A USC súmase á conmemoración do Día da Ciencia en Galego

A Universidade de Santiago de Compostela presenta o programa de actividades co que conmemorará os vindeiros 4 e 8 de novembro, por cuarto ano consecutivo, o Día da Ciencia en Galego. Nesta edición, na que se reivindica o dereito a gozar da Física en galego, a USC quere darlle visibilidade ao traballo que se está a desenvolver no Campus de Lugo. O programa do 4 de novembro inclúe unha visita guiada á exposición “Sensores”, dous relatorios sobre robots e navegación espacial impartidos polos docentes Roberto Iglesias e Manuel Andrade, e unha observación astronómica. O 8 de novembro terá lugar o primeiro editatón galego, organizado pola Biblioteca Intercentros, a Galipedia e Proxéctate en Galego.

O Mencer inaugura o novo local para as súas clases a escolares

Está situado nas vivendas de mestres do Golmar » Dispón de tres aulas e unha biblioteca » Repartirá a merenda aos nenos.

O colectivo solidario O Mencer inaugurou onte un novo local en Lalín para levar a cabo o seu programa de reforzo educativo dirixido a nenos de familias con escasos recurso. As instalacións están situadas nas antigas vivendas de mestres do Xesús Golmar, na rúa Memorias dun neno labrego.
O sutil cheiro a pintura percíbese xa nas escaleiras de acceso ata o segundo andar: Un logo da asociación dá a benvida á entrada do piso e unha vez dentro todo é colorido nunha estancia acolledora que sufriu unha "gran transformación", segundo apuntan desde o colectivo. O Concello asumiu a revisión e adecuación do espazo, que pasaron por unha limpeza e pintado, entre outras melloras como a instalación de novas xanelas ou sistema de calefacción. A responsable do programa, Lala García-Portillo, agradeceu en especial "ao capataz de obras, a súa comprensión, interese e apoio coas obras".
A antiga sede do grupo Radio ECCA en Lalín acollerá a partir de mañá aos rapaces que participan nesta iniciativa. Contan con tres aulas para dedicar a infantil, primaria e ESO e así poder impartir clases simultáneas e unha mellor distribución. Así mesmo, esta sede permitirá aumentar os horarios de clases ao luns supeditada, ata o momento, á repartición de alimentos que se realiza durante esa xornada na sede situada na rúa Manuel Rivero. Ademais, o local dispón dunha cuarta habitación que habilitaron como biblioteca, na que se almacenan desde material escolar a libros de lectura. Trátase de doazóns tanto dos colexios da capital dezana (Xesús Golmar e Manuel Rivero) como de varias librerías lalinenses e unha de Santiago. Tamén dispoñen dun baño e unha cociña para preparar a merenda. Ademais, todas as semanas a panadería Bouzada doa o pan para os bocadillos e contarán tamén coa colaboración dunha froitería de Ferrol que lles proporcionará froita cada quincena.

Bolsas deportivas e dentista

O programa conta con 50 alumnos e algunhas solicitudes en lista de espera condicionadas polo número de voluntarios. Ademais, os nenos que o ano pasado obtiveron as bolsas deportivas do ximnasio Ferros comezaron xa a gozalas. E unha odontóloga volverá realizar revisións dentais gratuítas este ano.
 

O abandono escolar reduciuse de novo no terceiro trimestre do ano ata o 22,3%

A taxa de abandono escolar temperán en España reduciuse de novo no terceiro trimestre do ano ata un 22,3 por cento, catro décimas menos que no período anterior, segundo avanzou este luns a secretaría de Estado de Educación, Formación Profesional e Universidades, Montserrat Gomendio.

