e Xabier Ron, que lembran que a anulación das ordes se sustenta no artigo da LOE que impide a discriminación do alumnado por razón de sexo, o cal "se fundamenta no precepto constitucional que impide a discriminación por razón de sexo". A inconstitucionalidade, subliñan, é unha das causas que recolle a lei 30/92 nun contexto no que, lembran, a Consellería de Educación acumula 16 ditames xudiciais contra as súas políticas.

Feijóo pon o foco en PSdeG e BNG

Mentres, no Parlamento, o BNG tamén reclama a devolución dos cartos e a dimisión do conselleiro de Educación, cesamento tamén reclamado polo PSdeG, o presidente da Xunta evita pronunciarse sobre se procede ou non a devolución dos cartos e pon o foco, precisamente, en socialistas e nacionalistas. Tras a reunión semanal do Consello da Xunta e a preguntas da prensa Alberto Núñez Feijóo aferrouse ás sentenzas do TSXG que noutrora avalaron os concertos agora anulados e, sobre todo, a que estes colexios recibiron financiamento público durante boa parte do mandato do Goberno bipartito, se ben a Consellería que daquela dirixía o PSdeG acabou anulándoos e foi o PP o que os recuperou ao retornar ao poder en 2009.

O presidente da Xunta evita aclarar se pedirán a devolución dos cartos

Segundo o presidente da Xunta estas formacións "critican o conselleiro por facer o mesmo que fixeron eles", cando o que "hai que lembrar" é que "mantiveron os concertos". "Nós cumprimos a lei sempre -asegura- e cando hai unha cuestión que non é conforme a esa lei, de acordo cun tribunal aínda que mude a opinión doutros tribunais, seguirémola cumprindo". "Cumprimos cando non se pudo en cuestión durante décadas e todos os gobernos" financiaron estes colexios e tamén, afirma, "a cumprimos cando se cuestionou parcialmente" este financiamento.
Pero, propiciarán a devolución dos cartos ás arcas da Xunta? "Cumpriremos exactamente o que a sentenza di", reitera, e se esta "di que hai que devolver, solicitaremos a devolución". "Se non aclara ese asunto", como así sucede, "solicitarase aclaración das sentenzas". "Cumprimos as sentenzas porque cremos no ordenamento xurídico e que os partidos e os gobernos temos que someternos á lei", asegura, nun contexto no que afirma que o Goberno fixo o propio cando o TSXG anulou parte do denominado decreto do plurilingüismo.

Postas as bases dunha outra forma de celebrar as Letras Galegas

"Decidimos abrir unha celebración aberta, participativa e cidadá tras a decisión da RAG de propoñer Filgueira Valverde, que polo seu pasado granquista non pode ser en ningún caso un referente ético nin un exemplo á sociedade galega". Unha ducia de entidades culturais e sociais mantiveron este xoves unha xuntanza en Compostela para debater e comezar a explorar fórmulas de celebración do Día das Letras Galegas para o vindeiro 2015, considerando "moi desafortunada" e contraria aos principios desta conmemoración a elección de Xosé Filgueira Valverde como figura homeanxeada: "Queremos que o Día das Letras siga a ser a data para festexar a lingua que nos une e darlle á nosa literatura a difusión social que merece. Queremos que siga a manter o seu carácter integrador e de unión que sempre tivo e que debera ser reforzado nun momento de ataques á nosa lingua sen precedentes na etapa democrática. Filgueira Valverde non pode unir a ninguén".

"Decidimos abrir unha celebración aberta, participativa e cidadá tras a decisión da RAG de propoñer Filgueira Valverde, que polo seu pasado granquista non pode ser en ningún caso un referente ético nin un exemplo á sociedade galega"

O texto tamén sinala que ao longo dos 51 anos de historia de celebración do Día das Letras Galegas "as persoas homenaxeadas nesta data caracterizáronse por seren autores cunha obra de calidade e un compromiso e achegas claros en defensa da nosa lingua e da nosa cultura, alén das súas posicións máis ou menos progresistas, máis ou menos conservadoras, máis ou menos relixiosas ou ateas". E que "estes dous elementos, lingua e compromiso co país, fixeron do Día das Letras Galegas unha data de reivindicación para a nosa lingua e de festa para a nosa ampla literatura, capaz de unir nunha soa voz todo o pobo galego".
As entidades participantes nesta xuntanza (entre outras, A Mesa, AELG, Editores de Compostela, AGAL...) e outras que manifesten a súa adhesión aos obxectivos da mesma daranlle forma nos vindeiros días (en principio, cun prazo fixado até o vindeiro luns) a un texto de consenso que tamén chama a "manter viva esta celebración", para que non quede "deserto" este día. Un texto que enxalza "o xenio creador" do pobo galego e que sitúa como obxectivo que o 2015 sexa "un punto de inflexión", impulsando "en positivo" unha conmemoración que debe ser "unha festa" da cultura, da literatura e da lingua galegas, e na que a cidadanía debe ser protagonista. 
O obxectivo é que ao longo do verán se debatan e propoñan distintas fórmulas de celebración do Día das Letras, ao redor dunha figura concreta ou non, nunha data e lugar centralizados ou non, de maneira unitaria e baixo un mesmo paraugas ou non, e que en setembro se poida presentar unha proposta concreta. Na xuntanza tamén se tratou a forma que deberían ter estas celebracións no mundo do ensino, a necesidade de analizar nos centros de forma crítica a figura de Filgueira Valverde, ou o desexo común de evitar que estes debates sexan aproveitados por algúns actores para presentar unha imaxe de "desunión" das entidades defensoras do galego.

O obxectivo é que se debatan ideas ao longo do verán e que en setembro se poida presentar unha proposta concreta

A xuntanza, en réxime de autoconvocatoria, foi unha iniciativa da Mesa pola Normalización Lingüística, que xa o pasado domingo criticou publicamente a decisión do pleno da Real Academia Galega de dedicarlle a Xosé Filgueira Valverde o Día das Letras Galegas de 2015. A entidade fixo un chamado "á sociedade galega e a todas organizacións de defensa da lingua e cultura galegas" a se organizaren "para que o Día das Letras Galegas siga a ser, como até o de agora, unha xornada de reinvindicación do noso idioma".
Nos últimos días comezaron a poñerse enriba da mesa distintas propostas de celebración alternativa das Letras, como por exemplo a formulada o pasado mércores da Romaría das Letras (varios dos seus impulsores participaron tamén na reunión deste xoves), que chamaba a "facer as cousas desde a sociedade civil, non contra pero si á marxe das institucións políticas e culturais, chegando onde elas non poden nin desexan chegar e mobilizando para a causa da lingua un inmenso caudal de enerxías que hoxe non atopan cauces para se expresaren e promovendo unha festa en que caiba toda a xente, sen necesidade de para iso ter que adherir a unha determinada concepción ideolóxica, estética, ortográfica ou de calquera outra índole".