O Campus de Pontevedra acolle esta semana o Congreso Internacional de Videoxogos e Educación

Dende este mércores 26 de outubro e até o venres 28, a Facultade de Ciencias Sociais e da Comunicación do Campus de Pontevedra acollerá o IV Congreso Internacional de Videoxogos e Educación (CIVE), inserido no marco do proxecto de especialización CREA S2i. Tomando como meta final a análise do potencial educativo dos videoxogos, o dito congreso adicará cada unha das súas xornadas a unha fase do proceso de construción dun xogo que se verá complementado coa celebración, a partir do martes 25, dunha Game Jam na Casa da Luz, na que as persoas participantes traballarán durante tres días na creación dun xogo educativo.
Cómpre dicir que esta proposta, que aínda ten aberta a súa inscrición, ten como meta que os participantes traballen e durman na Casa da Luz, onde, divididos en grupos, abordarán a creación dun videoxogo educativo para móbiles e tabletas, “na que a única restrición será o tema”, que non coñecerán até o mesmo día do comezo, segundo informaba a co-presidenta do comité organizador desta actividade, a profesora Beatriz Legerén, que se leva a cabo en colaboración co Concello.
Así, os participantes nesta Game Jam deberán presentar ao cabo de tres días as súas propostas na xornada de peche do CIVE, na que optarán a un premio outorgado polo Colexio Profesional de Enxeñaría en Informática de Galicia (CPEIG), e á posibilidade de desenvolver unha campaña de crowdfunding para obter os fondos para desenvolver o seu xogo.
Cómpre salientar que este congreso internacional desenvólvese por primeira vez en Galicia (tras celebrar as súas primeiras edicións en Valencia, Cáceres e Bos Aires) da man do grupo Alfás, que reúne a académicos e académicas de diferentes países que traballan no uso do videoxogo na aula e que celebrará ademais no campus a súa primeira asemblea, nunha actividade que achegará á cidade a expertos e profesionais como o programador Michael Santorum, de Tequila Works; o artista 3d arxentino Gregorio D`Angelo; Pablo Boquete, do Instituto Escola de Belas Artes de Uruguai; Guido Giunti, da Universidade finlandesa de Oulu ou a investigadora Graciela Esnaola, da Universidade Tres de Febrero da Arxentina. Así, o mércores trataranse os aspectos da historia e a narración, o xoves as mesas de debate centraranse nas regras e mecánicas, onde o protagonismo será para a Facultade de Ciencias da Educación e do Deporte e o venres afondarase na ilustración, o deseño e a arte no videoxogo.
Alén disto, esta última xornada completarase coa celebración (ás 17.30 h) dunha mesa redonda que tratará de dar resposta á pregunta de se É posible unha industria de contidos dixitais en Galicia?, organizada polo Clúster do Audiovisual Galego. Estes tres días de debate veranse precedidos, o martes 25, pola Game Start, unha xornada de traballo para o profesorado, centrada na aplicación dos videoxogos como das técnicas de gamificación nas aulas, para a aprendizaxe de calquera tipo de disciplina.