Conforme explicou durante a inauguración do taller de diagnóstico para o deseño da Estratexia de Competencias da OCDE, a taxa, que durante "moito tempo" se mantivo nun 30%, segue "non obstante duplicando a media da Unión Europea" e "é unha cifra practicamente equiparable á proporción de nin-nis" que hai en España.
Para Gomendio, o descenso ten que ver con "un aumento moi grande da matriculación en Formación Profesional", pero o problema máis grave é que o 70% dos que abandonan "nin sequera titulan na ESO", o que abunda nas súas dificultades para encontrar un emprego agora que coa crise económica, a construción non é unha alternativa.
Este é un dos problemas que analizarán ao longo deste martes os ministerios de Educación e Emprego xunto aos responsables autonómicos destas áreas con apoio da OCDE e a Comisión Europea neste taller do que sairá un primeiro bosquexo da estratexia española para a mellora das competencias e a súa adecuación ao mercado laboral.
"Urxe reducir o abandono, que é a deficiencia mais sangrante e mellorar o rendemento cunha mellora da adquisición de competencias", destacou, para incidir ademais na importancia de adecuar as devanditas competencias ás necesidades reais que terá o mercado laboral a medio e longo prazo.
O taller foi inaugurado polo ministro de Educación, José Ignacio Wert; a secretaria de Estado de Emprego, Engracia Hidalgo; a representante da Comisión Europea Patricia Pérez e a experta da OCDE Joanne Caddy, os cales destacaron a importancia de que España tome medidas para lograr esta adecuación das competencias, o que segundo Wert, "é o gran problema deste país".
O ministro incidiu na importancia deste encontro "non só dende o punto de vista do diagnóstico" que farán os responsables públicos da situación, senón "dende a capacidade de involucrar a todos os axente que teñen que ver no axuste entre emprego e educación".
Segundo explicou, a participación de España neste programa da OCDE decidiuse por acordo do Consello de Ministros o pasado mes de xuño. Sete ministerios involucráronse na preparación da Estratexia, que agora involucra as comunidades autónomas e á que sumarán as súas propostas o próximo 24 de novembro outros sectores, como a empresa ou os axentes sociais, nun segundo taller que se celebrará en Cuenca.
"Teremos unha aproximación comprensiva de toda a problemática dos elementos que serven a emprégaa nulidade e para que o país teña cidadáns responsables e comprometidos, que teñamos unha oportunidade de achegarnos a ese crecemento sostible que preconiza a Unión Europea e a esa economía do coñecemento da estratexia 2020", sinalou.
O taller, que se celebrará este martes, analizará un listado de 24 prioridades predefinir en grupos previos de traballo para acordar, xuntando a perspectiva de cada comunidade autónoma, que pasos hai que dar para conseguir cada obxectivo, conforme explicou Gomendio.
Entre estas prioridades, están as solucións a distintos problemas do sistema actual, no que os que cursan estudos superiores "non" se benefician tanto dese nivel" como os egresados universitarios doutros países, entre outros motivos, pola falta de adecuación dos seus estudos ao mercado de traballo.
A secretaria de Estado incidiu en que se trata de chegar " ao como, á concreción" mediante "un exercicio conxunto" de todos os implicados. Aínda que recoñece que existe "heteroxeneidade" entre as comunidades, chama ao consenso e di que convén non levantar mais barreiras das imprescindibles".
España será o cuarto país en participar neste programa despois de que o fixesen Austria, Noruega, Corea do Sur e Portugal, países que "serviron para comprobar que o concepto de estratexia é bastante flexible", conforme explicou a representante da OCDE. Segundo dixo, se beneficiará" destas experiencias previas e terá "moito que achegar" en políticas innovadoras aos que o sigan.

A Mesa e Sermos asinan un convenio para editar conxuntamente 'Somos galego'

Ambas as dúas entidades colaborarán coa edición dun suplemento bimestral. Oito páxinas que abranguen diversos aspectos vencelledos á lingua.

A Mesa pola Normalización Lingüística e Sermos Galiza veñen de asinar un convenio para a edición, en parcería, dun novo suplemento que acompañará o semanario en papel cunha periodicidade bimestral.
O primeiro número aparecerá a vindeira semana, a quinta feira 30 de outubro e conxuntamente co exemplar número 120 de Sermos Galiza. O suplemento levará por título Somos galego. Oito páxinas que abranguerán diversos aspectos vencellados á lingua. Novas de actualidade, unha sección sobre toponimia, chaves e ferramentas para defendermos os nosos dereitos lingüísticos ou un espazo destinado a mellorar a calidade da lingua son algúns dos contidos que atoparás no novo suplemento.

Desde A Mesa e Sermos Galiza avanzan que o obxectivo é tamén procurar sinerxias coa comunidade leitora para o que procurarán o feedback através das redes sociais

Aliás, contará coa colaboración de persoalidades tan relevantes no ámbito do noso idioma como Xosé Ramón Freixeiro Mato ou César Varela. Porén, desde Sermos Galiza e A Mesa avanzan que o obxectivo é tamén procurar sinerxias coa comunidade leitora para o que procurarán o feedback através das redes sociais e o correo electrónico. A idea é que @s leitor@s acheguen dúbidas, propostas e reflexións arredor da lingua que posteriormente serán respostadas ou incorporadas ás páxinas do semanario.
Estade atent@s que comeza a vindeira semana!

