#NinReválidasNinLOMCE

Campaña da Plataforma Galega en Defensa do Ensino Público en contra das Reválidas e da LOMCE

Nesta nova podedes ver e ASINAR o manifesto "NON AS REVÁLIDAS" así como o resto de documentación da Campaña da Plataforma Galega en Defensa do Ensino Público contra as Reválidas e a LOMCE. Tamén atoparedes un CIG Informa da CIG Ensino sobre a campaña #NinReválidasNinLOMCE. A PGDEP propón que se amose o rexeitamento ás reválidas con concentracións diante dos centros durante o recreo o 20 de outubro e participando nas convocadas para o mércores 26. Consulta no interior as horas e lugares de realización.

20 de outubro: Concentracións durante o recreo
26 de outubro PAREMOS AS REVÁLIDAS
 Concentracións:
ás 18:30 horas:
Pontevedra     Praza da Peregrina   
ás 19 horas:

• Compostela     Praza Roxa  
• Vigo     Farola de Urzaiz (Rúa do Príncipe)  
• Lugo     Ronda da Muralla (diante do IES Nosa Señora dos Ollos Grandes)
• A Coruña     Praza de Pontevedra (diante do IES Eusebio da Guarda)
• Ferrol     Praza de Armada García (diante do edificio da Xunta)   
• Ourense  Xardíns do Pai Feixoo   

ás 20 horas

• Carballo     Praza do Concello   
• Cee     Praza 8 de Marzo

Asina o Manifesto: “NON ÁS REVÁLIDAS”

• O estabelecemento da proba xeral en 3º e 6º de Primaria e as reválidas en 4º da ESO e en bacharelato, que son requisito imprescindíbel para conseguir os títulos correspondentes, pretenden pór as maiores trabas posíbeis para a continuación dos estudos. Responden, exclusivamente, a unha concepción totalmente clasista e elitista da educación e contribúen a excluír o alumnado máis desfavorecido socialmente do dereito á educación, cando xa hoxe o ensino público carece de elementos compensatorios para facer efectivo e real o principio de igualdade de oportunidades.

• É unha tiranía exixirlle ao alumnado que se xogue o seu futuro académico co resultado dunha reválida.  É unha aberración, desde o punto de vista pedagóxico, sometelo a unha presión innecesaria, mediante probas que o vai avaliar baixo estándares uniformizadores, sen considerar a educación como un proceso no que hai que  considerar as circunstancias persoais e socioeconómicas e as capacidades e actitudes do alumnado. 

• Só avalían certas áreas de coñecemento, menosprezando a adquisición doutras competencias, destrezas e habilidades do campo artístico e musical e refusando o ensino da nosa historia e medio natural, imprescindíbel para a formación integral do alumnado. 

• Recentralizan o sistema educativo, dado que a elaboración e deseño das probas, os criterios de avaliación e os estándares de aprendizaxe avaliábeis serán fixados polo Ministerio de Educación, rexeitando así o estudo e coñecemento de todo o que nos conforma como pobo galego.
• Desprezan a avaliación continua e a opinión do equipo docente, cando ninguén mellor que o titor ou titora ou o equipo docente para coñecer as carencias, potencialidades, habilidades e capacidades do alumnado, así como dos medios, recursos e apoios necesarios para mellorar a aprendizaxe e o rendemento escolar. 

• Subestiman e desconfían do traballo do profesorado que estará totalmente sometido e condicionado a orientar o seu traballo docente a preparar o alumnado para a obtención da mellor nota posíbel na avaliación final, marxinando outros aspectos educativos fundamentais para acadar unha formación o máis completa posíbel.  

• Responden á pretensión de conformar rankings de centros, segundo os resultados destas avaliacións e sen ter en conta as características do alumnado e os servizos cos que conta o centro, co obxecto de ir configurando unha rede elitista que contará con máis medios e recursos

• Pretenden ir afirmando un sistema educativo competitivo, clasista e segregador que excluirá os sectores máis desfavorecidos da educación e asentará unha estrutura curricular ao servizo do neoliberalismo.

• Continúan cunha desconsideración absoluta co alumnado con necesidade específica de apoio educativo, co profesorado que os atende e coas súas familias deixando á improvisación todo o relacionado coa organización das probas para este colectivo.

Asina o Manifesto: “NON ÁS REVÁLIDAS”