Chega o primeiro 'editatón' da Galipedia

A Galipedia necesítate! Este sábado 8 de novembro a comunidade galega da enciclopedia en liña Wikipedia celebra o seu primeiro editatón, un evento que procura, sobre todo, dous obxectivos: por unha banda incorporar á enciclopedia entradas que até agora non contan coa súa correspondente información en lingua galega ou mellorar esta información, no caso de que estea incompleta. Por outro lado, búscase visibilizar a comunidade da Wikipedia galega, favorecer o contacto entre os seus membros e facilitar a incorporación de novas persoas. 
A actividade terá como temática central o Día da Ciencia en Galego, que se celebra este martes 4 de novembro. É por iso que os termos que se insta a incluír ou a actualizar teñen que ver en boa medida coa ciencia e con científicos e científicas galegas. Ademais, o evento está organizado pola Biblioteca Intercentros do Campus de Lugo (que acolle as sesións, a partir das 10.30 horas), Proxéctate en galego, ademais de pola comunidade xestora da Galipedia. Colaboran, así mesmo, Wikimedia España e a Nerd Nite Compostela.
Pódese participar no editatón de xeito virtual, dende a casa, colaborando na creación ou mellora desta entradas, pero os seus organizadores instan á asistencia presencial, para incidir precisamente nesoutros obxectivos de construción e coñecemento da comunidade. Ademais, a sesión comezará coa intervención de Elisardo Juncal (Galipedia), que realizará unha introdución á Galipedia e á edición co Editor visual. Así mesmo Manuel Díaz Regueiro (Igaciencia), presentará as actividades do Día da Ciencia en Galego, e Carlos Rodríguez-Rellán, profesor da Facultade de Historia da USC ofrecerá unha palestra co título "A Arqueoloxía Experimental e a apocalipse zombi: pequeno manual de supervivencia para nerds".
Entre os artigos que se pretenden crear neste editatón están, por exemplo, os dedicados aos investigadores Richard Buckminster Fuller, Marcelino Álvarez Muñiz, Jesús Andreu Lázaro, Manuel Baraja Fernández, Tomás Batuecas Marugán, Fermín Bescansa Casares, Antonio Casares Bellido, César Sobrado Maestro, María Mercedes Álvarez Lires, María del Pilar de Torres Luna ou Alberto Pazos Labrador. Tamén os que dean conta de conceptos e obxectos coma sensor, intensidade de radiación, ponte autoportante, proxeria ou zurdo. Igualmente, quérense mellorar os artigos que falan de Ángela Ruiz Robles, Marie Curie, Isaac Díaz Pardo, Isaac Newton, Ramón María Aller Ulloa, María Wonenburger, estatística, calculadora ou física, entre moitos outros.
Os organizadores pídenlles aos posibles participantes que, asistan presencialmente ou non, se inscriban previamente, para facilitar a organización do traballo.
   
Día da Ciencia en Galego. Outras actividades

Esta nova edición do Día da Ciencia en Galego, a quinta, centrará as súa actividades en Lugo e estará dedicada, sobre todoa estudar e difundir as figuras e a obra de Isaac Newton e Xosé Rodríguez González, o matemático de Bermés. Nacido en Bermés, unha parroquia de Lalín, en 1770 e finado en Santiago de Compostela en 1823, foi un científico galego da Ilustración e home liberal. Fillo de labregos, aos 28 anos acada a cátedra de Matemáticas e realiza frecuentes viaxes por Europa para intercambiar coñecementos e ampliar estudos, entra en contacto cos traballos dos grandes científicos da época: Laplace, Arago...
Participa con Arago, precisamente, no estudo da triangulación do meridiano entre Dunquerque e Barcelona, traballa para a coroa británica nunhas medicións xeodésicas no Pacífico e imparte cursos na universidade alemá de Gottinga. Durante a invasión francesa foi comisionado da Xunta Central para trazar un mapa da Península e fixar un sistema máis exacto de Pesas e Medidas. Coa volta do poder absolutista foi marxinado e considerado como afrancesado.

• Luns 3 de novembro 

Ás 19 horas, na Galería Sargadelos de Santiago de Compostela inaugúrase a exposición Arte e Ciencia, organizada por Igaciencia, na que destacan os apartados de Op Art, Cuasicristais, Fullereno, perfís na arte, Escher, Juan Gris, e a exposición -inédita en España- de obras artísticas creadas en impresoras 3d.

• Martes 4 de novembro

A partir das 12 horas, o Salón de Actos da Deputación de Lugo acollerá unha videoconferencia, dende Euskadi, de Luís Liz Marzán, experto en Nanotecnoloxía. A partir das 17 horas comeza unha visita guiada á exposición Sensores, organizada por Igaciencia, na sede da Deputación Provincial de Lugo. Ás 18 horas, no Auditorio da Casa do Saber (edificio da Vicerreitoría), dous docentes da USC (Roberto Iglesias e Manuel Andrade) ofrecerán unha clase maxistral sobre robots ("O nacemento dunha nova xeración de robots") e navegación espacial ("Da maçã de Newton à sonda espacial Rosetta".). Finalmente, ao seu remate farase (se o tempo o permite) unha observación astronómica dende a Muralla.

CIG-Ensino quer revalidar o liderado no ensino público non universitario

Co lema  “Defendamos os nosos dereitos. Ensino Público Galego”, a CIG-Ensino aspira a revalidar o liderato no ensino público non universitario o vindeiro 4 de decembro.

O vindeiro 4 de decembro máis de trinta mil docentes galegas do ensino público non universitario escollerán a través do seu voto a 140 delegados e delegadas (45 pola Coruña, 27 por Lugo, 27 por Ourense e 41 por Pontevedra). Na Actualidade, a CIG-Ensino é a primeira forza sindical no sector, co apoio do 48% do profesorado e ostentando a presidencia das xuntas de persoal da provincias da Coruña, Pontevedra e Lugo. Desta volta, a federación educativa da CIG aspira a anovar e ampliar este apoio, facendo un balanzo “altamente positivo” do traballo desenvolvido nos últimos catro anos.
As candidaturas da CIG-Ensino incorporan a 697 docentes de todos os niveis educativos, boa parte deles “incolucrados na defensa e galeguización do ensino público, na normalización lingüística, implicados coa renovación e innovación educativa”, explican desde a federación nacionalista. Tamén contan con “persoas relevantes do ámbito cultural e comprometidas co traballo profesional e o recoñecemento da función docente”.
Un "inxente traballo" detrás
Na presentación pública das súas candidaturas, que concorren baixo o lema “Defendamos os nosos dereitos. Ensino Público Galego”, o secretario nacional da CIG-Ensino, Anxo Louzao, criticou o sistema de elección que cualificou de “inxusto, discriminatorio e antidemocrático”, por ficar a provincia como ámbito electoral. “Se a referencia fose o centro educativo, e non provincial, como acontece no ensino concertado, escolleríanse 1.586 delegados e delegadas en lugar de 140”, sostivo.
En relación a hai catro anos escolleranse seis representantes sindicais menos. Inferior en 2.044 persoas será tamén o número de electores e electoras o que en opinión de Louzao espella “o recorte e a supresión e postos de traballo” que tivo lugar desde 2010.
Logo de poñer en valor o inxente traballo realizado, marcado por un importante ritmo mobilizador, o máximo dirixente de CIG-Ensino resumiu o programa co que se presentan a estes comicios asegurando que os seus obxectivos son “conseguir outro modelo de representación máis democrático e participativo, continuar na loita contra a LOMCE até conseguir a súa derrogación, combater o desmantelamento do ensino público e acadar a restitución de todos os dereitos laborais salariais e profesionais do profesorado”.

Conxugador, corrector, resumidor ou analizador de sentimentos no novo portal “Linguakit”

Preséntase como portal de análise textual mais pode até mesmo adiviñar o sentimento dun documento. Trátase de “Linguakit” unha caixa de ferramentas de Cilenis que sitúa a Galiza na cabeza da enxeñería lingüística. 

Positivo, negativo ou neutro. Así nos pode saír un texto, cos seus propios sentimentos, e desde o portal “Linguakit” poderemos adiviñar o sesgo que lle metemos e mesmo, de se dar o caso, corrixilo. O “analizador de sentimentos” é só unha das ferramentas de “Linguakit”, un portal de análise textual en galego, castelán, inglés e portugués que sitúa o noso país á cabeza da enxeñería lingüística dos ámbitos lusófonos e hispánico.
“Linguakit” nace da man da empresa galega Cilenis e trátase dun portal que nos permite corrixir, conxugar verbos, extraer palabras chave, resumir textos, traducir ou mesmo analizar os sentimentos do escritos. Un feixe de recursos que se habilitan tamén para a nosa lingua que, até o momento, carecía dalgunhas das ferramentas dixitais que agora se ofrecen. Promociónase de maneira especial para aqueles oficios que, como xornalistas ou ensinantes, están en contacto continuo coa lingua mais tamén para calquera persoa en xeral atopará utilidades para o uso diario.

"O “analizador de sentimentos” é só unha das ferramentas de “Linguakit”, un portal de análise textual en galego, castelán, inglés e portugués"

Gratis até cen consultas

O servizo é gratuíto até cen consultas mensuais rexistrándose na web linguakit.com, agora ben, se o uso é máis extensivo ofrecen planes dende 3,95 €/mes segundo as necesidades.
As ferramentas ás que dá acceso son un resumidor, que sintetiza os textos, un corrector que identifica os erros léxicos e gramaticais dando opcións de corrección, un tradutor en liña para as linguas elixidas; un conxugador verbal ademais de opcións de análise. En canto análise lingüística dá opción de saber o número de veces que unha palabra aparece nun texto, facilitar o contexto das palabras chave ou proporcionar información morfolóxica. Con respecto á análise de texto, alén de achegarse ao “sentimento” do escrito, extrae palabras chave, identifica o idioma -no caso galego coas variantes da RAG ou AGAL- e recoñece as entidades, nomes propios e datos numéricos para a súa catalogación.
“Linguakit” nace da empresa Cilenis, xurdida na Universidade de Santiago de Compostela, que se ocupa do desenvolvemento tecnolóxico aplicado á lingua baseados en software libre. Con anterioridade crearon o proxecto Avalingua, que avalía o nivel de lingua en español, inglés, portugués e galego ou conxugadores verbais para galego e portugués.

Nace Somos galego, un suplemento sobre lingua editado pola Mesa e Sermos Galiza

O novo suplemento sobre lingua editado pola Mesa en colaboración con Sermos Galiza xa está na rúa.

Somos galego quere ser unha ferramenta para a información, o debate e o contraste de ideas para reverter o proceso de substitución lingüística en Galiza.

Xa está na rúa Somos galego, o novo suplemento sobre lingua que edita A Mesa pola Normalización Lingüística en colaboración co semanario Sermos Galiza.

 Somos galego nace coa idea de informar das novidades arredor da nosa lingua, sexan denuncias, información sobre acontecementos relevantes, pequenos ou grandes avances e por suposto entrevistas que nos axuden a termos unha panorámica ampla da situación que vive o idioma día a día.

 O suplemento, de periodicidade bimensual, manterá tamén sección fixas e participativas nas que as lectoras e os lectores sexan protagonistas e propoñan dúbidas e respostas ás cuestións que como falantes queremos resolver. Estas seccións serán as de toponimia, dereitos lingüísticos, a utilización correcta da lingua e información sobre empresas ou produtos que teñan o galego como lingua normal das súas relacións comerciais.

 Somos galego quere ser unha ferramenta para a información, o debate e o contraste de ideas para reverter o proceso de substitución lingüística en Galiza.

 Os centros de ensino que son socios colaboradores da Mesa recibirán de forma gratuíta este suplemento en papel, xunto co semanario Sermos Galiza.

 As socias e socios da Mesa poderán descargalo de balde en formato pdf a través da ligazón que achegamos na Remesa. 

“Os contribuíntes si temos moitos problemas para presentar escritos en galego na Axencia Tributaria, cada día máis”

A Mesa respondeu esta mañá ás declaracións da delegada da Axencia Tributaria en Galiza nas que negaba as trabas desta administración ao uso do galego.

Santiago de Compostela, 31 de outubro de 2014.- A Mesa respondeu esta mañá ás declaracións da delegada da Axencia Tributaria en Galiza, Imelda Capote, nas que segundo informa Europa Press defendeu que a Axencia Tributaria "non pon ningunha traba" a presentar escritos en galego ao ser preguntada pola sanción que A Mesa denunciou tras solicitar recibir unha notificación en lingua galega. (http://www.amesanl.org/gl/novas/amosar/id/707)

Segundo recolle a citada axencia de noticias, Imelda Capote afirmou:  "A Axencia Tributaria é unha organización de ámbito estatal, os seus actos con carácter xeral emítense en castelán, pero se un contribuínte quere presentar un escrito en galego, non ten ningún problema e, de feito, faino".

O presidente da Mesa, Marcos Maceira, sinalou que as administracións ”non poden alegar o seu carácter estatal para ignorar a oficialidade do galego”, sobre todo cando teñen sedes terrotoriais en Galiza. Neste sentido, Maceira indicou que calquera persoa ou empresa que pretenda facer as súas xestións en galego coa Axencia Tributaria sabe que as declaracións de Imelda Capote son falsas:

Un dos exemplos máis evidentes é a plataforma telemática da Axencia Tributaria que non permite o uso do galego. Mais aínda que se queiran facer os trámites de forma manual, tamén se poñen infinidade de trabas ao uso normal do galego. Desde A Mesa sinalaron que existen infinidade de exemplos concretos, como os formularios de autoliquidación do IVE, que utilizan asociacións, autónomos ou empresas para facer o pago trimestral do IVE e que até hai pouco tempo estaban dispoñíbeis en galego, mais que hoxe en día só é posibel presentalos en español.

“Eliminar todos os modelos de impresos e formularios en galego que existían nas oficinas e na web da Axencia Tributaria non é por trabas ao uso do galego? Retirar a documentación en galego que existía para a descarga na páxina web e negarse a facilitar escritos en galego cando un cidadán llos solicita non é porlle problemas á cidadanía que quere usar o galego? Impedir utilizar o galego en todas as xestións telemáticas non é por trabas a que os contribuíntes poidan usar a súa lingua?” preguntouse Marcos Maceira.

Alén diso, desde A Mesa lembráronlle á delegada da Axencia Tributaria que a lexislación non só estabelece o dereito dos cidadáns a se dirixir en galego a todas as administracións radicadas en Galiza, sexan locais, autonómicas ou estatais, senón que estabelece a obriga destas a respectar a lingua oficial do contibuínte e dirixirse a el en galego, tanto de forma oral como escrita, cando o solicite.

Neste sentido A Mesa reiterou que a súa solicitude de recibir as notificacións da Axencia Tributaria na lingua propia e oficial de Galiza é un dereito recoñecido e amparado pola lexislación vixente, e que non renunciará a exercer ese dereito, “e moito menos por este tipo de coaccións antidemocráticas”.

A Mesa reiterou que a sanción imposta contra a asociación supón unha vulneración intolerábel dos seus dereitos lingüísticos (alén de evidenciar unha actitude impropia dunha administración pública democrática e ao servizo da cidadanía) e afirmou que non dubidará en acudir aos tribunais se for preciso:

Marcos Maceira: “Toda a lexislación e xurisprudencia vixente é clara ao recoñecer o dereito da cidadanía galega a exixir que calquera notificación, de calquera Administración Pública con sede no territorio da Comunidade Autónoma de Galiza, que afecte os seus intereses, estea redixida en galego e que o procedemento se tramite na lingua oficial elixida pola persoa interesada.”

Suprimen o primeiro curso de galego na Escola Oficial do Bierzo

O pasado curso esta lingua tivo 93 matrículas, máis que os inscritos en alemán, francés ou portugués. Prolingua pídelle á Xunta e á RAG que interveñan para evitar que desapareza o ensino oficial do galego no Bierzo.

O galego é a lingua do Bierzo. Nalgúns concellos fálase moito máis que o español pero, a pesar diso, a Junta de Castilla y León acaba de suprimir as matrículas do primeiro curso desta lingua en Ponferrada, a capital desta rexión.

 

Unha medida que chega cando no pasado curso, houbo un total de 93 persoas matriculadas, 59 na modalidade oficial e 34 na modalidade libre. De feito, o número de alumnos matriculados en galego era superior ao de inscritos en alemán, francés ou portugués.

 

No presente curso 2014/2015 baixaron a 63 matrículas oficiais, dado que o prazo de inscrición de matrícula na súa modalidade libre non está aínda aberto e que tampouco se deu oportunidade para matricularse en 1º curso.

 

Segundo información oficial obtida por ProLingua o total de matrículas na materia de Lingua Galega ofrecida pola Escola Oficial de Idiomas de Ponferrada desde o seu comezo, curso 2002/2003, ata a actualidade, curso 2014-2015, ascende a un total de 1.183, 797 na súa modalidade oficial, 326 na modalidade libre e 60 en cursos específicos. 

 

Por iso, esta entidade denuncia que se suprima o primeiro curso de aprendizaxe. “Non se entende a súa supresión, por iso ProLingua dirixiuse á Xunta de Galicia e á Real Academia Galega para que actúen con dilixencia e celeridade e realicen as xestións oportunas para repoñer de maneira inmediata a oferta do primeiro curso de galego na Escola Oficial de Idiomas de Ponferrada”, apunta nun comunicado.

 

E é que a poboación adulta da comarca do Bierzo non ten outra posibilidade de acceder ao estudo do galego se non é a través do ensino que se lle ofrece na Escola Oficial de Idiomas de Ponferrada. “Por esta razón, a Xunta de Galicia non pode permanecer impasible ante esta noticia tan alarmante de perda de presenza do galego na devandita Escola”, suliña ProLingua que lle pide ao Goberno galego que realice as “xestións pertinentes” coa Junta de Castilla e León para que o galego non desapareza da EOI de Ponferrada.

A Xunta incrementa os recortes docentes nun centro tras as súas queixas

A Consellería de Educación recorta aínda máis os días docentes dunha profesora dun instituto de Camariñas polas protestas dos docentes.

O IES Pedra da Aguia de A Ponte do Porto (Camariñas) facía pública hai uns días a súa denuncia ante a Consellería de Educación, a través da Inspección Educativa, para non lles reducisen o horario da mestra especialista en Audición e Linguaxe, despois da comunicación de ter que compartila co centro de Laxe.

 

Era una queixa que facía a comunidade docente do centro apoiada pola ampa e os alumnos do centro. E a resposta da Xunta non se fixo agardar. Estes días acaban de recibir a resposta da Consellería de Educación. Inspección Educativa comunicoulles que a mestra de Audición e Linguaxe vai ter que ir 2 días a Laxe no canto de 1.

 

“Isto é unha represalia por recorrer aos medios de comunicación para contar a nosa situación e defender os dereitos do noso alumnado”, apuntan desde o instituto. “Se fixemos isto foi porque en ningún momento quixeron atender e escoitar as nosas xustificacións e necesidades. Con esta actitude están amosando o descoñecemento das necesidades específicas dos Centros, xa que con esta medida non solucionan o problema do outro centro e prexudican ao noso”, engaden.

 

Coa colaboración de QPC

“O ensino público xa pasou a fase dos recortes para entrar na do abandono”

A Asociación de Nais e Pais Galegas -Anpas- organizaron hai unha semana a terceira dunha serie de xornadas extraordinarias nas que analizan a problemática do ensino no país, onde son moi críticos coa Xunta.

-Realizaron en Vigo outra xornada de traballo de Anpas Galegas, dentro dun proceso que os está levando por todo o país.
-A maiores das xuntanzas habituais en Santiago, decidimos, sen unha periodicidade fixa, organizarmos reunións por todo o país, para ter diálogos con pais e nais máis amplos, de todo un día, para coñecer de primeira man a opinión e as problemáticas concretas. Estivemos en Lugo, na Costa da Morte, en Vigo e seguiremos en canto poidamos.
-Son moi diferentes as queixas de nais e pais dependendo da zona do país?
-É máis homoxéneo do que parece. Hai matices, obviamente, pero as maiores diferenzas sobre todo atinxen os condicionantes socioeconómicos, non tanto a outros. Por exemplo, non cambia tanto entre un barrio de Vigo e o centro de Carballo, talvez si máis a respecto de bisbarras máis rurais.
-Os recortes serán tema central nestas xuntanzas, pódese supoñer. 
-A sensación é de que xa estamos noutra fase, máis avanzada, da destrución do ensino público en Galiza, que desde o Goberno xa non están na etapa dos recortes, senón na do abandono, cunha precariedade que só se vai salvando grazas ao voluntarismo de profesores, direccións ou pais e nais, porque desde a administración, nada.
-Teñen os pais e as nais de alumn@s que adoptar un papel máis reivindicativo?
-As Anpas sempre tiveron ese papel reivindicativo, o que ocorre é que neste tempo histórico tan duro pasaron de centrarse case unicamente nos problemas concretos de cada centro a ter unha visión máis xeral, non tan limitada a cada ámbito propio, senón consciente do deterioro de todo o Ensino, e de que a saúde da educación pública é algo que beneficia a todos e todas, non só a quen ten un familiar nun colexio.

“Queremos Android en Galego? Moi ben, pidámolo.”

Somos Galego, o suplemento que elaboran en parcería Sermos Galiza e a Mesa pola Normalización Lingüística, entrevista na súa primeira entrega ao coordenador da campaña #Androidengalego.
 
Que vai significar que o Android 5.0 veña co galego de serie?
A inclusión do galego como opción de idioma a partir da versión 5.0 de Android é un gran fito para a nosa lingua, xa que esta pasa a estar presente nos telefones, tablets e outros trebellos que empregan este sistema operativo, que hoxe en día teñen unha cota de mercado superior ao 90% no noso País. Desde o punto de vista dos usuarios multiplícanse as opcións á hora de elixir que dispositivos mercar, xa que a inclusión do galego será un feito e non dependerá dos fabricantes, e desde o punto de vista dos desenvolvedores facilítase a adaptación das aplicacións á nosa lingua, xa que esta será a predefinida se temos esa opción, no canto de ter que acudir a menús para seleccionala, como acontecía até o de agora.
Pero algúns telefones Android xa tiñan opción de galego, non?
Si pero non. Cando Google desenvolve unha nova versión de Android pona a disposición dos fabricantes, para que estes poidan introducila nos seus dispositivos. Algúns destes fabricantes aproveitan para mudar esta versión de software, tanto esteticamente como con funcionalidades extra. Nos últimos anos houbo algún que aproveitou estas modificacións para introducir unha “falsa” tradución ao galego, limitada aos textos dos menús e pouco máis. A novidade agora é que a versión inicial que distribúe Google xa vai en galego e non se trata só dunha tradución de menús, senón da integración da nosa lingua no sistema.

"A versión inicial que distribúe agora Google xa vai en galego e non se trata só dunha tradución de menús, senón da integración da nosa lingua no sistema"

Esta nova conquista para o galego é froito da presión dos usuarios e particularmente do éxito da campaña #AndroidEnGalego. Como se formulou esta campaña?
En Mallando no Android levamos anos traballando para ofrecermos a diario información sobre o mundo tecnolóxico, nomeadamente o ecosistema Android, na nosa lingua. Por iso tiñamos sempre moi presente esa eiva de non termos a posibilidade de empregar os trebellos en galego. Vista a pasividade institucional pensamos que era o momento de pór en marcha a campaña #AndroidEnGalego. Nunha primeira fase solicitamos apoios individuais e de colectivos comprometidos coa nosa lingua, que foron enviados á sede principal de Google en California. Paralelamente tivemos unha xuntanza coa compañía nas oficinas de Madrid para expoñer a campaña e as nosas reivindicacións, ademais de diferentes contactos de seguemento até acadarmos o noso obxectivo.

Que podemos aprender do éxito desta iniciativa de cara o futuro?
A principal lección, quizais a máis fundamental, é que hai que falar as cousas: queremos Android en galego? Moi ben, pidámolo. En certa medida asustábanos a idea de chamar ás portas dunha compañía da magnitude de Google para presentar a nosa solicitude, por medo a que nos deran coa porta nos fuciños. Nada máis lonxe da realidade: desde o primeiro momento tiveron unha actitude positiva cara a introdución do galego nos seus servizos e están a cumprir a súa palabra.
Tentará a Xunta apuntarse o tanto como xa tentara facer cando se conseguiu o Twitter en galego?
Cando puxemos en marcha a campaña recibimos unha chamada da Xunta interesándose polo tema. Tivemos unha xuntanza e percibimos un interese polo espectáculo mediático, a publicidade institucional e apuntarse un tanto que non se correspondía co que pretendiamos coa campaña, polo que rexeitamos ese apoio. Tentar apoderarse dese éxito colectivo sería moi deleznable.

"Temos que seguir reivindicando que a Xunta traballe a prol do galego, ao tempo que debemos organizarnos para levar adiante iniciativas"

O pasotismo e pasividade da Xunta contrastan coa importante mobilización e implicación da sociedade civil en defensa da lingua. Deixamos de agardar pola Administración ou debemos insistir en que cumpra coas súas obrigas?
Neste momento o Goberno do PP non está a cumprir coas súas obrigas en materia de lingua, como en moitas outros temas. Por iso temos que seguir reivindicando que traballen a prol do galego, ao tempo que debemos organizarnos para levar adiante iniciativas que consigan aumentar a presenza do galego na sociedade.

"A comunidade galega na rede é moi activa e ten unha actitude positiva cara a nosa lingua"

Os datos dinnos que o uso da lingua esmorece entre a xente moza. Porén, é no ámbito tecnolóxico ou na rede, que tradicionalmente se asocian a estas franxas de idade, onde semella que o galego está a conseguir os avances máis significativos. Como valoras isto? Hai razóns para o optimismo?
A comunidade galega na rede é moi activa e ten unha actitude positiva cara a nosa lingua. Isto evidénciase en feitos como que o galego é das primeiras linguas ás que se traducen as distribucións de software libre ou no entusiasmo que xeran iniciativas como Twitter en galego ou #AndroidEnGalego. Foise conseguindo que mesmo sectores castelanfalantes empreguen as redes sociais ou os seus trebellos na nosa lingua por sentila máis próxima, e isto a medio prazo é positivo.
Cal pensas que debería ser a próxima conquista do galego no ámbito tecnolóxico?
Tecnoloxicamente adoitamos diferenciar servizos, como pode ser unha rede social, e trebellos. Estes últimos son as ferramentas que empregamos para disfrutar dos servizos, polo que a galeguización tecnolóxica debe comezar por eles. Neste momento urxe que os produtos de Apple poidan ser empregados 100% na nosa lingua, polo que ese debería ser un dos principais obxectivos a conseguir.
Somos Galego fai parte, como suplemento, do número 120 do semanario Sermos Galiza, disponíbel nos quiosques do país e aquí na nosa loxa.

Memoria lingüística para unha eternidade en galego

"Unha anomalía cultural, que se noutros períodos históricos tivo a rúa razón de ser por mor das inxerencias político-relixiosas" hoxe "semella un desleixo xeralizado que cómpre reconducir". Quen fala é Xosśe González Martínez, fundador da Asociación de Funcionarios para a Normalización Lingüística que, a través dun artigo publicado n'A Nova Peneira, explica os porqués do Día da Restauración da Memoria Lingüística de Galicia, unha iniciativa que este colectivo desenvolve dende hai ben anos en solitario pero que, dende o pasado 2013, é asumido polos principais partidos políticos, sindicatos e outras institucións, así como polo propio Goberno galego. O obxectivo non é outro que a lingua galega sexa normal tamén nos últimos momentos da vida e nos actos que acompañan a morte.
"O Día de Defuntos -explica González- debe ser unha data para homenaxear" as persoas queridas "con epitafios redactados no idioma no que se expresaron en vida; porque nel soñaron, namoraron, choraron, cantaron e contaron, arrolaron os seus fillos e netos e desenvolveron todas as actividades da vida cotiá". Ao seu xuízo, a "argallada de que identificar a lingua galega coa morte non é oportuna para acadarmos a normalización lingüística plena cae polo propio pé". Non en van, agrega, os cemiterios son "espazos moi queridos e respectados na nosa tradición cultural", polo que "cómpre que eses lugares dean conta do idioma no que falaron quen están soterrados neles".

"A argallada de que identificar a lingua galega coa morte non é oportuna cae polo propio pé"

Estas bases foron sobre as que naceu o devandito Día da Restauración da Memoria Lingüística, conmemorado o 23 de outubro pero que, por motivos obvios, estende os seus principios ata o 1 de novembro. E, en que se concretan? Para comezar, os concellos que o secundan asumen a proposta de colocar unha placa nos seus cemiterios "na memoria de todos os que xacen aquí, porque grazas a eles Galicia segue a ter cultura e lingua de seu". Ademais, os organismos locais comprométense a "honrar a memoria dalgún defunto coa substitución da lápida en castelán por outra en galego" como "exemplo a imitar", así como a promover actos públicos de sinatura de "actas de vontade" na que se "especifique expresamente os desexos de que os actos fúnebres" de cada persoas se realicen en galego.
Na liña da asociación, os colectivos que apoian esta iniciativa ven "incomprensible" que "as parroquias dos mortes non falen a mesma lingua que as dos vivos". As lápidas, así como os demais obxectos e eventos funerarios, non deben ser "expoñentes da renuncia" do pobo galego "ao seu idioma". Por iso, o obxectivo é invertir unha tendencia pol acal "só unha de cada mil lápidas están escritas en galego e un 2% das notas necrolóxicas, redactadas no noso idioma". "Para explicar esta situación adóitase recorrer á ocorrencia de que neses momentos tristes ninguén está para reparar no problema da lingua, pero ese argumento carece de fundamento lóxico", agregan.